ជាតិ
សេដ្ឋកិច្ច
រដ្ឋាភិបាលនឹងបង្កើតធនាគារ ដែលមានទឹកប្រាក់១០០លានដុល្លារ ជួយSMEដោះស្រាយបញ្ហាសេដ្ឋកិច្ច
× ភ្នំពេញ៖ រដ្ឋាភិបាល នឹងបង្កើតធនាគារធុនតូច និងមធ្យមមួយ សម្រាប់ជួយដោះស្រាយបញ្ហាប្រជាពលរដ្ឋ។ សម្ដេចនាយករដ្ឋមន្ត្រី ហ៊ុន សែន បាននិយាយថា រដ្ឋាភិបាលនឹងទម្លាក់ថវិកា១០០លានដុល្លារក្នុងធនាគារនេះ ដើម្បីទុកបំពេញតម្រូវការសហគ្រាសធុនតូច និងមធ្យម របស់ប្រជាពលរដ្ឋ ដែលជួបប្រទះបញ្ហាខ្វះដើមទុនសម្រាប់ប្រកបរបអ្វីមួយ។ ជាពិសេសការលើកម្ពស់ដល់ការផលិតក្នុងស្រុក និងជំរុញឲ្យមានការនាំចេញផលិតផលទៅប្រកួតប្រជែងក្រៅប្រទេស ។
សូមស្តាប់សំឡេង៖
ថ្លែងក្នុងពិធីសំណេះសំណាល ជាមួយកម្មករជាង១ម៉ឺននាក់ នៅរោងចក្រតំបន់ទួលពង្រ ខណ្ឌពោធិ៍សែនជ័យ នៅថ្ងៃទី២០ ធ្នូ នាយករដ្ឋមន្ត្រី បានបញ្ជាក់ដូច្នេះថា «ថ្ងៃនេះខ្ញុំចង់បញ្ចេញសារថា រាជរដ្ឋាភិបាល នឹងបង្កើតធនាគារធុនតូចនិងមធ្យម ដែលគ្រោងប្រើដើមទុន១០០លានដុល្លារអាមេរិក មិនទាន់មានជាលាយលក្ខណ៍អក្សរទេ តែនាយករដ្ឋមន្ត្រីនិយាយបែបនេះហើយ មិនអាចដកថយបានទេ…។ សារនេះក៏ចង់បញ្ជាក់ថា ពេលខាងមុខយើងនឹងខិតខំបង្កើតមុខរបរ បង្កើតការងារធ្វើកាន់តែច្រើនទៀតសម្រាប់ពលរដ្ឋរបស់យើង ជំរុញការផលិតនៅក្នុងស្រុកដើម្បីបម្រើសេចក្តីត្រូវការរបស់យើង និងជំរុញការនាំចេញរបស់យើង» ។
ប្រមុខរដ្ឋាភិបាល សង្កត់ធ្ងន់ថា ការរៀបចំឲ្យមានធនាគារធុនតូច និងមធ្យមនេះ ក្នុងទិសដៅដោះស្រាយបញ្ហាកសិកម្ម និងឧស្សាហកម្មជាដើម។ ជាពិសេសកាត់បន្ថយការពឹងពាក់ទៅលើការជួយរបស់បរទេស។
ជុំវិញការលើកឡើងខាងលើ អ្នកជំនាញខាងសេដ្ឋកិច្ច និងកសិកម្ម ក៏ធ្លាប់ស្នើឲ្យរដ្ឋាភិបាល រៀបចំគោលនយោបាយទម្លាក់កញ្ចប់ថវិកា ក្នុងខ្ទង់ចំណាយណាមួយ ដើម្បីត្រៀមដោះស្រាយបញ្ហាប្រជាពលរដ្ឋ តាមរយៈការលើកកម្ពស់វិស័យកសិកម្ម និងឧស្សហកម្ម ដែលជាចរន្តសេដ្ឋកិច្ចសំខាន់ សម្រាប់ទ្រទ្រង់ផលិតផលក្នុងស្រុក និងការនាំចេញទៅក្រៅប្រទេសនេះ៕
© រក្សាសិទ្ធិដោយ thmeythmey.com