ជាតិ
សង្គមជាតិ
លោក ថោង ខុន៖ ឆ្នេរសមុទ្រកម្ពុជាអាចទទួលទេសចរអន្តរជាតិ ២លាននាក់នៅឆ្នាំ២០២០
× ឆ្នេរសមុទ្រប្រទេសកម្ពុជាត្រូវបានព្យាករថា អាចនឹងទទួលបានភ្ញៀវទេសចរអន្តរជាតិចំនួន២លាននាក់ និងជាតិជិត៤លាននាក់នៅឆ្នាំ២០២០។ នេះបើតាមការលើកឡើងរបស់លោករដ្ឋមន្ត្រីក្រសួងទេសចរណ៍ នៅថ្ងៃទី២៣ ខែធ្នូ ក្នុងពិធីបើកកម្មវិធីបុណ្យសមុទ្រ។
តាមការព្យាករណ៍របស់ក្រសួងទេសចរណ៍កម្ពុជាបានជឿជាក់ថាឆ្នេរសមុទ្រទាំង៤ របស់ប្រទេសកម្ពុជា នឹងទទួលបានភ្ញៀវទេសចរណ៍អន្តរជាតិចំនួន២លាននាក់ និងភ្ញៀវជាតិចំនួន៤លាននាក់នៅឆ្នាំ២០២០។ មិនតែប៉ុណ្ណោះចំនួនភ្ញៀវទេសចរអន្តរជាតិអាចនឹងកើនឡើងដល់ ៣លាននាក់ ភ្ញៀវជាតិ ៦លាននាក់នៅឆ្នាំ២០៣០។ នេះបើតាមការលើកឡើងរបស់រដ្ឋមន្ត្រីក្រសួងទេសចរណ៍លោកថោង ខុន នៅថ្ងៃទី២៣ ខែធ្នូ ក្នុងពិធីបុណ្យសមុទ្រនៅខេត្តកែប។
ដោយសារតែចំនួនភ្ញៀវទេសចរកាន់តែកើនឡើងបែបនេះ លោករដ្ឋមន្ត្រីបានអំពាវនាវឲ្យពាណិជ្ជករទាំងអស់ ជាពិសេសនៅតំបន់ឆ្នេរត្រូវយកចិត្តទុកដាក់ខ្ពស់លើអាជីវកម្មរបស់ខ្លួនទាំងអនាម័យ និងសោភ័ណ្ឌភាព។ លើសពីនេះលោកក៏អំពាវនាវឲ្យមានការអភិវឌ្ឍតំបន់ឆ្នេរប្រកបដោយនិរន្តរភាព និងការទទួលខុសត្រូវក្នុងការអភិរក្សធនធានធម្មជាតិ។ លោកបន្តថាការអភិវឌ្ឍ និងថែរក្សាបរិស្ថាននេះក៏ទាមទារឲ្យប្រជាជនយល់ដឹងពីសារសំខាន់របស់ឆ្នេរសមុទ្រផងដែរ។
លោក ថោង ខុន បន្ថែមទៀតថា តំបន់ឆ្នេរទាំងអស់ត្រូវរៀបចំឲ្យមានផែនការមេអភិវឌ្ឍន៍ និងតម្រូវឲ្យមានអ្នកអភិវឌ្ឍន៍តំបន់ឆ្នេរសមុទ្រច្បាស់លាស់ ហើយត្រូវធានាថាមានភោជនីយដ្ឋានស្អាត សេវាកម្មល្អ និងគ្មានសំរាម។
បើតាមយុទ្ធសាស្ត្ររបស់រាជរដ្ឋាភិបាល ខេត្តកែបគឺជាគោលដៅទេសចរណ៍តំបន់ខ្ពស់ និងប្រណីត ខណៈដែលខេត្តព្រះសីហនុ គឺជាគោលដៅទេសចរណ៍សម្រាកលំហែរ និងជាបណ្ដុំសម្រាប់តំបន់ឆ្នេរសមុទ្រកម្ពុជា ឯខេត្តកំពតជាគោលដៅទេសចរណ៍បេតិកភណ្ឌវប្បធម៌ និងកសិទេសចរណ៍តំបន់ឆ្នេរ ហើយខេត្តកោះកុងជាគោលដៅអេកូរទេសចរណ៍តំបន់ឆ្នេរ។
ដើម្បីទាក់ទាញភ្ញៀវទេសចរឲ្យមកកម្សាន្តនៅតំបន់ឆ្នេរ ប្រទេសកម្ពុជាបានរៀបចំកម្មវិធីបុណ្យសមុទ្រនេះរយៈពេល៦ឆ្នាំមកហើយ ដោយតម្រូវឲ្យមានការផ្លាស់វេនគ្នានៃខេត្តឆ្នេរសមុទ្រទាំង៤របស់កម្ពុជា៕
Tag:
សង្គម
ភ្ញៀវទេសចរ
បុណ្យសមុទ្រ
© រក្សាសិទ្ធិដោយ thmeythmey.com