ជាតិ
សេដ្ឋកិច្ច
បារាំងផ្ដល់ជំនួយជាង១៣លានដុល្លារ សង់រោងចក្រទឹកស្អាតទី២នៅខេត្តសៀមរាប លោក Philippe Chatignoux តំណាងស្ថានទូតបារាំងប្រចាំកម្ពុជា
× សៀមរាប៖ រដ្ឋាភិបាលបារាំងបានផ្ដល់ជំនួយជាង ១៣លានដុល្លារ សម្រាប់សាងសង់រោងចក្រទឹកស្អាតទី២ នៅខេត្តសៀមរាប។ សម្រាប់បារាំង ជំនួយលើកគម្រោងថ្មីនៃរោងចក្រទឹកស្អាតនៅតំបន់អង្គរនេះ ជានិមិត្តរូបនៃទំនាក់ទំនង និងកិច្ចសហប្រតិបត្តិការរវាងបារាំង-កម្ពុជា។ រីឯរដ្ឋាភិបាលកម្ពុជា ចាត់ទុកថា វានេះជាសមិទ្ធផលថ្មីមួយទៀត ក្នុងវិស័យផ្គត់ផ្គង់ទឹកស្អាត ដើម្បីបម្រើដល់វិស័យទេសចរណ៍លើតម្រូវការប្រើប្រាស់ទឹកស្អាតប្រចាំថ្ងៃ។
រដ្ឋាភិបាលបារាំងបានផ្ដល់ជំនួយជាង ១៣លានដុល្លារ សម្រាប់សាងសង់រោងចក្រទឹកស្អាតទី២ នៅខេត្តសៀមរាប ក្នុងការធានាសុវត្ថិភាព សុខភាពជូនប្រជាពលរដ្ឋ។ នេះបើតាមទីភ្នាក់ងារសារព័ត៌មានកម្ពុជា (AKP) ដកស្រង់សម្ដីរដ្ឋមន្ត្រីក្រសួងឧស្សាហកម្ម និងសិប្បកម្មលោក ចម ប្រសិទ្ធ រោងចក្រនេះ ជាសមិទ្ធផលថ្មីមួយទៀត របស់រដ្ឋាភិបាលកម្ពុជា ក្នុងវិស័យផ្គត់ផ្គង់ទឹកស្អាត ដើម្បីបម្រើដល់វិស័យទេសចរណ៍លើតម្រូវការប្រើប្រាស់ទឹកស្អាតប្រចាំថ្ងៃ។
លោក ចម ប្រសិទ្ធ បានគូសបញ្ជាក់គោលនយោបាយរបស់រាជរដ្ឋាភិបាលកម្ពុជានៅឆ្នាំ២០២៥ ដែលកំណត់ថា ពលរដ្ឋរស់នៅតាមទីក្រុង ទីប្រជុំជនទូទាំងប្រទេស នឹងទទួលបានការផ្គត់ផ្គង់ទឹកស្អាត ១០០ភាគរយ ក្នុងនោះចំនួន៩០ភាគរយទទួលបានសេវាកម្មទឹកស្អាតតាមបំពង់សម្រាប់ប្រើប្រាស់ រីឯ១០ភាគរយទៀត ទទួលបានទឹកស្អាតពីប្រភពផ្សេងៗ។ សម្រាប់តម្លៃទឹកស្អាត រដ្ឋាភិបាលបានផ្តល់លទ្ធភាពឲ្យពលរដ្ឋ ចូលរួមពិភាក្សាកំណត់តម្លៃលក់ទឹកស្អាត ក្នុងមូលដ្ឋានរបស់ខ្លួននិងផ្តល់អាទិភាព បញ្ចុះតម្លៃប្រើប្រាស់ទឹកសម្រាប់ពលរដ្ឋក្រីក្រផងដែរ។
លោក Philippe Chatignoux តំណាងស្ថានទូតបារាំងប្រចាំកម្ពុជា បានលើកឡើងថា គម្រោងថ្មីនៃរោងចក្រទឹកស្អាតនៅតំបន់អង្គរ ជានិមិត្តរូបនៃទំនាក់ទំនង និងកិច្ចសហប្រតិបត្តិការរវាងបារាំង-កម្ពុជា។ បន្ថែមលើនេះ កិច្ចសហប្រតិបត្តិការនៃការផលិតនិងចែកចាយទឹកស្អាតនេះ រយៈពេល២៥ឆ្នាំមកហើយ។
តំណាងស្ថានទូតបារាំងរូបនេះ បន្ថែមថា មកដល់បច្ចុប្បន្ននេះ បារាំងបានផ្តល់ហិរញ្ញប្បទាន សម្រាប់ដំណើរការនៅកម្ពុជា ដូចជាកន្លែងប្រមូលផ្តុំក្នុងរាជធានីភ្នំពេញ និងគម្រោងទី២ នៅខេត្តសៀមរាប។ ការផ្ដល់ហិរញ្ញប្បទាននេះ ធ្វើឡើងដើម្បីឆ្លើយតបទៅនឹងកំណើននៃតម្រូវការក្នុងតំបន់មួយ ដែលនឹងទទួលបានការយកចិត្តទុកដាក់។ លោក Philippe Chatignoux អះអាងថា ប្រទេសបារាំងបាន និងកំពុងបន្តខិតខំដើម្បីគាំពារ និងការលើកកម្ពស់តម្លៃនៃបេតិកភណ្ឌអង្គរ រួមចំណែកក្នុងការអភិវឌ្ឍទីក្រុងនៅក្នុង ខេត្តសៀមរាប ប្រកបដោយនិរន្តរភាព។ នេះបើតាមទីភ្នាក់ងារសារព័ត៌មានកម្ពុជា (AKP) ដដែល៕
Tag:
ទឹកស្អាត
ចម ប្រសិទ្ធ
បារាំង
សៀមរាប
© រក្សាសិទ្ធិដោយ thmeythmey.com