ពីនេះ ពីនោះ
ព័ត៍មានសុខភាព
ការិយាល័យធ្វើការ គួរតែមានរបស់ទាំងនេះទើបជម្រុញដល់សុខភាពបាន
× តើអ្នកមានចង់បន្ថែមម៉ោងធ្វើការបន្ថែមក្នុងការិយាល័យអ្នកដែរទេ? តើអ្នកអាចប្រៀបធៀបម៉ោងធ្វើការ និងម៉ោងនៅផ្ទះដែរទេ? តើវាដូចគ្នាដែរទេចំពោះបរិយាកាសនៅកន្លែងទាំងពីរនេះ? មានមនុស្សច្រើនណាស់ដែលចំណាយពេលចាប់ពី ៧ម៉ោងឡើងទៅក្នុងមួយថ្ងៃដើម្បីធ្វើការក្នុងការិយាល័យរបស់ខ្លួន ប៉ុន្តែភាគច្រើនគឺពួកគេកម្រនឹងគិតទៅលើបន្ទប់ ក៏ដូចជាបរិយាកាសនៅកន្លែងធ្វើការថាប៉ះពាល់ដល់សុខភាពឬអត់ណាស់។ ខាងក្រោមនេះគឺជាគន្លឹះមួយចំនួនតូចដែលអ្នកអាចធ្វើបានដើម្បីជម្រុញដល់សុខភាពរស់នៅក្នុងការិយាល័យ ហើយក៏រីករាយដូចពេលនៅក្នុងផ្ទះដែរ។
ប្រើប្រាស់កៅអីដែលត្រឹមត្រូវ
បើសិនជាការងារតម្រូវឲ្យអ្នកអង្គុយច្រើន ដូច្នេះម៉េចក៏មិនព្យាយាមជ្រើសរើស ឬទិញកៅអីណាដែលជាចំណង់ចំណូលចិត្តរបស់អ្នកទៅ? យកល្អគួរតែជ្រើសរើសកៅអីអង្គុយក្នុងការិយាល័យណាដែលមានការទ្រទ្រង់ដល់ខ្នង និងការកែប្រែកម្ពស់ និងដាក់ដាក់គងបាន។ អ្នកគួរតែអង្គុយធ្វើយ៉ាងណាឲ្យខ្នងត្រង់ ជាមួយនឹងជង្គង់ បត់ ៩០ដឺក្រេ និងកែងជើងរៀបនឹងកម្រាល។ យកល្អគួរតែកុំអង្គុយគងជើងរយៈពេលយូរពេកព្រោះវាអាចបណ្តាលឲ្យស្ទះលំហូរឈាម ដែលនាំឲ្យកើតជាការរីកសរសៃវ៉ែននៅជើងបាន។
ទិញកាសស្តាប់ចម្រៀង
ការស្តាប់ចម្រៀងកំដរបរិយាកាសធ្វើការក្នុងការិយាល័យអាចជារឿងល្អមួយ ដូច្នេះបើសិនជាអ្នកបើកសម្លេងខ្លាំងៗចេញពីទូរស័ព្ទ ឬកុំព្យូទ័រ យកល្អគួរតែគិតដល់ការក្រែងចិត្តចំពោះអ្នកធ្វើការជិតខាងផង។ ដូច្នេះដើម្បីល្អអ្នកគួរតែប្រើកាសស្តាប់ចម្រៀងវិញ។
បន្ថយការឈឺក្បាល
ការឈឺក្បាលភាគច្រើនគឺកើតឡើងចំពោះអ្នកធ្វើការក្នុងការិយាល័យតែម្តង។ ការសម្គាល់ដឹងអំពីរឿងនេះអាចជួយឲ្យអ្នកអាចប្រើវិធីបន្ថយ ឬព្យាបាលវាបាន ជាពិសេសអ្វីដែលពាក់ព័ន្ធនឹងការឈឺក្បាលតែម្តង។
រក្សាក្លិនឲ្យមានតិចតួចបំផុត
ទឹកអប់ ឡូសិនលាបដៃ សុទ្ធតែជាមេបញ្ហាបើសិនជាអ្នកមានប្រតិកម្មអាឡែហ្ស៊ីនឹងក្លិន។ យកល្អគួរតែកុំឲ្យមានវាក្នុងបន្ទប់ធ្វើការរបស់អ្នកអី។ អ្នកក៏អាចសុំឲ្យអ្នកធ្វើការជាមួយគ្នាកុំឲ្យប្រើទឹកអប់ណាដែលមានក្លិនឈួលខ្លាំងពេកដែរ។
កុំឲ្យមានជំហរធ្វើការមិនល្អ
មែនហើយ ជំហរធ្វើការរបស់អ្នកប្រហែលជាកំពុងតែនាំឲ្យមានអាការៈឈឺខ្នងបាន។ ការអង្គុយអោនខ្លាំងពេកលើតុធ្វើការអាចដាក់សម្ពាធលើករបាន និងបង្កជាការឈឺក្បាលបែប Tension បាន។ ដូច្នេះការសម្របខ្លួនជាមួយនឹងការប្រើប្រាស់កៅអីត្រឹមត្រូវនឹងជួយដោះស្រាយការឈឺក្បាលនេះបាន។
លាបពណ៌ដែលធ្វើឲ្យអ្នកសប្បាយចិត្ត
ថ្វីបើអ្នកទំនងជាមិនអាចលាបពណ៌លើជញ្ជាំងការិយាល័យរបស់អ្នកមែនក៏ដោយ តែអ្នកនៅតែអាចបន្ថែមគ្រឿងផ្សំផ្សេងៗទៀតដើម្បីជម្រុញដល់អារម្មណ៍ធ្វើការរបស់អ្នកបានដែរ។
• ក្រហម និងស្វាយ អាចភ្ញោចដល់រាងកាយ និងជម្រុញដល់ការបញ្ចេញអ័រម៉ូន Adrenaline ដើម្បីបង្កើនថាមពលដល់រាងកាយ
• បៃតង និងលឿង នឹងជម្រុញដល់អារម្មណ៍រីករាយ ព្រមទាំងធ្វើឲ្យអ្នកមិនសូវមានផាពស្ត្រេសថែមទៀត
• ខៀវ ជាពណ៌ដែលធ្វើឲ្យអារម្មណ៍ស្ងប់ស្ងាត់ ហើយក៏ជម្រុញដល់ការជម្នះនូវឧបសគ្គដែលកើតមាននៅជុំវិញខ្លួនបានដែរ។
គួរតែមានផើងផ្កា
ផ្កាអាចធ្វើឲ្យផ្លាស់ប្តូរសារធាតុគីមីក្នុងខួរក្បាល និងធ្វើឲ្យអ្នកមានអារម្មណ៍វិជ្ជមានកាន់តែច្រើន។ តាមពិតទៅ ការសិក្សាមួយពីសាលាពេទ្យ Harvard បានរកឃើញថា អ្នកដែលរក្សាផ្កាស្រស់ជាប់ក្នុងផ្ទះបានប្រាប់ថា ពួកគេមិនសូវមានភាពថប់អារម្មណ៍ទេ ហើយក៏មានអារម្មណ៍ល្អចំពោះអ្នកដទៃផងដែរ។ ហេតុផលមួយផ្សេងទៀតនោះគឺថា ស្ត្រីអាចនឹងមានគំនិតច្នៃប្រឌិត និងដំណោះស្រាយលើបញ្ហាជាច្រើននៅពេលមានផ្កាស្រស់នៅក្បាលខ្លួន៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com