កីឡាជាតិ
ជាតិ
Hun Sen Cup វគ្គ១/២៖ ស្វាយរៀងតទល់ជាមួយអគ្គសនីកម្ពុជា ឯណាហ្គាវើលជួបបឹងកេត
× ក្រោយបញ្ចប់ការប្រកួតវគ្គ៨ក្រុមចុងក្រោយកាលពីថ្ងៃទី២២ វិច្ឆិកា ឆ្នាំ២០១៧ ពានរង្វាន់បាល់ទាត់សម្តេច ហ៊ុន សែន រកឃើញក្រុមខ្លាំងទាំង៤ដើម្បីឡើងទៅប្រកួតនៅវគ្គ១/២ផ្តាច់ព្រ័ត្រហើយ។ ប៉ុន្តែក្នុងចំណោមក្រុមទាំងនេះគ្មានវត្តមានក្រុមការពារតំណែងជើងឯកក្រសួងការពារជាតិនោះទេ ក្រោយចាញ់ក្រុមជើងឯករងព្រះខ័នរាជស្វាយរៀង។ ទោះបីគណៈកម្មការរៀបចំការប្រកួតនេះមិនទាន់បង្ហាញពីការជួបគ្នាជាផ្លូវការក៏ដោយ តែតាមរយៈរូបមន្តប្រកួតក្រុមព្រះខ័នរាជស្វាយរៀងត្រូវតទល់ជាមួយអគ្គសនីកម្ពុជា ឯបឹងកេតប្រជែងជាមួយណាហ្គាវើល។
ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ប្រចាំឆ្នាំ២០១៧ បានឈានដល់ការប្រកួតវគ្គពាក់កណ្តាលផ្តាច់ព្រ័ត្រនៅសប្តាហ៍ក្រោយ។ ក្នុងនោះក្រុមជើងឯករងឆ្នាំ២០១៦ព្រះខ័នរាជស្វាយរៀងក្រោយទម្លាក់ក្រុមការពារជើងឯកក្រសួងការពារជាតិនៅវគ្គ៨ក្រុមចុងក្រោយជាមួយជ័យជម្នះទាំងពីរជើង ៤-១ ត្រូវជួបប្រកួតជាមួយក្រុមអគ្គិសនីកម្ពុជាដែលទម្លាក់ប៉ូលិសក្នុងលទ្ធផលទាំងពីរជើង ៣-១។ ចំណែកក្រុមបឹងកេតក្រោយធ្វើឲ្យគីរីវង់សុខសែនជ័យខកចិត្តជាមួយការចាញ់ទាំងពីរជើង ៤-២ ត្រូវប្រជែងជាមួយក្រុមណាហ្គាវើលដែលទម្លាក់ភ្នំពេញក្រោនជាមួយជ័យជម្នះទាំងពីរជើង ៣-១។
សម្រាប់ការប្រកួតនៅវគ្គ៨ក្រុមចុងក្រោយព្រះខ័នរាជស្វាយរៀងបានបញ្ចប់លទ្ធផលស្មើ ១-១ ជាមួយក្រុមក្រសួងការពារជាតិក្នុងជើងទី១ មុនយកឈ្នះ ៣-០ នៅលើទឹកដីខ្លួនឯងកាលពីថ្ងៃទី២២ វិច្ឆិកា ដើម្បីទម្លាក់ជើងឯកឆ្នាំ២០១៦ជាមួយលទ្ធផលសរុបទាំងពីរជើង ៤-១។ រីឯក្រុមអគ្គិសនីកម្ពុជាក្រោយយកឈ្នះប៉ូលិស ១-០ ក្នុងជើងទី១បានបន្តយកឈ្នះ ២-១ នាការប្រកួតជើងទី២ ដើម្បីទទួលបានកៅអីឡើងទៅវគ្គ១/២ជាមួយជ័យជម្នះសរុបទាំងពីរជើង ៣-១។
ចំណែកក្រុមបឹងកេតក្រោយបញ្ចប់លទ្ធផលស្មើ ២-២ ជាមួយគីរីវង់សុខសែនជ័យក្នុងជើងទី១នៅលើទឹកដីខេត្តតាកែវ ក្រុមនេះបានយកឈ្នះគីរីវង់សុខសែនជ័យ ២-០ នាការប្រកួតជើងទី២កាលពីល្ងាចថ្ងៃទី២២ វិច្ឆិកា នៅពហុកីឡដ្ឋានជាតិ។ ជ័យជម្នះនាំឲ្យបឹងកេងបានឡើងទៅលេងនៅវគ្គ១/២ ជាមួយជ័យជម្នះសរុបទាំងពីរជើង ៤-២។
ដោយឡែកក្រុមណាហ្គាវើលបានធ្វើឲ្យក្រុមភ្នំពេញក្រោនរងការខកចិត្ត បន្ទាប់ពីក្រុមនេះបានយកឈ្នះភ្នំពេញក្រោន ២-១ ក្នុងជើងទី១ និងបន្តឈ្នះ ១-០ ក្នុងជើងទី២នៅលើទឹកដី RSN កាលពីល្ងាចថ្ងៃទី២២ ខែវិច្ឆិកា ឆ្នាំ២០១៧។ ការប្រកួតវគ្គ១/២គ្រោងចាប់ផ្តើមជើងទី១នៅថ្ងៃទី២៩ ខែវិច្ឆិកា និងជើងទី២នៅថ្ងៃទី១៣ ខែធ្នូ ឆ្នាំ២០១៧៕
© រក្សាសិទ្ធិដោយ thmeythmey.com