ពីនេះ ពីនោះ
«ត្បិត» និង«ដ្បិត» តើមានអត្ថន័យខុសគ្នាយ៉ាងដូចម្តេច?
× សាធារណជនពិតណាស់ប្រាកដជាធ្លាប់បានប្រើពាក្យ «ត្បិត» និង«ដ្បិត» ប៉ុន្តែជាទូទៅមិនបានដឹងច្បាស់ថា រវាងពាក្យទាំងពីរនេះ មានអត្ថន័យ និងការប្រើប្រាស់ខុសគ្នាយ៉ាងណាទេ។ វចនានុក្រមសម្តេចព្រះសង្ឃរាជ ជួន ណាត បានពន្យល់លម្អិតរវាងពាក្យទាំងពីរនេះថា៖
ពាក្យ «ត្បិត» មានធាតុផ្សំនឹងពាក្យ រឹត គឺរឹតត្បិត ដែលមានន័យថា ប្រិតខ្លាំង, ប្រិតប្រៀប, ត្បិតត្បៀត ពេក។ ត្រង់ហ្នឹងអាចបញ្ជាក់បានថា ជាបុគ្គលដែលសន្សំសំចៃ ដោយចាយលុយត្បិតត្បៀតណាស់។ ឧទាហរណ៍៖ កុំបណ្តែតបណ្តោយពេក ត្រូវរឹតត្បិតបន្តិចទៅ ត្រូវចាយប្រាក់រឹតត្បិត កុំខ្ជះខ្ជាយពេក ព្រោះប្រាក់ ពិបាករកណាស់។
ចំណែកឯពាក្យ «ដ្បិត» ប្រើរួមផ្សំជាមួយពាក្យ តែ គឺដ្បិតតែ ដែលមានន័យដូចជាពាក្យ ពីព្រោះតែ, ហេតុតែ, ដោយហេតុតែ។ ឧទាហរណ៍៖ ខ្ញុំមិនអាចទៅរៀនបានទេ ដ្បិតតែខ្ញុំឈឺធ្ងន់។ «ដ្បិត»ប្រើជាពាក្យកាព្យបុរាណថា៖ ទាហានថ្កើងដ្បិតសឹក ធ្វើស្រែដ្បិតទឹក ត្រឹកពលដ្បិតបាយ សិស្សប្រាជ្ញដ្បិតគ្រូ ជេរពាលដំវាយពលជាដ្បិតនាយ ហ្វឹកហ្វឺនដោយយកចិត្តទុកដាក់៕
© រក្សាសិទ្ធិដោយ thmeythmey.com