បច្ចុប្បន្នកម្ពុជាមានអគ្គិសនីប្រើប្រាស់ ៨០ភាគរយនៅទូទាំងប្រទេស

ជាតិ

សេដ្ឋកិច្ច

បច្ចុប្បន្នកម្ពុជាមានអគ្គិសនីប្រើប្រាស់ ៨០ភាគរយនៅទូទាំងប្រទេស

28, Nov 2017 , 8:19 pm

រូបភាព

ដោយ:

ភ្នំពេញ៖ មកដល់បច្ចុប្បន្ន កម្ពុជាមានអគ្គិសនីប្រើប្រាស់ ៨០ភាគរយនៅទូទាំងប្រទេស ខណៈរដ្ឋាភិបាលមានទិសដៅធ្វើឲ្យសម្រេចឲ្យបាន ១០០ភាគរយនៅឆ្នាំ២០២០។ នេះបើតាមលោក អ៊ិត ប្រាំង រដ្ឋលេខាធិការក្រសួងរ៉ែ និងថាមពល ដែលបានថ្លែងនៅក្នុងសន្និសីទថ្នាក់តំបន់ ស្ដីពីសន្តិសុខថាមពលក្នុងប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) នៅថ្ងៃទី២៨ ខែវិច្ឆិកា។

រដ្ឋាភិបាលមានផែនការធ្វើឲ្យភូមិទាំងអស់ មានអគ្គិសនីប្រើប្រាស់នៅឆ្នាំ២០២០ ខណៈបច្ចុប្បន្នតំបន់នៅទូទាំងប្រទេសប្រមាណ ៨០ភាគរយ បានប្រើអគ្គិសនី។ នេះជាថាមពលអគ្គិសនីទាំងរបស់រដ្ឋ និងឯកជន។ ចំពោះការតភ្ជាប់នឹងខ្សែបណ្ដាញជាតិ នាពេលបច្ចុប្បន្នសម្រេចបាន៦០ភាគរយ ហើយនៅឆ្នាំ ២០៣០ រដ្ឋាភិបាល នឹងភ្ជាប់ឲ្យបានយ៉ាងតិច ៧០ភាគរយ។

កម្ពុជានៅមិនទាន់អាចផ្គត់ផ្គង់អគ្គិសនីដោយខ្លួនឯងនោះទេ។ បើតាមលោក អ៊ិត ប្រាំង កម្ពុជាទិញអគ្គិសនីពីឡាវតិចជាង ០,៥ភាគរយ, ថៃ ៤,៥ភាគរយ និងរៀតណាម ១៥ភាគរយ នៅក្នុងឆ្នាំ២០១៧ ។ លោកប្រាប់ថា នៅក្នុងរដូវវស្សា កម្ពុជាមានលទ្ធភាពគ្រប់គ្រាន់ ដោយមិនចាំបាច់នាំចូលអគ្គិសនីពីក្រៅប្រទេសនោះទេ។

ទោះយ៉ាងណាថ្លៃអគ្គិសនីនៅកម្ពុជានៅតែខ្ពស់ជាងប្រទេសជិតខាងរបស់ខ្លួន។ លោក អ៊ិត ប្រាំង អះអាងថា រដ្ឋាភិបាល ព្យាយាមទម្លាក់ថ្លៃអគ្គិសនីជាបន្តបន្ទាប់មកទល់ពេលនេះ។ ប៉ុន្តែស្ថាប័នអន្តរជាតិធំៗ អ្នកជំនាញ ក៏ដូចជាអ្នកជំនួញ នៅតែទទូចឲ្យបញ្ចុះតម្លៃភ្លើងបន្ថែមទៀត ដើម្បីបន្ទាបថ្លៃដើមនៃការផលិត និងធ្វើអាជីវកម្ម ដែលនឹងជួយពង្រឹងភាពប្រកួតប្រជែងផលិតផលរបស់កម្ពុជាលើទីផ្សារអន្តរជាតិ៕