ជាតិ
សភា រង់ចាំជួយដោះបន្ទុកអតីតមន្ត្រីCNRP ដែលមិនទាន់ប្រកាសទ្រព្យសម្បត្តិតាមច្បាប់ACU
× ភ្នំពេញ៖ រដ្ឋសភា កំពុងរៀបចំក្រុមការងារជួយសម្រួលបញ្ហាប្រកាសទ្រព្យសម្បត្តិ និងបំណុលរបស់អតីតមន្ត្រីគណបក្សសង្គ្រោះជាតិ ដើម្បីបញ្ចៀសការទទួលទោសតាមច្បាប់ប្រឆាំងអំពើពុករលួយ។ អង្គភាពប្រឆាំងអំពើពុករលួយ(ACU) ទើបតែទទួលបានឯកសារប្រកាសទ្រព្យសម្បត្តិពីសមាជិកថ្នាក់ជាតិ និងថ្នាក់ក្រោមជាតិអតីតគណបក្សសង្គ្រោះជាតិ២៤៦នាក់ប៉ុណ្ណោះ ក្នុងរយៈពេល៣០ថ្ងៃកន្លងមក។
ថ្នាក់ដឹកនាំរបស់អតីតគណបក្សសង្គ្រោះជាតិ២៤៦នាក់ ដែលបានប្រកាសទ្រព្យសម្បត្តិ និងបំណុល តាមរយៈរដ្ឋសភា ឬនៅក្នុងអង្គភាពប្រឆាំងអំពើពុករលួយនោះ មានតំណាងរាស្ត្រ៣៣រូប សមាជិកក្រុមប្រឹក្សាតាមមូលដ្ឋាន២១០រូប និងសមាជិកគណៈកម្មាធិការជាតិរៀបចំការបោះឆ្នោតកូតាពីខាងអតីតគណបក្សសង្គ្រោះជាតិ៣រូប។ នេះបើតាមរយៈលិខិតចុះថ្ងៃទី ១៥ ធ្នូ របស់អង្គភាពប្រឆាំងអំពើពុករលួយ ដែលបានកំណត់រយៈពេល៣០ថ្ងៃ ។
សារព័ត៌មានថ្មីៗ មិនទាន់អាចទាក់ទងមន្ត្រីអង្គភាពប្រឆាំងអំពើពុករលួយ ដើម្បីសុំការអត្ថាធិប្បាយបន្ថែមលើករណីប្រកាសទ្រព្យសម្បត្តិរបស់អតីតមន្ត្រីគណបក្សសង្គ្រោះជាតិឡើយ។
បើតាមមាត្រា ៣៨ ស្តីពី បទមិនប្រកាសទ្រព្យសម្បត្តិ និងបំណុល ចែងថា ជនណាដែលមិនបានប្រកាសទ្រព្យសម្បត្តិ និងបំណុល ឬបានប្រកាសមិនត្រឹមត្រូវនូវទ្រព្យសម្បត្តិរបស់ខ្លួន ទៅតាមបទប្បញ្ញត្តិ ដែលមានចែងក្នុងមាត្រា១៧ (សមាសភាពដែលត្រូវប្រកាសទ្រព្យសម្បត្តិ និងបំណុល) មាត្រា១៨ (របបប្រកាសទ្រព្យសម្បត្តិ និងបំណុល) និងមាត្រា១៩ (ជនផ្សេងទៀតដែលត្រូវប្រកាសទ្រព្យសម្បត្តិនិងបំណុល) នៃច្បាប់នេះ ត្រូវផ្ដន្ទាទោសដាក់ពន្ធនាគារពី១ខែ ទៅ១ឆ្នាំ និងពិន័យជាប្រាក់ពី១០០,០០០រៀល ទៅ ២,០០០,០០០រៀល ហើយត្រូវបង្ខំឲ្យប្រកាសទ្រព្យសម្បត្តិជូនអង្គភាពប្រឆាំងអំពើពុករលួយ។ ក្នុងករណីរឹងរូសមិនព្រមប្រកាសទ្រព្យសម្បត្តិទៀត ត្រូវផ្តន្ទាទោសទ្វេរដង…។
ជុំវិញបញ្ហានេះរដ្ឋសភា កំពុងរៀបចំក្រុមការងារជួយសម្រួលបញ្ហាប្រកាសទ្រព្យសម្បត្តិ និងបំណុលរបស់អតីតមន្ត្រីគណបក្សសង្គ្រោះជាតិ ដើម្បីបញ្ចៀសការទទួលទោសតាមច្បាប់ប្រឆាំងអំពើពុករលួយ។ លោក ឡេង ប៉េងឡុង អ្នកនាំពាក្យរដ្ឋសភា បាននិយាយថា រដ្ឋសភាកំពុងទាក់ទងទៅអតីតមន្ត្រីគណបក្សសង្គ្រោះជាតិទាំងនោះ មកប្រកាសទ្រព្យសម្បត្តិឲ្យទាន់ពេលវេលាហើយ ប៉ុន្តែមិនទាន់មានការឆ្លើយតបឡើយ។
ថ្លែងប្រាប់សារព័ត៌មានថ្មីៗ លោក ឡេង ប៉េងឡុង បានបញ្ជាក់ដូច្នេះថា៖«ខាងរដ្ឋសភាមានក្រុមស្នូលមួយ ដើម្បីធ្វើជាបង្គោលចាំជួយដោះស្រាយ និងសម្រួលដល់អតីតមន្ត្រីគណបក្សសង្គ្រោះជាតិ ដែលកំពុងរស់នៅក្រៅប្រទេសផ្ញើឯកសារពាក់ព័ន្ធពីទ្រព្យសម្បត្តិ និងបំណុលមករដ្ឋសភា ដើម្បីសម្របសម្រួលជាមួយខាងអង្គភាពប្រឆាំងអំពើពុករលួយលើបញ្ហានេះដែរ ប៉ុន្តែមិនឃើញមានតបវិញសោះ។ ហើយចំពោះតំណាងរាស្ត្រទាំង៥៥នាក់នេះ ប្រកាសខ្លះ៣៣នាក់ហើយ តាមការស្នើរបស់ACUដែលតម្រូវឲ្យប្រកាសនេះ»។
មន្ត្រី និងសមាជិកអតីតគណបក្សសង្គ្រោះជាតិ ដែលអង្គភាពប្រឆាំងអំពើពុករលួយ ស្នើឲ្យប្រកាសទ្រព្យសម្បត្តិនេះ គឺស្ថិតនៅក្នុងបញ្ជីឯកសាររបស់ACU តាមរយៈការស្រង់តាមឋានៈ និងតួនាទី ដែលតែងតាំងដោយព្រះរាជក្រឹត្យ និងអនុក្រឹត្យប៉ុណ្ណោះ។ នេះបើតាមលោក ឡេង ប៉េងឡុង ។
គួរបញ្ជាក់ថា អតីតមន្ត្រីគណបក្សសង្គ្រោះជាតិជាច្រើនរូប កំពុងរស់នៅក្រៅប្រទេស ក្រោយពីគណបក្សត្រូវបានតុលាការរំលាយ តាមបណ្ដឹងក្រសួងមហាផ្ទៃ កាលពីថ្ងៃទី១៦ វិច្ឆិកា។ ការចាកចេញទៅក្រៅប្រទេសនេះ ធ្វើឡើងតាមការអំពាវនាវរបស់លោក សម រង្ស៊ី អតីតប្រធានគណបក្សសង្គ្រោះជាតិ៕
© រក្សាសិទ្ធិដោយ thmeythmey.com