ជាតិ
កម្ពុជានៅសល់ផ្ទៃដីចម្ការមីនជាង ២ពាន់គីឡូម៉ែត្រក្រឡា
× សៀមរាប៖ គិតមកដល់បច្ចុប្បន្ន កម្ពុជានៅសល់ចម្ការមីនចំនួន ១៤,៦០០ ហើយសរុបជាផ្ទៃដីស្មើប្រមាណ ២១១១ គីឡូម៉ែត្រក្រឡា។ នេះបើយោងតាមរបាយការណ៍ របស់អាជ្ញាធរមីន។
លោក លី ធុជ អនុប្រធានទី២ និងជាអគ្គលេខាធិការអាជ្ញាធរមីន បានឲ្យដឹងថា កម្ពុជានៅសល់ផ្ទៃដីចម្ការមីនប្រមាណ ២១១១គីឡូម៉ែត្រក្រឡា។ គិតពីឆ្នាំ១៩៩២ ដល់ខែតុលា ឆ្នាំ២០១៧ ស៊ីម៉ាក់ បានបោសសម្អាតមីន និងសំណល់ជាតិផ្ទុះពីសង្គ្រាមលើផ្ទៃដីសរុបប្រមាណ ១៦៧.០០០ហិកតា ដោយក្នុងនោះរួមមាន គ្រាប់មីនប្រឆាំងមនុស្ស ១,៧៧៩,០៤៦គ្រាប់ មីនប្រឆាំងរងក្រោះ ៦០,៨២៤គ្រាប់ យុទ្ធភណ្ឌមិនទាន់ផ្ទុះ ៦,២៥៧,១០២ គ្រាប់ និងអំបែង ៧៤១,៧១៥,៤៩១ គ្រាប់។
ក្នុងពិធីគម្រប់ខួបលើកទី២០ នៃអនុសញ្ញាអូតាវ៉ា នៅមជ្ឈមណ្ឌលមេត្តាករុណា នៅថ្ងៃទី២៨ ខែវិច្ឆិកា លោក លី ធុជ បានឲ្យដឹងទៀតថា ទិន្នន័យជនរងគ្រោះ គិតចាប់ពីឆ្នាំ ១៩៩៧ ដល់ខែកញ្ញា ឆ្នាំ២០១៧ សរុបទាំងអស់មាន ៦៤,៧០៥នាក់ ក្នុងនោះគ្រោះថ្នាក់ដោយសារមីនចំនួន ៥១,០៥៦នាក់ និងគ្រាប់ ៦៤,៩១៣នាក់។
ក្នុងនោះដែរ តាមផែនការយុទ្ធសាស្ត្រជាតិសកម្មភាពមីនរបស់រាជរដ្ឋាភិបាល ឆ្នាំ២០១៨-២០២៥ កម្ពុជាគ្រោងសម្រេចគោលដៅមួយចំនួនរួមមាន ត្រូវដោះផ្ទៃដីដែលកំពុងទទួលរងការគំរាមកំហែងដោយគ្រាប់មីន និងគ្រាប់បែកចង្កោម ឲ្យអស់ក្នុងឆ្នាំ ២០២៥។ កាត់បន្ថយកម្រិតទាបបំផុត នូវអត្រាគ្រោះថ្នាក់ដោយសារគ្រាប់មីន គ្រាប់បែកចង្កោម និងសំណល់ជាតិផ្ទុះពីសង្គ្រាម លើកកម្ពស់ជីវភាពរបស់ជនរងគ្រោះ និងសហគមន៍ដែលរងគ្រោះ។ ជំរុញឲ្យមានកិច្ចសហប្រតិបត្តិការថ្នាក់តំបន់ និងអន្តរជាតិ ផ្នែកវិស័យសកម្មភាពមីន បង្កើតការកសាងសមត្ថភាពជាតិ ប្រកបដោយចីរភាព លើបញ្ហាគំរាមកំហែងដល់ការរស់នៅរបស់ប្រជាពលរដ្ឋក្រោយឆ្នាំ ២០២៥។ ធានាសកម្មភាពមីនឲ្យមានការគាំទ្រ ដោយប្រព័ន្ធគ្រប់គ្រងគុណភាព ប្រព័ន្ធគ្រប់គ្រងព័ត៌មានប្រកបដោយប្រសិទ្ធភាព និងមានការចូលរួមពីយេនឌ័រ និងការពារបរិស្ថាន៕
© រក្សាសិទ្ធិដោយ thmeythmey.com