ជំងឺផ្ដាសាយបក្សីH5N1កើតលើសត្វ ផ្ទុះនៅកំពង់ចាម និងកំពង់ធំ ស្ថាប័នជំនាញប្រាប់ឲ្យពលរដ្ឋប្រយ័ត្ន

ជាតិ

ជំងឺផ្ដាសាយបក្សីH5N1កើតលើសត្វ ផ្ទុះនៅកំពង់ចាម និងកំពង់ធំ ស្ថាប័នជំនាញប្រាប់ឲ្យពលរដ្ឋប្រយ័ត្ន

17, Dec 2017 , 7:19 pm

រូបភាព

ដោយ:

នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល(CDC) ប្រាប់ឲ្យប្រជាពលរដ្ឋប្រុងប្រយ័ត្នខ្ពស់ ក្រោយមានផ្ទុះជំងឺផ្ដាសាយបក្សីH5N1 បានកើតជាបន្តបន្តាប់លើសត្វបក្សីនៅស្រុកព្រៃឈរ ខេត្តកំពង់ចាម និងស្រុកស្ទោង ខេត្តកំពង់ធំ។ ស្ថាប័នជំនាញមួយនេះ ក៏បានគូសបញ្ជាក់ដែរថា ទោះជាមានករណីផ្ទុះទាំងពីរនេះក៏ដោយ ក៏ជំងឺផ្តាសាយបក្សី H5N1ពុំទាន់រកឃើញមានឆ្លងលើមនុស្សឡើយទេ ហើយមន្ត្រីជំនាញក្រសួងសុខាភិបាល កំពុងបន្តតាមស្ថានភាពជំងឺយ៉ាងយកចិត្តទុកដាក់បំផុត។

CDC បានប្រាប់ឲ្យប្រជាពលរដ្ឋប្រុងប្រយ័ត្នខ្ពស់ អំពីការចម្លងជំងឺនេះ ជាពិសេសក្នុងពិធីបុណ្យផ្សេងដែលនឹងឈានមកដល់ក្នុងពេលឆាប់ៗ ដោយកុំយកមាន់ ទា ឬសត្វបក្សីឈឺឬងាប់ មករៀបចំជាអាហារ ឬលក់បន្ត ត្រូវអនុវត្តអនាម័យក្នុងការ បោចរោម និង ចំអិនជាប់ជានិច្ច។

តាម CDC បុគ្គលដែលមានអាការ គ្រុនក្តៅលើសពី ៣៨.៥ អង្សាសេ ព្រមគ្នានឹងរោគសញ្ញាក្អក ឬឈឺក ឬដកដង្ហើមហត់ និងមានប្រវត្តិប៉ះពាល់ជាមួយបក្សីឈឺ ឬងាប់ ក្នុងកំឡុងពេល៧ថ្ងៃមុនចេញរោគសញ្ញា ចាត់ទុកថាជាករណីសង្ស័យ។ ករណីនេះ ត្រូវបញ្ចូនអ្នកជំងឺទៅមណ្ឌលសុខភាព ឬមន្ទីរពេទ្យជិតបំផុត ដើម្បីព្យាបាល។ «យើងមានឱសថសម្រាប់ព្យាបាលជំងឺនេះ»។ នេះជាការបន្ថែមរបស់ CDCមុននឹងបញ្ជាក់ពីលេខទូរសព្ទបន្ទាប់រាយការណ៍ករណីនេះ គឺលេខ ១១៥ ។

សូមបញ្ជាក់ថា ចាប់តាំងពីឆ្នាំ២០០៥ ដល់២០១៤ កម្ពុជាធ្លាប់កើតមានជំងឺផ្តាសាយបក្សី ដែលបានឆ្លងពីសត្វបក្សី មកមនុស្សចំនួន៥៦ករណី ក្នុងនោះ ៣៧ករណីបានស្លាប់៕