ជាតិ
បុណ្យណូអែលគេធ្វើឡើងដើម្បីអ្វី?
×
ពិធីបុណ្យណូអែល ឬភាសាអង់គ្លេសថា Christmas គឺជាពិធីសាសនាដ៏ធំមួយដើម្បីអបអរការជួបជុំគ្នារបស់អ្នករបស់អ្នកគោរព សាសនាគ្រិស្ត និងដើម្បីរំលឹកដល់ថ្ងៃដែលព្រះយេស៊ូប្រសូត តែគេមិនដឹងច្បាស់ថ្ងៃដែលទ្រង់ប្រសូតនោះទេ។ ពិធីបុណ្យនេះគេតែងតែធ្វើឡើងជារៀងរាល់ឆ្នាំចំថ្ងៃទី២៥ ខែធ្នូ និងចាប់ផ្ដើមប្រារព្ធដំបូងនៅឆ្នាំ៣៥៤នៃគ្រិស្ដសករាជ។
Christmas មានពាក្យដើមថាមកពីភាសាអង់គ្លេសបុរាណថា Christes Maesse ឬ Christ’s Mass ដែលជាភាសាខ្មែរមានន័យថា «ពិធីអបអរសាទរការជួបជុំគ្នារវាងអ្នកគោរពសាសនាគ្រិស្ត»។ កាលពីសតវត្សទី៤ គេកំណត់យកថ្ងៃទី១៧ ដល់ថ្ងៃទី២១ ខែធ្នូ ដើម្បីប្រារព្ធពិធីនេះ តែក្រោយមកវិហារសាសនាគ្រិស្ដទាំងអស់បានសម្រេចយកថ្ងៃទី២៥ ខែធ្នូវិញ។ លើកលែងតែជនជាតិអាមិននៀទេ ដែលគេប្រារព្ធពិធីនេះនៅថ្ងៃទី៦ ខែមករា ដែលគេហៅថាថ្ងៃលាងបាបឲ្យព្រះយេស៊ូ។
បុណ្យណូអែលជាថ្ងៃដែលប្រជាជនអាមេរិក និងអង់គ្លេសជឿថា ជាថ្ងៃដែលមនុស្សទាំងអស់ទទួលបានអំណោយពីលោកតាសាន់ក្លស (Santa Claus)។ នៅពេលដែលគេជួបជុំគ្នា គេតែងតែជូនអំណោយទៅគ្នា ច្រៀងចម្រៀង Christmasរួមគ្នា ប្រើពាក្យជូនពរទៅគ្នា និងពិសារអាហារប្រកបដោយភាពរីករាយជាមួយគ្នា។
នៅអាមេរិក និងអង់គ្លេស គេមានជំនឿថាការបួងសួងរបស់គេនឹងទៅដល់លោកតាសាន់ក្លស ដែលពេលដែលគេសរសេរសំបុណ្យហើយបោះចូលក្នុងភ្នក់ភ្លើង។ នៅប្រទេសអង់គ្លេសមានជំនឿដាច់ដោយឡែកមួយទៀតនៃការយកស្រោមជើងទៅព្យួរនៅក្រោមបំពុងបង្ហុយផ្សែង ដើម្បីចាំទទួលកាក់មាសដែលលោកតាសាន់ក្លសទម្លាក់ឲ្យ។ ចំណែកឯការព្យួរស្លឹកឈើពណ៌បៃតង គឺដើម្បីលើកទឹកចិត្តដល់រដូវធ្លាក់ទឹកកក និងរំលឹកថារដូវផ្ការីកនិងជិតចូលមកដល់ហើយ របស់ប្រជាជនអង់គ្លេស។
ក្រៅពីប្រពៃណីទាំងអស់នេះក៏មានប្រពៃណីជាច្រើនទៀតទៅតាមតំបន់ និងប្រទេសដែលគោរពគ្រិស្ដសាសនា ដែលមានដូចជាការថើបគ្នានៅក្រោមដើមបញ្ញើក្អែក របស់ប្រទេសអាល្លឺម៉ង់ថា ការញ៉ាំបង្អែម Wassail ដែលមានន័យថា «សុខភាពល្អ» របស់ជនជាតិអង់គ្លេស និងការពិសារក្បាលជ្រូកព្រៃនៅក្នុងពិធីជប់លៀងថ្ងៃបុណ្យណូអែលដែលមានប្រភពពីប្រជាជន ដាណឺម៉ាក ស៊ុយអែត និងន័រវេស។
បច្ចុប្បន្ននេះមិនត្រឹមតែប្រជាជនដែលគោរពសាសនាគ្រិស្ដទេដែលប្រារព្ធពិធីនេះ សូម្បីតែប្រទេសមួយចំនួនទៀតដែលមិនគោរពសាសនានេះក៏ចូលរួមប្រារព្ធដែរ ដោយគេយល់ថាការជូនកាដូរ និងពិសារអាហារពេលល្ងាចជាមួយគ្នាក្នុងឱកាសនេះ គឺដើម្បីបង្កើមភាពស្និតស្នាល។ ជាក់ស្ដែងនៅកម្ពុជាជាពិសេសយុវវ័យបានចូលរួមពិធីនេះយ៉ាងផុសភុល ហើយនៅតាមក្រុមហ៊ុនជាច្រើនក៏មានការដាក់បង្ហាញដើម Christmas មានភ្លើងបំភ្លឺភ្លឺផ្លេក និងមានប្រអប់កាដូរយ៉ាងស្រស់ស្អាតជាច្រើនផងដែរ៕
© រក្សាសិទ្ធិដោយ thmeythmey.com