ជាតិ
នយោបាយជាតិ
កៅអីគ្រប់លំដាប់ថ្នាក់របស់អតីតបក្សសង្គ្រោះជាតិ ត្រូវបានចែកឲ្យបក្សដទៃ រួចរាល់អស់ហើយ
× ភ្នំពេញ៖ ក្រោយរងការរំលាយចោល ពីសំណាក់តុលាការកំពូល អាសនៈ៣លំដាប់ថ្នាក់របស់អតីតគណបក្សសង្គ្រោះជាតិ ដែលរួមមានអាសនៈជាសមាជិករដ្ឋសភា អាសនៈជាសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ និងអាសនៈជាសមាជិកក្រុមប្រឹក្សាឃុំ សង្កាត់ ត្រូវបានគណៈកម្មាធិការជាតិរៀបចំការបោះឆ្នោត (គ.ជ.ប) បែងចែកទៅឲ្យគណបក្សនានា អស់ហើយ។
អាសនៈជាសមាជិករដ្ឋសភាទាំង៥៥របស់គណបក្សសង្គ្រោះជាតិ បានទៅលើគណបក្សហ្វ៊ុនស៊ិនប៉ិច ចំនួន៤១ គណបក្សប្រជាជនកម្ពុជា ចំនួន១១ គណបក្សសញ្ជាតិកម្ពុជា ចំនួន២ និងគណបក្សខ្មែរអភិវឌ្ឍសេដ្ឋកិច្ច ចំនួន១។ ការប្រកាសសុភពភាពជូនសមាជិករដ្ឋសភាថ្មី មកពីគណបក្សទាំង៤ខាងលើ ដែលត្រូវជំនួសគណបក្សសង្គ្រោះជាតិ គឺជាសមត្ថកិច្ចរបស់រដ្ឋសភា។
ចំណែក អាសនៈជាសមាជិកក្រុមប្រឹក្សារាជធានី ខេត្ត របស់គណបក្សសង្គ្រោះជាតិទាំង៨៦ បានទៅលើគណបក្សតែ២ប៉ុណ្ណោះ គឺគណបក្សប្រជាជនកម្ពុជា បាន៧៨អាសនៈ និងគណបក្សហ្វ៊ុនស៊ិនប៉ិច បាន៨អាសនៈ។ រីឯអាសនៈជាសមាជិកក្រុមប្រឹក្សាក្រុង ស្រុក ខណ្ឌ របស់គណបក្សសង្គ្រោះជាតិទាំង៦៧៩ ក៏បានទៅលើគណបក្សតែ២នេះដែរ ដោយក្នុងនោះ គណបក្សប្រជាជនកម្ពុជា បាន៦៣៩អាសនៈ និងគណបក្សហ្វ៊ុនស៊ិនប៉ិច បាន៤0អាសនៈ។
ដោយឡែក អាសនៈជាសមាជិកក្រុមប្រឹក្សាឃុំ សង្កាត់ របស់គណបក្សសង្គ្រោះជាតិទាំង៥00៧ ត្រូវបានបែងចែកទៅឲ្យគណបក្សចំនួន៦ ដោយក្នុងនោះមានគណបក្សប្រជាជនកម្ពុជា បានរហូតដល់ទៅ ៤៥៤៨អាសនៈ គណបក្សហ្វ៊ុនស៊ិនប៉ិច បាន២៣៩អាសនៈ គណបក្សខ្មែររួបរួមជាតិ បាន២0១អាសនៈ គណបក្សសញ្ជាតិកម្ពុជា បាន១0អាសនៈ គណបក្សយុវជនកម្ពុជា បាន៣អាសនៈ និងគណបក្សជនជាតិដើមប្រជាធិបតេយ្យកម្ពុជា បាន៣អាសនៈ។
ចំពោះសមាជិកថ្មី មកពីគណបក្សនានា ដែលត្រូវទទួលអាសនៈក្រុមប្រឹក្សារាជធានី ខេត្ត ក្រុង ស្រុក ខណ្ឌ និងអាសនៈក្រុមប្រឹក្សាឃុំ សង្កាត់ ជំនួសគណបក្សសង្គ្រោះជាតិ គឺជាដែនសមត្ថកិច្ចរបស់គ.ជ.ប ផ្ទាល់តែម្តង ដែលត្រូវប្រកាសសុពលភាពជូនពួកគេ។ នេះជាការអះអាងរបស់លោក សោម សូរីដា អគ្គលេខាធិការរងរបស់គ.ជ.ប។ លោក បញ្ជាក់ថា ក្រោយគ.ជ.ប ប្រកាសសុពលភាពរួចហើយ ក្រសួងមហាផ្ទៃ នឹងប្រកាសតែងតាំងជាផ្លូវការ នៅពេលពួកគេ ចូលកាន់តំណែងជាសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ និងជាសមាជិកក្រុមប្រឹក្សាឃុំ សង្កាត់។
គ.ជ.ប តែងលើកឡើងថា ការបែងចែកអាសនៈរបស់គណបក្សសង្គ្រោះជាតិ ទៅឲ្យគណបក្សដទៃ គឺសមស្របទៅតាមច្បាប់ទាំង៤ ដែលរួមមាន ច្បាប់ស្តីពីការបោះឆ្នោតជ្រើសតាំងតំណាងរាស្ត្រ ច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ច្បាប់ស្តីពីការបោះឆ្នោតជ្រើសតាំងក្រុមប្រឹក្សាឃុំ សង្កាត់ និងច្បាប់ស្តីពីការបោះឆ្នោតជ្រើសតាំងក្រុមប្រឹក្សារាជធានី ខេត្ត ក្រុង ស្រុក ខណ្ឌ។ ច្បាប់ចំនួន៤ ដែលត្រូវបានកែប្រែក្រោមគំនិតផ្តួចផ្តើមរបស់ក្រុមតំណាងរាស្ត្រគណបក្សប្រជាជនកម្ពុជា មានខ្លឹមសារជារួមថា«បើគណបក្សណាមួយ ត្រូវបានរំលាយ រាល់អាសនៈនៃគណបក្សនោះ ត្រូវបែងចែកទៅឲ្យគណបក្សដទៃ»។
យោងតាមច្បាប់ទាំង៤ខាងលើ អាសនៈទាំង៣លំដាប់ថ្នាក់ខាងលើ របស់គណបក្សសង្គ្រោះជាតិ ត្រូវអស់សុពលភាព ក្រោយអតីតគណបក្សប្រឆាំងដ៏ធំមួយនេះ ត្រូវបានតុលាការកំពូលរំលាយចោល កាលពីថ្ងៃទី១៦ ខែវិច្ឆិកា ឆ្នាំ២0១៧។ យ៉ាងណាក៏ដោយ គណបក្សសង្គ្រោះជាតិ បានប្រកាសមិនទទួលស្គាល់ការសម្រេចរបស់តុលាការកំពូល ហើយអះអាងថា ខ្លួននៅតែជាតំណាងស្របច្បាប់របស់ប្រជាពលរដ្ឋកម្ពុជាដដែល៕
© រក្សាសិទ្ធិដោយ thmeythmey.com