កីឡាជាតិ
ជាតិ
កីឡា១១ប្រភេទដែលបង្ហាញខ្លួនក្នុងបុណ្យសមុទ្របានការចាប់អារម្មណ៍ខ្លាំងពីមហាជន
× កីឡាទាំង១១ប្រភេទដែលគណៈកម្មាធិការជាតិអូឡាំពិកកម្ពុជា(NOCC)នាំយកទៅប្រកួតនិងសម្តែងដើម្បីអបពិធីបុណ្យសមុទ្រនៅខេត្តកែបចាប់ពីថ្ងៃទី២២-២៤ ខែធ្នូ ឆ្នាំ២០១៧ បានបញ្ចប់ដោយរលូន និងបានការគាំទ្រខ្លាំងពីមហាជន។ ក្រៅពីសកម្មភាពកីឡា ការតាំងស្តង់ពិព័រណ៍ផលិតផល មហោស្របចំណីអាហារ និងការសម្តែងសិល្បៈអន្តរជាតិក៏ព្រឹត្តទៅដោយរលូនផងដែរ។
ការប្រកួតនិងសម្តែងប្រភេទកីឡាលើទឹក លើឆ្នេរ និងគោកដែលក្រសួងទេសចរណ៍ និង NOCC ចាត់ទុកជាសកម្មភាពស្នូលនៃពិធីបុណ្យសមុទ្រលើកទី៦នៅខេត្តកែប បានបញ្ចប់សកម្មភាពរបស់ខ្លួនយ៉ាងជោគជ័យកាលពីថ្ងៃទី២៤ ខែធ្នូ ឆ្នាំ២០១៧ ដែលជាថ្ងៃចុងក្រោយនៃពិធីបុណ្យនេះ។ មិនត្រឹមបង្កើតភាពសប្បាយរីករាយ និងភាពអ៊អូរដល់ភ្ញៀវទេសចរនោះទេ តែការប្រកួតនិងសម្តែងកីឡាទាំង១១ប្រភេទក្នុងបុណ្យសមុទ្រឆ្នាំនេះទទួលបានការគាំទ្រច្រើនពីភ្ញៀវទេសចរជាតិ និងអន្តរជាតិទៀតផង។
«រាល់ព្រឹត្តិការណ៍កីឡាយើងប្រព្រឹត្តទៅដោយសុវត្ថិភាព ហើយមានកីឡាជំនាញ និងមហាជនមួយចំនួនបង្កភាពងាយស្រួលដល់ការចូលរួមរបស់មហាជន យើងអាចវាយតម្លៃជាចុងក្រោយថា សកម្មភាពកីឡាបានបំពេញតួនាទីដោយរលូន និងធ្វើឲ្យព្រឹត្តិការណ៍បុណ្យសមុទ្រលើកទី៦នៅខេត្តមានភាពអ៊ូអរ និងបានការចាប់អារម្មណ៍ខ្លាំងពីភ្ញៀវទេសចរជាតិ និងអន្តរជាតិ»។ នេះជាការលើកឡើងរបស់លោក វ៉ាត់ ចំរើន អគ្គលេខាធិការ NOCC។
កីឡាមហាជនរួមមានរត់ប្រណាំងចម្ងាយ៥គីឡូម៉ែត្រ និង៣គីឡូម៉ែត្រ ចំបាប់ឆ្នេរខ្សាច់ និងប្រដាល់គុនខ្មែរ និងគុនចម្រុះទទួលបានការចាប់អារម្មណ៍ច្រើនជាងគេពីមហាជន។ ចំណែកកីឡាថាសហោះ, Water Ski និងកីឡាជិះក្តាររំអិល ដែលជាប្រភេទកីឡាថ្មីបានធ្វើឲ្យមានការចាប់អារម្មណ៍ និងប្លែកភ្នែកសម្រាប់មហាជនផងដែរ។ លើសពីនេះកីឡាជំនាញរួមមានទ្រីយ៉ាត្លុង ទូកក្តោង និងប្រណាំងកង់ដែលលើកយកការប្រកួតជើងឯកថ្នាក់ជាតិរបស់ខ្លួនទៅខេត្តកែប បានប្រែក្លាយពីភាពស្ងប់ស្ងាត់នៅពេលព្រឹកនៃពិធីបុណ្យសមុទ្រឲ្យមានសភាពអ៊ូអរ។
