ដើម្បីការពារប្រជាជន រដ្ឋាភិបាលឥណ្ឌូណេស៊ី បញ្ឈប់ការនាំចូលផលិតផលដែលខុសស្តង់ដារជាតិ

អន្តរជាតិ

ដើម្បីការពារប្រជាជន រដ្ឋាភិបាលឥណ្ឌូណេស៊ី បញ្ឈប់ការនាំចូលផលិតផលដែលខុសស្តង់ដារជាតិ

12, Dec 2017 , 9:39 pm

រូបភាព

រូបភាព៖ Jakarta Post jpg

ដោយ:

រដ្ឋាភិបាលក្រុងហ្សាការតា បានផ្អាក និងព្រមានក្រុមហ៊ុនផលិតផលមួយចំនួន ដែលមិនបានគោរពតាមច្បាប់ និងផលិតទំនិញខុសស្តង់ដារជាតិ ដែលធ្វើឲ្យប៉ះពាល់ប្រជាជន។ ការណ៍ដែលក្រុងហ្សាការតាធ្វើបែបនេះដើម្បីការពារប្រជាជនដែលជាអ្នកទិញនិងដើម្បីធានាពីភាពត្រឹមត្រូវនៃការធ្វើជំនួញក្នុងប្រទេសផងដែរ។

ក្រសួងពាណិជ្ជកម្មឥណ្ឌូណេស៊ី នៅថ្ងៃ១០ ធ្នូកន្លងទៅ បានចេញសេចក្តីប្រកាសមួយស្តីពីលទ្ធផលនៃការធ្វើអធិការកិច្ច និងពិនិត្យលើទំនិញ និងផលិតផលប្រចាំឆ្នាំ២០១៧ ដោយផ្អែកលើប្រព័ន្ធស្តង់ដារជាតិ ។ លទ្ធផលនោះ គឺក្នុងចំណោមផលិតផល ៥៨២ មុខ មាន១៧១មុខ មិនបានបំពេញតាមលក្ខខណ្ឌដែលរដ្ឋាភិបាលតម្រូវឲ្យធ្វើឡើយ ។ នេះបើយោងតាមការចុះផ្សាយរបស់សារព័ត៌មានឥណ្ឌូណេស៊ី The Jakarta Post ។

តាមប្រភពព័ត៌មានដដែល អគ្គនាយកទទួលបន្ទុកការការពារអតិថិជន និងការបញ្ជាទិញក្រសួងពាណិជ្ជកម្មឥណ្ឌូណេស៊ី លោក Syahrul Mamma បានអះអាងថា ដោយសារការបំពាននេះ ក្រសួងបានចេញសេចក្តីព្រមាន និងបញ្ឈប់ការនាំចូលផលិតផលមួយចំនួនរួចហើយផងដែរ ។ លោក បន្ថែមថា ប្រសិនក្រសួង រកឃើញថា មិនមានការកែប្រែ ក្រសួងនឹងប្តឹងក្រុមហ៊ុនទាំងនោះតាមច្បាប់ជាតិឥណ្ឌូណេស៊ីហើយ ។

មន្ត្រីជាន់ខ្ពស់ឥណ្ឌូណេស៊ីដដែលនោះ ក៏បានឲ្យដឹងថា ក្រសួងពាណិជ្ជកម្មឥណ្ឌូណេស៊ី តែងតែធ្វើការត្រួតពិនិត្យ និងវាយតម្លៃលើផលិតផលជារៀងរាល់ឆ្នាំ ក្នុងគោលដៅដើម្បីការពារប្រជាជន ដែលជាអថិជន ក៏ដូចជាដើម្បីធានាឲ្យបានការអនុវត្តដោយតម្លាភាពក្នុងការធ្វើអាជីវកម្មនៅក្នុងប្រទេស ។

លោក ក៏បានគូសបញ្ជាក់ដែរថា រដ្ឋាភិបាលឥណ្ឌូណេស៊ី នឹងបន្តរឹតបន្តឹងសកម្មភាពពាណិជ្ជកម្មខុសច្បាប់តាមព្រំដែន ដែលជាច្រកមួយនៃការនាំចូលផលិតផលខុសស្តង់ដារ ជាពិសេសដែលមានផលិតផលដូចជារបស់ប្រើប្រាស់ក្នុងផ្ទះ ផលិតផលគ្រឿងចក្រ និងចំណីអាហារតែម្តង ៕