ថៃប្រាប់អាមេរិក ៖ បើឱកាសហុចឲ្យ ថៃនឹងជួយនិយាយឲ្យកូរ៉េខាងជើងចូលតុចរចាវិញ

អន្តរជាតិ

ថៃប្រាប់អាមេរិក ៖ បើឱកាសហុចឲ្យ ថៃនឹងជួយនិយាយឲ្យកូរ៉េខាងជើងចូលតុចរចាវិញ

16, Dec 2017 , 3:39 pm

រូបភាព

ដោយ:

រដ្ឋាភិបាលក្រុងបាងកក បានទទូចឲ្យរដ្ឋាភិបាលក្រុងវ៉ាស៊ីនតោនប្រកាន់យកជំហរបើកចំហលើវិបត្តិឧបទ្វីបកូរ៉េ ។ ជាមួយគ្នានេះ ក្រុងបាងកក ក៏បានបញ្ជាក់ដែរថា ថៃ បានត្រៀមខ្លួនរួចជាស្រេចក្នុងការធ្វើជាអ្នកសម្របសម្រួល និងបញ្ចុះបញ្ចូលឲ្យក្រុងព្យុងយ៉ាងត្រឡប់ទៅរកតុចរចាជាមួយនឹងក្រុងវ៉ាស៊ីនតោនវិញ ។

លោកឧត្តមសេនីយ៍ Wallop Rohsanoh អគ្គលេខាធិការក្រុមប្រឹក្សាសន្តិសុខជាតិថៃ នៅថ្ងៃ១៤ ធ្នូ បានជួបពិភាក្សាជាមួយនឹងបេសកជនពិសេសអាមេរិក លោក Joseph Yun។ លោក Rohsanoh ក៏បានបញ្ជាក់ពីជំហររបស់ថៃយ៉ាងដូច្នេះថា៖«ថៃ បានត្រៀមខ្លួនរួចស្រេចហើយដើម្បីជួយនាំកូរ៉េខាងជើងឲ្យត្រលប់ទៅរកតុចរចាស្តីពីដំណោះស្រាយនៅឧបទ្វីបកូរ៉េ ប្រសិនបើឳកាសហុចឲ្យ។» នេះបើយោងតាមការចុះផ្សាយរបស់សារព័ត៌មានថៃ The Nation ។

គួរជម្រាបផងដែរថា បេសកជនអាមេរិក លោក Joseph Yun នៅសប្តាហ៍នេះ ដែរ ក៏បានបំពេញទស្សនកិច្ចទៅកាន់ប្រទេសសម្ព័ន្ធមិត្តអាមេរិកនៅអាស៊ីបូព៌ាជប៉ុនរួចហើយ ។ ដំណើរទស្សនកិច្ចរបស់លោកទាំងទៅកាន់ជប៉ុន និងថៃ មានគោលដៅដើម្បីរិះរកមធ្យោបាយក្នុងការដោះស្រាយវិបត្តិនៅឧបទ្វីបកូរ៉េ ក៏ដូចជាដើម្បីដាក់សម្ពាធកូរ៉េខាងជើ ដែលកំពុងតែបន្តកម្មវិធីអាវុធនុយក្លេអ៊ែរដោយគ្មានញញើតពីបម្រាមសហគមន៍អន្តរជាតិនោះ ។

អ្វីគួរកត់សម្គាល់នោះ មុនពេលនៃការលើកឡើងពីជំហររបស់ថៃក្នុងការបញ្ចុះបញ្ចូលឲ្យកូរ៉េខាងជើង ត្រឡប់មករកតុចចារវិញនោះ ប្រមុខរបបសឹកថៃ ក៏បានប្រកាសពីជំហររបស់ខ្លួនក្នុងការអនុវត្តយ៉ាងពេញលេញលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដូចទៅនឹងអ្វីដែលរដ្ឋាភិបាលអាមេរិក បានស្នើកន្លងមកឲ្យសម្ព័ន្ធមិត្តចាស់នៅអាស៊ីមួយនេះជួយដាក់គំនាបកូរ៉េខាងជើងផងនោះ ។

នៅមុនពីរថ្ងៃនៃការបំពេញទស្សនកិច្ចរបស់បេសកជនអាមេរិកទៅកាន់ថៃ លោកនាយករដ្ឋមន្ត្រីប្រាយុទ្ធ ចន្ទអូចា បានបញ្ជាក់យ៉ាងដូច្នេះថា៖ « ថៃធានាថា យើងគោរពតាមដំណោះស្រាយក្រុមប្រឹក្សាសន្តិសុខអង្គការសហប្រជាជាតិ។ វាធ្លាប់មានរបាយការណ៍ស្តីពីទូកកូរ៉េខាងជើង នៅក្នុងដែនទឹកយើង។ ប៉ុន្តែខ្ញុំបានដាក់បញ្ជា ហាមឃាត់យូរមកហើយ។ វាគ្មានឡើយពាណិជ្ជកម្ម ឬការជួញដូរទំនិញជាមួយគ្នានោះ» ៕