អាមេរិកអះអាងថា ការចរចាបញ្ជូនជនជាតិខ្មែរ ដែលប្រព្រឹត្តលើ្មសនៅអាមេរិក មានការរីកចម្រើន

ជាតិ

អាមេរិកអះអាងថា ការចរចាបញ្ជូនជនជាតិខ្មែរ ដែលប្រព្រឹត្តលើ្មសនៅអាមេរិក មានការរីកចម្រើន

13, Dec 2017 , 6:39 pm

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ អាមេរិក អះអាងថា ដំណើការចរចាបញ្ជូនពលរដ្ឋខ្មែរ កំពុងមានការរីកចម្រើន រវាងរដ្ឋាភិបាលកម្ពុជា និងអាមេរិក។ រដ្ឋាភិបាលកម្ពុជា ធ្លាប់ប្រកាសទទួលយកពលរដ្ឋខ្មែរ ដែលអាមេរិកគ្រោងបញ្ជូនមកកម្ពុជាវិញ។

ឧបការីរងទទួលបន្ទុកកិច្ចការតំបន់អាស៊ីអាគ្នេយ៍ លោក W. Patrick Murphy បាននិយាយថា កិច្ចពិភាក្សាលើបញ្ហាបញ្ជូន និងទទួលយកពលរដ្ឋខ្មែរមកកម្ពុជាវិញនោះ បានឈានទៅរកសញ្ញាល្អច្រើនរវាងរដ្ឋាភិបាលទាំងពីរ។ លោក W. Patrick Murphy បានកិច្ចសន្ទនាភាគីទាំងពីរ នឹងអាចឆ្ពោះទៅរកកិច្ចព្រមព្រៀងរួមគ្នាមួយ ដើម្បីដោះស្រាយបញ្ហាពលរដ្ឋខ្មែរទាំងនោះ។

ថ្លែងក្នុងសន្និសីទកាសែត ដែលរៀបចំនៅគេហដ្ឋានអនុទូតអាមេរិកប្រចាំកម្ពុជា នៅថ្ងៃទី១៣ ធ្នូនេះ លោក W. Patrick Murphy បានរំឮកពីកិច្ចសន្ទនាមួយចំនួន ជាមួយលោក អ៊ូច បូរិទ្ធ រដ្ឋលេខាធិការក្រសួងការបរទេសដូច្នេះថា៖«យើងធ្លាប់មានបញ្ហាកិច្ចសហប្រតិបត្តិការលើបញ្ជូនពលរដ្ឋខ្មែរមកកម្ពុជាកន្លងមក ។ប៉ុន្តែតាមរយៈកិច្ចចរចា និងពិភាក្សាគ្នានេះ យើងក៏មានការជឿជាក់ ហើយក៏បានឃើញថាមានដំណើការល្អជាច្រើនចំណុច ដែលវាអាចកសាងកិច្ចសហប្រតិបត្តិយើងឡើងវិញ។ ហើយកំពុងបន្តពិភាក្សាគ្នាទៀត ក្នុងកិច្ចការបញ្ជូនពលរដ្ឋខ្មែរមកកម្ពុជាវិញនេះ ។ យើងសង្ឃឹមថា ពលរដ្ឋដែលបញ្ជូនមកកម្ពុជាច្រើនក្នុងស្ថានការណ៍បែបនេះ រដ្ឋាភិបាលកម្ពុជានឹងអាចរកកន្លែងស្នាក់នៅសមរម្យ សម្រាប់ពួកគេស្នាក់ នៅពេលដែលពួកគេមកដល់»។

ពលរដ្ឋខ្មែរ ដែលអាមេរិកគ្រោងបញ្ជូនមកកម្ពុជាវិញ ភាគច្រើនជាអ្នកប្រព្រឹត្តបទល្មើសក្នុងប្រទេសអាមេរិក។ ត្រង់ចំណុចនេះឧបការីរងទទួលបន្ទុកកិច្ចការតំបន់អាស៊ីអាគ្នេយ៍រូបនេះ បានថ្លែងការពារការសម្រេចរបស់រដ្ឋាភិបាលអាមេរិកថា អាមេរិកអនុវត្តគោលការណ៍នេះ លើពលរដ្ឋចំណាកស្រុកទាំងអស់ ដែលរស់នៅអាមេរិក ។ បើតាមលោក W. Patrick Murphy ក្នុងពេលជាមួយគ្នា ដែលអាមេរិកកំពុងធ្វើកិច្ចការងារបញ្ជូនពលរដ្ឋខ្មែរវិញនេះ អាមេរិកក៏អនុវត្តការងារជាមួយបណ្ដាប្រទេសមួយចំនួន ក្នុងតំបន់អាស៊ាន ដែលពលរដ្ឋប្រព្រឹត្តខុសច្បាប់អាមេរិកដែរ។ បន្ថែមពីនេះលោក W. Patrick Murphy បានសង្កត់ធ្ងន់ថា បើជនជាតិអាមេរិកប្រព្រឹត្តខុសនៅប្រទេសដទៃ ក៏អនុវត្តគោលការណ៍ទទួលយកវិញផងដែរ។

កន្លងមករដ្ឋាភិបាល ប្រកាសទទួលយកពលរដ្ឋខ្មែរ ដែលអាមេរិកគ្រោងបញ្ជូនមកកម្ពុជាវិញ ដោយអនុវត្តតាមកិច្ចព្រមព្រៀងរវាងប្រទេសទាំងពីរ។ ថ្លែងក្នុងពិធីសំណេះសំណាលជាមួយកម្មកររោងចក្រជាង១ម៉ឺននាក់ កាលពីថ្ងៃទី៦ ធ្នូនេះ សម្ដេចនាយករដ្ឋមន្ត្រី ហ៊ុន សែន បានប្រាប់ឲ្យក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ ពិភាក្សាជាមួយមន្ត្រីរដ្ឋាភិបាលអាមេរិក ដើម្បីដោះស្រាយបញ្ហាពលរដ្ឋខ្មែរ ដែលភៀសខ្លួនរស់នៅអាមេរិកក្រោយឆ្នាំ១៩៩៤ ហើយគ្រោងបញ្ជូនមកកម្ពជាវិញនេះ។ តែយ៉ាងណាប្រមុខរដ្ឋាភិបាល ស្នើឲ្យអាមេរិកផ្ដល់ជំនួយឲ្យបានសមស្របដល់ពលរដ្ឋខ្មែរទាំងនោះផងដែរ មុននឹងបញ្ជូនមកកម្ពុជា៕