ព្រឹត្តិការណ៍កីឡាទាំងអស់អាចប្រព្រឹត្តទៅដោយជោគជ័យបាន ក៏ព្រោះតែមានការសហការរបស់អាជ្ញាធរពាក់ព័ន្ធគ្រប់ជាន់ថ្នាក់ ជាពិសេសការអំណោយផលផ្នែកហេដ្ឋារចនាសម្ព័ន្ធនៅតាមមាត់ឆ្នេរ តាមរយៈការសាងសង់បង្គោលភ្លើងដោយបំពាក់ភ្លើងហ្វា ដើម្បីបំភ្លឺនៅតាមឆ្នេរកែបដែលបង្កភាពងាយស្រួលដល់ការប្រកួតកីឡានៅពេលយប់។
«ប្រជាពលរដ្ឋអាចឃើញសកម្មភាពកីឡាប្លែកៗ និងកីឡាបែបប្រពៃណីរបស់យើង។ កីឡាលើទឹករួមមានទូកក្តោង និងកីឡា Water Ski ទទួលបានការចូលរួមលេងច្រើនពីមហាជនផងដែរ។ អ្វីដែលយើងមើលឃើញកីឡាបីប្រភេទទាំងលើទឹក លើឆ្នេរ និងលើគោកបានស្រូបការយកចិត្តទុកដាក់ និងទាក់ទាញពីមហាជន ជាពិសេសបានបង្កភាពសប្បាយរីករាយពិតប្រាកដជូនភ្ញៀវទេសចរណ៍រយៈពេល៣នៃពិធីបុណ្យសមុទ្រ»។ នេះជាសម្តីរបស់លោក វ៉ាត់ ចំរើន ដែលបង្ហាញពីការចាប់អារម្មណ៍របស់មហាជនចំពោះសកម្មភពកីឡា។
កីឡាទាំង១១ប្រភេទនោះរួមមានរត់ប្រណាំង, ប្រណាំងកង់, ទ្រីយ៉ាត្លុង, ទូកក្តោង, ចំបាប់ឆ្នេរខ្សាច់, បាល់ទះឆ្នេរខ្សាច់, ប្រដាល់គុនខ្មែរចម្រុះ, ថាសហោះ, ជិះក្តាររំអិល, រាំអន្តរជាតិ និងកីឡា Water Ski។ កីឡាទាំងនេះបានបញ្ចប់សកម្មភាពប្រកួតនិងសម្តែងទាំងស្រុងនៅល្ងាចថ្ងៃទី២៤ ខែធ្នូ ឆ្នាំ២០១៧ ដែលជាថ្ងៃបញ្ចប់នៃពិធីបុណ្យសមុទ្រលើកទី៦ដែលខេត្តកែបធ្វើជាម្ចាស់ផ្ទះ។ នៅឆ្នាំបន្ទាប់ខេត្តកោះកុងនឹងធ្វើជាម្ចាស់ផ្ទះនៃពិធីបុណ្យនេះ ហើយវាក៏ជាលើកទី២ផងដែរសម្រាប់ខេត្តមួយនេះ។
ក្រៅពីសកម្មភាពកីឡា ពិធីបុណ្យសមុទ្រដែលធ្វើឡើងក្រោមប្រធានបទ«ឆ្នេរសមុទ្របៃតង អនាគត គឺបច្ចុប្បន្ន»ក៏មានការតាំងស្តង់ពិព័រណ៍ផលិតផល និងមហោស្របចំណីអាហារអន្តរជាតិរវាងកម្ពុជា ថៃ ឡាវ វៀតណាម ឥណ្ឌូណេស៊ី និងឥណ្ឌាផងដែរ។ លើសពីនេះមានការប្រគំតន្ត្រីរបស់ស្ថានីយទូរទស្សន៍បាយ័ន និងការសម្តែងសិល្បៈអន្តរជាតិរបស់ក្រុមសិល្បៈកម្ពុជា ថៃ ឥណ្ឌា វៀតណាម និងឥណ្ឌូណេស៊ី រួមទាំងទស្សនីយភាពជាច្រើនទៀត៕
Tag:
វ៉ាត់ ចំរើន
បុណ្យសមុទ្រ
ខេត្តកែប
© រក្សាសិទ្ធិដោយ thmeythmey.com