ជាតិ
កម្ពុជា ក្លាយជាប្រធានក្រុមដឹកនាំការងារទីក្រុងនិរន្តរភាពបរិស្ថានអាស៊ាន រូបភាពពីហ្វេសប៊ុកក្រសួងបរិស្ថាន
× ក្រុមការងារអាស៊ានស្តីពីទីក្រុងនិរន្តរភាពបរិស្ថាន បានរៀបចំកិច្ចប្រជុំបូកសរុបលទ្ធផលការងារ កម្មវិធីទីក្រុងគំរូនិរន្តរភាពបរិស្ថានអាស៊ាន និងពិនិត្យវាយតម្លៃលើទិសដៅកម្មវិធីការងារឆ្នាំ២០១៨ នៅក្រុងប៉ាតៃយ៉ា ប្រទេសថៃ ពីថ្ងៃទី១៤ដល់ទី១៦ ខែធ្នូ។ លោក វ៉ាន់ មុនីនាថ អគ្គលេខាធិការរងនៃក្រុមប្រឹក្សាជាតិអភិវឌ្ឍដោយចីរភាព (ក.ជ.អ.ច) និងជាប្រធានក្រុមការងារអាស៊ានស្តីពីទីក្រុងនិរន្តរភាពបរិស្ថានផង បានទៅចូលរួមកិច្ចប្រជុំនេះ។
តាមហ្វេសប៊ុកក្រសួងបរិស្ថាន កម្មវិធីនេះ ផ្តោតលើកម្មវិធីទីក្រុងឆ្នើមអាស៊ាន សម្រាប់គោលដៅអភិវឌ្ឍន៍ដោយចីរភាព (ASEAN SDGs Front Runner Cities Program) ដែលមានប្រទេសកម្ពុជា ឥណ្ឌូណេស៊ី ឡាវ ម៉ាឡេស៊ី ភូមា ហ្វីលីពីន ថៃ វៀតណាម អគ្គលេខាធិការដ្ឋានអាស៊ាន វិទ្យាស្ថានយុទ្ធសាស្ត្របរិស្ថានសកល និងក្រសួងបរិស្ថាន ជប៉ុនចូលរួម។
កិច្ចប្រជុំបានពិភាក្សាលើលក្ខណៈវិនិច្ឆ័យ ដំណើរការជ្រើសរើសបេក្ខភាពទីក្រុងឆ្នើម យន្តការទទួលខុសត្រូវរដ្ឋសមាជិក ផែនការ និងថវិកា រួមទាំងនីតិវិធី និងការឆ្លើយតបទៅនឹងគោលដៅអភិវឌ្ឍន៍ដោយចីរភាព។ ទន្ទឹមនឹងនេះ ក្រុមការងារអាស៊ាន ក៏បានឯកភាពលើទិសដៅកម្មវិធីការងារទីក្រុងឆ្នើម រយៈពេល២ឆ្នាំបន្តទៀត ពីឆ្នាំ២០១៨ ដល់២០១៩ ដែលគាំទ្រដោយរដ្ឋាភិបាលជប៉ុន។ នេះបើតាមហ្វេសប៊ុកក្រសួងបរិស្ថានដដែល ដោយបានបញ្ជាក់ទៀតថា កម្មវិធី នឹងត្រូវប្រកាសផ្លូវការ នៅក្នុងសន្និសីទជាន់ខ្ពស់អាស៊ីបូព៌ាស្តីពីទីក្រុងនិរន្តរភាព ដែលគ្រោងធ្វើនៅកម្ពុជា នាខែមីនា ឆ្នាំ២០១៨។
សូមបញ្ជាក់ថា កាលពីខែកញ្ញាកន្លងទៅ ខេត្តចំនួន២របស់កម្ពុជ គឺខេត្តពោធិ៍សាត់ និងកំពត បានទទួលពានរង្វាន់អាស៊ានផ្នែកនិរន្តរភាពបរិស្ថាន ដោយខេត្តកែបទទួលបានពានរង្វាន់ទីក្រុងនិរន្តរភាពបរិស្ថានអាស៊ាន ឯខេត្តពោធិ៍សាត់ទទួលបានពានរង្វាន់ផ្នែកនិរន្តរភាពទឹកស្អាត។ ការប្រគល់ពានរង្វាន់នេះ ធ្វើឡើងនៅប្រទេសព្រុយណេ ក្នុងកិច្ចប្រជុំរដ្ឋមន្ត្រីបរិស្ថានអាស៊ាន កាលពីខែ កញ្ញាកន្លងទៅ។ ខេត្តទាំង២នេះរបស់កម្ពុជា ត្រូវបានក្រុមការងារអាស៊ានទទួលបន្ទុកនិរន្តរភាពបរិស្ថាន ជ្រើសរើសសម្រាប់ប្រកួតប្រជែងសម្រាប់ពានរង្វាន់អាស៊ានផ្នែកនិរន្តរភាពបរិស្ថាន ជាមួយបណ្ដាទីក្រុងផ្សេងទៀតក្នុងតំបន់អាស៊ាន នាប្រជុំក្រុមការងារអាស៊ានទទួលបន្ទុកនិរន្តរភាពបរិស្ថានទីក្រុងលើកទី ១៥ ដែលរៀបចំអំឡុងខែមេសា នៅក្នុងខេត្តសៀមរាប៕
Tag:
បរិស្ថាន
ទីក្រុងនិរន្តរភាព
អាស៊ាន
© រក្សាសិទ្ធិដោយ thmeythmey.com