ជាតិ
សង្គមជាតិ
អាជ្ញាធរអប្សរានិងគម្រោងអភិរក្សអាល្លឺម៉ង់ GACP ចុះកិច្ចព្រមព្រៀងបន្តអភិរក្សថ្មប្រាសាទតំបន់អង្គរ
× សៀមរាប៖ តំណាងគម្រោងអភិរក្សអាល្លឺម៉ង់-អប្សរា និងអាជ្ញាធរជាតិអប្សរាបានសម្រេចចុះអនុស្សារណៈរួមគ្នាដើម្បីបន្តកិច្ចសហប្រតិបត្តិការជួសជុល និងអភិរក្សប្រាសាទដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា ក្នុងកិច្ចប្រជុំគណៈកម្មាធិការអាយស៊ីស៊ី-អង្គរលើកទី ២៤ ថ្ងៃ១៤ ខែធ្នូនេះ។
អនុស្សារណៈយោគយល់គ្នាមួយត្រូវបានចុះរួមគ្នារវាងអាជ្ញាធរជាតិអប្សរា ជាមួយគម្រោងអភិរក្សាអាល្លឺម៉ង់-អប្សរា (German-APSARA Conservation Project) ឬហៅកាត់ថា GACP នៅថ្ងៃទី ១៤ ខែធ្នូក្នុងកិច្ចប្រជុំលើកទី ២៤នៃ គណៈកម្មាធិការអាយស៊ីស៊ី- អង្គរ។ វាក៏កើតឡើងចំខួបលើកទី ២០នៃគម្រោងអភិរក្ស GACP នេះដែរ។
លោកសាស្ត្រាចារ្យបណ្ឌិត Klaus Becker អនុប្រធានស្រាវជ្រាវ និង ចែករម្លែកចំណេះដឹងនៃសាកលវិទ្យាល័យវិទ្យាសាស្ត្រអនុវត្តកូឡូញ ប្រទេសអាល្លឺម៉ង់ (TH Koeln University of Applied Science)បានថ្លែងប្រាប់សារព័ត៌មានថ្មីៗដូច្នេះ៖ « GACP បានធ្វើការងាររយៈពេល២០ឆ្នាំហើយ។ ក្រោមការចុះកិច្ចព្រមព្រៀងនេះ វាមានន័យថាជំហានឯកភាពគ្នាថាបន្តយើងបន្តការងារនេះទៀតនៅឆ្នាំក្រោយ។ វាក៏កំណត់ថា តើអនុវត្តរបៀបម៉េចនិងផ្តល់ជំនួយទ្រទ្រង់របៀបម៉េចនោះ។ សាកលវិទ្យាល័យយើង ក៏ដូចជាក្រសួងការបរទេសអាល្លឺម៉ង់មានមោទនភាព និងរីករាយដោយជួយប្រជាជនកម្ពុជាអភិរក្សបេតិកភណ្ឌដ៏អស្ចារ្យនេះ»។
អនុស្សរណៈយោគយល់គ្នានេះមានគោលបំណងសំខាន់បន្តគម្រោងកិច្ចសហប្រតិបត្តិការតាមរយៈអង្គភាពអចិន្ត្រៃយ៍ដែលមានអ្នកជំនាញជួសជុល និងអភិរក្សប្រាសាទក្នុងរមណីយដ្ឋានអង្គរ និងរមណីយដ្ឋាន ប្រវត្តិសាស្ត្រដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា។
ក្រៅពីចុះអនុស្សារណៈយោគយល់គ្នាគ្នា វាក៏មានពិធីចែកវិញ្ញាបនបត្រសរសើរដល់ក្រុមអ្នកអភិរក្សចំនួន ១៧ នាក់ដែលបម្រើការងារក្នុងគម្រោងអភិរក្សអាល្លឺម៉ង់-អប្សរា ។ អ្នកអភិរក្សទាំង ១៧ នាក់នោះទទួលបានការបណ្តុះបណ្តាលជំនាញបច្ចេកទេសទាំងទ្រឹស្តី និងការអនុវត្តបែបវិទ្យាសាស្ត្រ ពីអ្នកវិទ្យាសាស្ត្រអភិរក្សអាល្លឺម៉ង់ និងបានបម្រើការងារល្អប្រសើរក្នុងការអភិរក្សថ្មប្រាសាទកន្លងមក។
តាមពិតទៅគម្រោងអភិរក្សា GACP នេះស្ថិតនៅក្រោមការដឹកនាំរបស់លោកសាស្ត្រាចារ្យបណ្ឌិត Hans Leisen ដោយទទួលបានការគាំទ្រពីសាកលវិទ្យាល័យវិទ្យាសាស្ត្រអនុវត្តកូឡូញ ប្រទេសអាល្លឺម៉ង់ (TH Koeln University of Applied Science) និងក្រសួងការបរទេសអាល្លឺម៉ង់។
គម្រោងអភិរក្ស GACP នេះត្រូវបានចាប់ផ្តើមដំណើរការកាលពីឆ្នាំ ១៩៩៧ ដែលទទួលបានការឧបត្ថម្ភគាំទ្រពីសំណាក់ក្រសួងការបរទេសអាល្លឺម៉ង់ ហើយមកដល់បច្ចុប្បន្ន GACP មានសមាជិកប្រហែល៥០នាក់ហើយ។ ដោយសហការជាមួយអាជ្ញាធរជាតិអប្សរា អង្គភាពនេះបានទទួលខុសត្រូវលើគម្រោងជួសជុលចម្លាក់អប្សរា និងចម្លាក់លៀន នៅប្រាសាទអង្គរវត្ត ពីឆ្នាំ១៩៩៧ រហូតមកដល់បច្ចុប្បន្ន។ ក្រៅពីគម្រោងអភិរក្សនៅតំបន់រមណីយដ្ឋានអង្គរ GACP ក៏ចូលរួមចំណែកអភិរក្សថ្មប្រាសាទនៅប្រាសាទកោះកេរ្តិ៍ និង សំបូរព្រៃគុកខេត្តកំពង់ធំផងដែរ៕
Tag:
អាជ្ញាធរជាតិអប្សរា
GACP
អាល្លឺម៉ង់
TH Koeln University Applied Science
© រក្សាសិទ្ធិដោយ thmeythmey.com