ពីនេះ ពីនោះ
ត្រីគល់រាំង ជាប្រភេទត្រីធំៗ អាចលូតលាស់ដល់ប្រវែង៣ម៉ែត្រ ទម្ងន់៣០០គីឡូក្រាម
× ត្រីគល់រាំង (Catlocarpio siamensis) គឺជាប្រភេទត្រីទឹកសាបមានស្រកា ដែលជិតផុតពូជ និងធំជាងគេនៅលើពិភពលោក។ ត្រីប្រភេទនេះ អាចធំលូតលាស់រហូតដល់ប្រវែងដងខ្លួនអតិបរមា៣០០ស.ម និងមានទម្ងន់៣០០គីឡូក្រាម។
ត្រីគល់រាំង រស់នៅតាមដងទន្លេធំៗ ស្ទឹង និងតំបន់ទំនាបលិចទឹក ជាពិសេសនៅក្នុងបឹងទន្លេសាប និងទន្លេមេគង្គ ទីដែលវាអាចរកចំណីបានដូចជា សារាយ ផ្លុងតុង ផ្លែរុក្ខជាតិដែលដុះលួតលាស់មានផ្លែផ្កានារដូវទឹកជំនន់ និងពពួកត្រីតូចៗផងដែរ។ ត្រីគល់រាំងជំទង់ ភាគច្រើនវាអាចសម្របខ្លួនរស់នៅក្នុងស្រះ ត្រពាំង ស្ទឹង និងតំបន់ទំនាបលិចទឹកបាន ខណៈត្រីគល់រាំងពេញវ័យ ហាក់ចូលចិត្តធ្វើចរាចរផ្លាស់ទីចូលទៅរស់នៅក្នុងតំបន់អាងទឹកជ្រៅៗក្នុងទន្លេមេគង្គ។
នៅប្រទេសកម្ពុជា ត្រីគល់រាំងពេញវ័យ បានធើ្វចរាចរផ្លាស់ទីចេញពីបឹងទន្លេសាបចូលទៅរស់នៅក្នុងអាងទឹកជ្រៅៗក្នុងទន្លេមេគង្គលើ ចាប់ពីខេត្តកំពង់ចាម ក្រចេះ ស្ទឹងត្រែង រហូតដល់ល្បាក់ខោន នាចុងរដូវប្រាំង។
ត្រីគល់រាំង ត្រូវបានអ្នកវិទ្យាសាស្ត្រកត់ត្រាចូលក្នុងបញ្ជីរក្រហម IUCN Red List (Critically Endangered) ក្នុងឆ្នាំ ២០១១ ជាប្រភេទត្រីរងគ្រោះជិតផុតពូជធ្ងន់ធ្ងរ។ ទន្លេមេគង្គ គឺជាជម្រករបស់ត្រីធំៗច្រើនប្រភេទ ជាងទន្លេដទៃទៀតនៅលើផែនដី។ ការនេសាទហួសកម្រិត ការបាត់បង់ទីជម្រក និងការកសាងទំនប់វារីអគ្គិសនី អាចធ្វើឲ្យប៉ះពាល់យ៉ាងធ្ងន់ធ្ងរដល់ការធ្វើចរាចរផ្លាស់ទី និងកំណើនត្រី ជាពិសេសត្រីធំៗ ដែលមានរស់នៅច្រើនក្នុងប្រព័ន្ធទន្លេមេគង្គ។ ចម្លាក់នៅលើជញ្ជាំងនៃប្រាសាទអង្គរ ដែលមានអាយុកាលពាន់ឆ្នាំបានបង្ហាញថា នៅពេលនោះ ត្រីរាជ និងត្រីគល់រាំង គឺសម្បូរជាងពេលបច្ចុប្បន្ននេះឆ្ងាយណាស់៕
(អត្ថបទ និងរូបភាពដោយ Chhut Chheana / USAID Wonders of the Mekong).
© រក្សាសិទ្ធិដោយ thmeythmey.com