សម្តេច ហ៊ុន សែន៖ កីឡាករដែលចូលចិត្តនិយាយបញ្ហាលុយលើហ្វេសប៊ុក ជាការទម្លាក់តម្លៃខ្លួន

កីឡាជាតិ

ជាតិ

សម្តេច ហ៊ុន សែន៖ កីឡាករដែលចូលចិត្តនិយាយបញ្ហាលុយលើហ្វេសប៊ុក ជាការទម្លាក់តម្លៃខ្លួន

15, Dec 2017 , 10:54 am

រូបភាព

ដោយ: រំដួល ចិត្រា (Romdoul Chetra)

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន រិះគន់លើកីឡាករ -កីឡាការិនីមួយចំនួន ដែលតែងតែសរសេររៀបរាប់ពីការមិនពេញចិត្ត ឬបញ្ហាផ្ទាល់ខ្លួនអ្វីមួយ លើបណ្ដាញសង្គមហ្វេសប៊ុក។ សម្ដេច ហ៊ុន សែន ចាត់ទុកទង្វើរបស់កីឡាករ-កីឡាការិនីទាំងនោះ កំពុងតែទម្លាក់តម្លៃខ្លួនឯង ក្នុងនាមជាកីឡាករតំណាងឲ្យមុខមាត់ប្រទេសជាតិ។

ថ្លែងក្នុងពិធីប្រគល់ប្រាក់រង្វាន់រាជរដ្ឋាភិបាល ជូនកីឡាករ កីឡាការិនី ដែលបានឈ្នះមេដាយមាសក្នុងការប្រកួត Sea Games លើកទី២៩ និងការប្រកួតជើងឯកគ្រប់កម្រិតជាលក្ខណៈអន្តរជាតិ ប្រមុខរដ្ឋាភិបាល បាននិយាយដូច្នេះថា៖«ក្នុងពេលដែលខ្ញុំអបអរសាទរកីឡាករ-កីឡាការិនី ដែលជាជ័យលាភីនៅទីនេះ។ ខ្ញុំក៏សូមយកឱកាសនេះដើម្បីនិយាយទៅកាន់ក្មួយៗ ក៏ដូចជាអ្នកគាំទ្រទាំងឡាយ មេត្តាយោគយល់អាធ្យាស្រ័យ ហើយយើងតាំងខ្លួនជាអ្នកកីឡាស្អាតស្អំ កីឡាមិនមែនដើម្បីប្ដូរប្រាក់ ព្រោះរយៈពេលកន្លងទៅ ខ្ញុំក៏ឃើញការបង្ហោះតាមហ្វេសប៊ុកមួយចំនួន ដែលនេះជាការទម្លាក់ខ្លួនរបស់ក្មួយ ឬក៏អ្នកគាំទ្ររបស់ក្មួយៗទៅវិញទេ។ ទោះបីជាមេដាយថ្នាក់ណាក៏ដោយ ប្រសិនបើអង្គុយទាមទារនូវប្រាក់ប្រញាប់ប្រញាល់ហួស ច្បាស់ជាវាធ្វើឲ្យតម្លៃដែលយើងប្រកួតធ្លាក់ចុះវិញ។ អារម្មណ៍បែបនេះខ្ញុំយល់ ក៏ប៉ុន្តែយើងត្រូវយល់ថា អ្វីដែលជាការចាយវាយប្រាក់…»។

សូមស្ដាប់សំឡេង៖

ការលើកឡើងរបស់សម្ដេច ហ៊ុន សែន បែបនេះ ធ្វើឡើងក្រោយពីមានកីឡាករ-កីឡាការិនី សរសេរពីបញ្ហាថវិកាលើគណនីហ្វេសប៊ុករបស់ពួកគេ ដែលមានការចែកចាយព៌ត៌មានបន្តយ៉ាងទំលំទំលាយ ពីសំណាក់អ្នកគាំទ្ររបស់ពួកគេ ។

នៅព្រឹកថ្ងៃ១៥ ធ្នូនេះ រដ្ឋាភិបាល បានចំណាយទឹក៧០០០ពាន់លានរៀល(ជាង១,៧លានដុល្លារ) ប្រគល់ប្រាក់រង្វាន់ដល់កីឡាករ កីឡាការិនី ដែលបានឈ្នះមេដាយមាសក្នុងការប្រកួត Sea Games លើកទី២៩ និងការប្រកួតជើងឯកគ្រប់កម្រិតជាលក្ខណៈអន្តរជាតិ ៕