ពីនេះ ពីនោះ
«ការដាក់ខ្លួន»បង្ហាញពីភាពចាស់ទុំ និងបង្ហាញពីភាពជាមនុស្ស
× «ការដាក់ខ្លួន» គឺជាសញ្ញានៃគុណធម៌ និងភាពចាស់ទុំ និងបង្ហាញពីភាពជាមនុស្ស ដែលមានភាពល្អប្រពៃ។ មនុស្សដែលមានភាពល្អប្រពៃ គឺជាមនុស្សដែលមានភាពងាយស្រួលជិតស្និទ្ធ ជាមួយអ្នកដទៃ។ ផ្ទុយទៅវិញ មនុស្សដែលមានអំនួតខ្លាំងពេក ធ្វើឲ្យបាត់បង់ការប្រាស្រ័យទាក់ទង ហើយអ្នកដទៃមិនសូវមានអ្នករាប់រក។
«ការដាក់ខ្លួន» គឺបង្ហាញថាបុគ្គលនោះ ជាមនុស្សពិត។ មានន័យថា មនុស្សដែលដាក់ខ្លួន ទោះជាមានការផ្លាស់ប្តូរនូវតួនាទី ឬតំណែងអ្វីមួយ មានសម្បត្តិស្តុកស្តម្ភ មានចំណេះវិជ្ជា មានកេរិ៍្តឈ្មោះ ឬទទួលបានកិតិ្តនាមណាមួយ បើសិនយើងជាបុគ្គលដែលដាក់ខ្លួន នោះប្រាកដថា នឹងមិនមានអ្វីដែលផ្លាស់ប្តូរចិត្តគំនិត ឥរិយាបថ និងអាកប្បកិរិយារបស់បុគ្គលនោះឡើយ។ ផ្ទុយទៅវិញ បុគ្គលដែលមានអំនួតលើខ្លួនឯងប្រាកដណាស់ថា នឹងផ្លាស់ប្តូរអត្តចរិត ឫកពា ជាមិនខាន ពីល្អទៅអាក្រក់ ឬក្អេងក្អាង ជាដើម។
«ដាក់ខ្លួន» ជាផ្លូវទៅកាន់សេចក្តីសុខ ហើយផ្តល់ឲ្យយើង ទទួលសេចក្តីគោរពពីមនុស្សម្នាទូទៅ និងមានការកោតសរសើរយ៉ាងក្រៃលែងផងដែរ។ ការដាក់ខ្លួននេះដែរ មនុស្សយើងម្នាក់ៗចាំបាច់ត្រូវតែប្រកាន់ឲ្យបានខ្ជាប់ខ្ជួន ពីព្រោះវាប្រៀបបានដូចជាកូនសោរ ទៅកាន់គុណធម៌ទាំងឡាយ។
ម្យ៉ាងវិញទៀត បុគ្គលដែលដាក់ខ្លួន គឺកើតចេញពីបុគ្គលដែលមានចំណេះវិជ្ជាខ្ពង់ខ្ពស់ មានការអប់រំល្អ ប្រកបដោយសីលធម៌ គុណធម៌ និងសុជីវធម៌ ហើយបុគ្គលទាំងនោះ មិនស្ពាយអំនួតនៅចំពោះមុខឡើយ។ «ការដាក់ខ្លួន» មានន័យថា តែងតែបន្ទាប បន្ទន់ខ្លួនឯង ឲ្យស្របទៅតាមគ្រប់កាលៈទេសៈ និងគ្រប់ស្ថានភាពមនុស្សទាំងឡាយជានិច្ច៕
© រក្សាសិទ្ធិដោយ thmeythmey.com