អង់គ្លេសសាទរជ័យជម្នះអ៊ីរ៉ាក់លើភេរវជនរដ្ឋឥស្លាម តែព្រមានថាក្រុមនេះមិនទាន់បរាជ័យទាំងស្រុងទេ

អន្តរជាតិ

នយោបាយអន្តរជាតិ

អង់គ្លេសសាទរជ័យជម្នះអ៊ីរ៉ាក់លើភេរវជនរដ្ឋឥស្លាម តែព្រមានថាក្រុមនេះមិនទាន់បរាជ័យទាំងស្រុងទេ

10, Dec 2017 , 7:39 pm

រូបភាព

ដោយ: ថ្មីៗ

នាយរកដ្ឋមន្ត្រីអង់គ្លេសលោកស្រី ថេ រ៉េសាមេយ៍ (Theresa May )បានអបអរនាយករដ្ឋមន្ត្រីអ៊ីរ៉ាក់ដែលបានប្រកាសពីជ័យជម្នះក្នុងការកម្ចាត់ក្រុមភេរវជនរដ្ឋឥស្លាមឬក្រុមដែស្ហនៅក្នុងប្រទេស។ ប៉ុន្តែមេដឹកនាំអង់គ្លេសបានសង្កត់ធ្ងន់ថា ក្រុមភេរវជនរដ្ឋឥស្លាមមិនទាន់បរាជ័យទាំងស្រុងនៅឡើយទេ។

ថ្ងៃសៅរ៍ទី៩ ខែធ្នូ រដ្ឋាភិបាលអ៊ីរ៉ាក់បានប្រកាស ពីជ័យជម្នះរបស់ខ្លួនចំពោះក្រុមភេរវជនរដ្ឋឥស្លាមដែលកាន់កាប់ប្រទេសនេះតាំងពីឆ្នាំ ២០១៤មកនោះ។

យោងតាមទីភ្នាក់ព័ត៌មាន Xinhua នាយករដ្ឋមន្ត្រីអ៊ីរ៉ាក់លោក Haider Abadi បានចេញមុខប្រកាសពីជ័យជម្នះលើក្រុមរដ្ឋឥស្លាម ឬក្រុមដែស្ហនេះ។ លោកបានលើកឡើងថា ក្រុមភេរជនខាងលើលែងមានលទ្ធភាពកាន់កាប់ទីតាំងសំខាន់ៗនៅអ៊ីរ៉ាក់ទៀតហើយ ហើយប្រតិបត្តិការកម្ចាស់ក្រុមនេះដែលបន្តមកបីឆ្នាំជាងនោះក៏ចប់ដែរ។

គេឃើញ នាយករដ្ឋមន្ត្រីអង់គ្លេសលោកស្រី ថេរ៉េសា ម៉េយ៍ បានអបអរសាទរមេដឹកនាំអ៊ីរ៉ាក់ដែរ ប៉ុន្តែលោកស្រីបានបញ្ជាក់ថាក្រុមភេរវជនរដ្ឋឥស្លាមិនទាន់បរាជ័យទាំងស្រុងឡើយ។

«ខ្ញុំសូមអបរអរសាទរលោកនាយករដ្ឋមន្ត្រី Abadi និងប្រជាជនអ៊ីរ៉ាក់ក្នុងឱកាសប្រវត្តិសាស្ត្រនេះ។ វាជាសញ្ញាបង្ហាញពីទំព័រថ្មីមួយឆ្ពោះទៅរកសន្តិភាព និងវិបុលភាពក្នុងប្រទេស»។ លោកស្រី មេយ៍បានបញ្ជាក់ដូច្នេះ។

លោកស្រីបានបន្ថែមទៀតថា ៖« ក្រុមភេរវជនជ្រុលនិយមនៅតែបង្កគ្រោះថ្នាក់ដល់អ៊ីរ៉ាក់ រួមមានទាំងពីព្រំដែនស៊ីរី។ យើងត្រូវយល់ថា ក្រុមភេរវជនដែស្ហកំពុងបរាជ័យមែនប៉ុន្តែគេមិនមែនបរាជ័យទាំងស្រុងឡើយ»។

កងទ័ពអ៊ីរ៉ាក់បានកម្ចាត់ទីតាំងចុងក្រោយរបស់ក្រុមភេរវជនរដ្ឋឥស្លាមនៅភាគខាងលិចប្រទេសអ៊ីរ៉ាក់នៅថ្ងៃសៅរ៍ទី ៩ ខែធ្នូ ដែលជាតំបន់ជាប់ព្រំដែនជាមួយស៊ីរីនោះ។ ជ័យជម្នះនេះធ្វើប្រតិបត្តិការកម្ចាត់ភេរវជនរយៈពេលជាច្រើនឆ្នាំនេះដល់ទីបញ្ចប់។

តាមពិតទៅក្រុងដែស្ហឬក្រុមរដ្ឋឥស្លាម ឬក្រុមរដ្ឋឥស្លាននៅស៊ីរី និងអ៊ីរ៉ាក់នោះបានចាប់ផ្តើមដណ្តើមកាន់កាប់ទឹកដីជាច្រើននៅស៊ីរី និងអ៊ីរ៉ាក់ក្នុងឆ្នាំ ២០១៤។ ក្រុមនេះក៏បានប្រកាសបង្កើតរដ្ឋដែលមានរចនាសម្ព័ន្ធដឹកនាំតាមបែបឥស្លាមផងដែរ៕