ជាតិ
ព័ត៍មានសុខភាព
ក្រោយជំងឺផ្ដាសាយបក្សីH5N1 កើតមាននៅកំពង់ចាម ក្រសួងសុខាភិបាល ប្រាប់ពលរដ្ឋឲ្យប្រយ័ត្នប្រយែង
× ភ្នំពេញ៖ ក្រសួងសុខាភិបាល បានក្រើនរម្លឹកដល់ប្រជាពលរដ្ឋឲ្យមានការប្រុងប្រយ័ត្ន និងចូលរួមបង្ការជំងឺផ្ដាសាយបក្សី H៥N១ បន្ទាប់ពីជំងឺនេះបានកើតឡើងនៅស្រុកព្រៃឈរ ខេត្តកំពង់ចាម ក្នុងពេលថ្មីៗនេះ រួមទាំងជំងឺផ្សេងទៀតផងដែរ ដែលបណ្ដាលពីអាកាសធាតុចុះត្រជាក់។
នៅក្នុងសេចក្ដីជូនដំណឹងរបស់ក្រសួងសុខាភិបាល ដែលចុះថ្ងៃទី១២ខែធ្នូនេះ ក្រសួងបានអំពាវនាវឲ្យពលរដ្ឋចូលរួមបង្ការជំងឺបណ្ដាលពីអាការធាតុត្រជាក់ ដូចជាផ្ដាសាយ ក្អកកណ្ដាស់ រលាកច្រមុះ បំពង់ក និងទងសួត ជាដើម ពិសេសត្រូវចេះការពារកុំឲ្យមានការឆ្លងវីរុសផ្ដាសាយបក្សី H៥N១ ។ ក្រសួងបានអំពាវនាវ ជាពិសេសដល់ពលរដ្ឋ ដែលរស់នៅក្នុងតំបន់កើតមានករណីជំងឺផ្ដាយបក្សី H៥N១ ក្នុងពេលថ្មីៗនេះ នៅក្នុងឃុំត្រពាំងព្រះ ស្រុកព្រៃឈរ ខេត្តកំពង់ចាម បើទោះបីមន្ត្រីក្រសួងពុំទាន់រកឃើញមានការឆ្លងមកមនុស្សនៅឡើយក៏ដោយ។ ក្រសួងសុខាភិបាល លើកឡើងថា មន្ត្រីជំនាញរបស់ខ្លួនកំពុងតាមដានយ៉ាងយកចិត្តទុកដាក់ចំពោះជំងឺផ្ដាយបក្សី H៥N១ នេះ។
ក្រសួងសុខាភិបាល បានណែនាំវិធានការមួយចំនួន ដើម្បីការពារជំងឺបណ្ដាលមកពីអាកាសធាតុត្រជាក់ និងជំងឺផ្ដាសាយបក្សី H៥N១ ។ ពលរដ្ឋត្រូវពាក់សម្លៀកបំពាក់ក្រាស់ជិតខ្លួនប្រាណ ពិសេសត្រូវយកចិត្តទុកដាក់លើមនុស្សចាស់ កុមារតូចៗ ឲ្យមានកម្ដៅខ្លួនធម្មតាជានិច្ច។ គេត្រូវពាក់ម៉ាស់ពេលក្អក កណ្ដាស់ និងប្រើកន្សែងស្អាត ឬក្រដាសអនាម័យ ប្រសិនបើមានហូរសំបោរ ហើយមិនត្រូវបោះចោលពាសវាលពាសកាល ដែលអាចចម្លងទៅអ្នកដទៃនោះទេ។
ចំពោះវិធានការផ្សេងទៀត គេត្រូវលាងសម្អាតដៃនឹងសាប៊ូ រាល់ក្រោយពេលជូតសំបោរ ឬបន្ទោរបង់ មុននឹងប៉ះពាល់អ្នកដទៃ ឬកាន់ម្ហូបអាហារ។ ម្យ៉ាងទៀត គេត្រូវប្រុងប្រយ័ត្នក្នុងការចាប់កាន់សត្វបក្សី ពិសេសកុំយកសត្វមាន់ ទា ឬបក្សីផ្សេងទៀតដែលឈឺ ឬងាប់ មកធ្វើជាម្ហូបអាហារ ឬលក់បន្ត។ វិធានការបន្តទៀត គេត្រូវអនុវត្តអនាម័យល្អក្នុងការបោចរោមសត្វបក្សី និងត្រូវចំអិនអាហារឲ្យបានឆ្អិនល្អ និងត្រូវកប់ ឬដុតបក្សី ដែលឈឺ ឬស្លាប់ឲ្យបានត្រឹមត្រូវ។
ករណីមានការសង្ស័យនរណាម្នាក់មានរោគសញ្ញាជំងឺផ្ដាសាយបក្សី ត្រូវបញ្ជូនបុគ្គលនោះទៅមន្ទីរពេទ្យ។ ក្រសួងបញ្ជាក់ថា ករណីសង្ស័យបុគ្គលដែលមានឆ្លងជំងឺផ្ដាសាយបក្សី គឺបុគ្គលនោះមានរោគសញ្ញាគ្រុនក្ដៅ លើសពី ៣៨,៥អង្សារសេ ក្អក ឬឈឺក ឬដកដង្ហើមហត់ៗ និងមានប្រវត្តិប៉ះពាល់បក្សីឈឺ ឬងាប់ ក្នុងកំឡុងពេល៧ថ្ងៃមុនចេញរោគសញ្ញា។
សូមរម្លឹកថា ចាប់តាំងពីឆ្នាំ២០០៥ ដល់ឆ្នាំ២០១៤ ក្នុងប្រទេសកម្ពុជា ធ្លាប់កើតមានជំងឺផ្ដាសាយបក្សី ដែលបានឆ្លងពីបក្សីមកមនុស្សចំនួន ៥៦ករណី ដែលក្នុងនោះ ៣៧ករណីបានស្លាប់៕
© រក្សាសិទ្ធិដោយ thmeythmey.com