អ្នកជំនួញ ប្រាប់ឲ្យយកចិត្តទុកដាក់លើ«Team Building»ដើម្បីដំណើរការអាជីវកម្ម

ជាតិ

សេដ្ឋកិច្ច

អ្នកជំនួញ ប្រាប់ឲ្យយកចិត្តទុកដាក់លើ«Team Building»ដើម្បីដំណើរការអាជីវកម្ម

24, Dec 2017 , 8:59 am

រូបភាព

ដោយ:

ភ្នំពេញ៖ សហគ្រិនបីរូប មកពីក្រុមហ៊ុនផ្សេងគ្នា ដែលមានបទពិសោធច្រើនឆ្នាំក្នុងវិស័យមុខជំនួញ បានទាញការចាប់អារម្មណ៍ ដល់អ្នកចង់ឈានជើងចូលក្នុងអាជីវកម្ម ឲ្យយកចិត្តទុកដាក់ខ្លាំង លើការកសាងក្រុមការងារ ដែលគន្លឹះនៃភាពជោគជ័យរបស់ក្រុមហ៊ុនមួយ។ សហគ្រិនទាំងបីរូបនេះ រួមមាន លោក គុយ វ៉ាត អគ្គនាយកក្រុមហ៊ុន Vtrust Group, លោក សុខ ពុទ្ធីវុធ អគ្គនាយក្រុមហ៊ុនសោម៉ាគ្រុប និង លោក សោម សម្បត្តិ នាយកប្រតិបត្តិក្រុមហ៊ុនខេមផេន ដែលបានថ្លែងនៅក្នុងកម្មវិធីភាក្សាមួយស្ដីពីគន្លឹះក្នុងការគ្រប់គ្រងពហុអាជីវកម្ម នៅថ្ងៃទី១៨ខែធ្នូ។

លោក គុយ វ៉ាត មានប្រសាសន៍ថា ថ្នាក់ដឹកនាំ ត្រូវចេះបណ្ដុះទស្សនវិស័យដល់បុគ្គលិក ដែលស្ថិតក្រោមការដឹកនាំរបស់ខ្លួន។ លោកបន្ថែមថា អ្នកដឹកនាំក្រុម ត្រូវរកឲ្យឃើញចំណុចខ្វះខាតរបស់សមាជិក និងជួយបំពេញបន្ថែមចំណុចខ្សោយទាំងនោះ។ ក្រៅពីនេះ លោក គុយ វ៉ាត បានសង្កត់ធ្ងន់លើការផ្ទេរអំណាចពីថ្នាក់លើទៅថ្នាក់ក្រោម ដែលអ្នកជំនួញត្រូវដឹងពីកម្រិតធំតូច នៃក្រុមហ៊ុនរបស់ខ្លួន និងរៀបចំរចនាសម្ព័ន្ធ រួមទាំងការបែកចែកអំណាចឲ្យបានត្រឹមត្រូវ។
សូមស្តាប់ប្រសាសន៍បន្ថែមរបស់លោក គុយ វ៉ាត៖

រីឯលោក សុខ ពុទ្ធីវុធ ថ្លែងថា ក្រុមការងារខ្លាំង ជួបឧបសគ្គកាន់តែធំ នាំឲ្យក្រុមកាន់តែខ្លាំង ខណៈដែលក្រុមការងារខ្សោយ នឹងបរាជ័យនៅមុខបញ្ហា។ ប៉ុន្តែលោកជំរុញឲ្យអ្នកជំនួញចេះដកបទពិសោធពីការបរាជ័យនៃការរៀបចំក្រុមការងារ។ លោកបន្ថែមថា បញ្ហាក្នុងក្រុមតែងកើតមាន ប៉ុន្តែគេត្រូវរកឲ្យឃើញនូវបញ្ហាទាំងនោះ និងរួមគ្នាដោះស្រាយ ជាជាងលាក់កំបាំងបញ្ហាដែលអាចនាំទៅដល់ការបែកបាក់ក្រុម។ លោកបន្តថា រចនាសម្ព័ន្ធនៃផ្នែកនីមួយៗ ទៅជួយផ្នែកមួយទៀតនៃក្រុមហ៊ុន គឺជាការល្អ តែអ្នកដែលទៅជួយគេ ត្រូវគ្រប់គ្រងការងាររបស់ខ្លួនឲ្យបានជាមុនសិន។ លោក សុខ ពុទ្ធីវុធ ប្រាប់ទៀតថា ការដឹកនាំត្រូវមានការទុកចិត្តលើមនុស្ស តែទន្ទឹមនឹងនេះគេត្រូវមានប្រព័ន្ធដឹកនាំច្បាស់លាស់ ទើបអាចស្វែងយល់ និងដោះស្រាយបញ្ហាបានល្អ។
ប្រសាសន៍លោក សុខ ពុទ្ធីវុធ ៖

ជាមួយគ្នានេះសហគ្រិនមួយរូបទៀត គឺលោក សោម សម្បត្តិ ក៏ចាត់ទុកក្រុមការងារខ្លាំងជាចំណុចស្នូលរបស់អាជីវកម្មផងដែរ។ លោកប្រាប់ថា រូបលោកផ្ទាល់បានចំណាយពេលជាច្រើនឆ្នាំដើម្បីអភិវឌ្ឍន៍ខ្លួន ព្រោះការកៀងគរមនុស្សមានសមត្ថភាព ឲ្យមកធ្វើការជាមួយខ្លួន ចាំបាច់អ្នកកៀងគរនោះត្រូវតែជាមានសមត្ថភាពផងដែរ។