ជាតិ
លោក ឱម យិនទៀង៖ «អំពើពុករលួយនៅអាមេរិក ធ្ងន់ធ្ងរជាងកម្ពុជា»
× ភ្នំពេញ៖ លោក ឱម យិនទៀង ប្រធានអង្គភាពប្រឆាំងអំពើពុករលួយ (ACU) បានអះអាងថា សហអាមេរិក មានអំពើពុករលួយច្រើនជាងកម្ពុជា។ លោក និយាយដូច្នេះថា៖«អំពើពុករលួយនៅប្រទេសណាក៏មានដែរ។ បើអាមេរិក ធ្ងន់ធ្ងរជាងយើងទៀត»។
សូមស្តាប់សំឡេងលោក លោក ឱម យិនទៀង
ការអះអាងរបស់លោក ឱម យិនទៀង ខាងលើ ធ្វើឡើងនៅក្នុងសិក្ខាសាលាស្តីពី «អ្នកសារព័ត៌មាន និងការប្រយុទ្ធប្រឆាំងអំពើពុករលួយ» ដែលរៀបចំឡើងនៅថ្ងៃទី២៥ ខែធ្នូ ឆ្នាំ២0១៧នេះ។ លោក បន្តថា ក្រុមការងារមួយ ដែលស្ថិតនៅក្រោមអនុសញ្ញាប្រយុទ្ធប្រឆាំងអំពើពុករលួយរបស់អង្គការសហប្រជាជាតិ (UNCAC) បានវាយតម្លៃខ្ពស់មកលើប្រទេសកម្ពុជា ថាមានចណុចល្អជាង ៩0ភាគរយឯណោះ ទាក់ទងការប្រឆាំងនឹងអំពើពុករលួយ។ លោក បញ្ជាក់ថា មានតែ UNCAC ប៉ុណ្ណោះ ដែលមានលក្ខណជាអន្តរជាតិ និងមានយន្តការច្បាស់លាស់ ក្នុងការពិនិត្យ និងវាយតម្លៃលើប្រទេសជាសមាជិកនីមួយៗ ថាមានអំពើពុករលួយកម្រិតណា។
ប្រធានអង្គភាពប្រឆាំងអំពើពុករលួយរូបនេះ មិនគាំទ្រអង្គការតម្លាភាពអន្តរជាតិនោះទេ ដែល តែងតែដាក់ពន្ទុនិងចំណាត់ថ្នាក់ឲ្យកម្ពុជា ជារៀងរាល់ឆ្នាំ ពាក់ព័ន្ធនឹងអំពើពុករលួយ។ សម្រាប់លោក ឱម យិនទៀង អង្គការតម្លាភាពអន្តរជាតិ មិនមែនជាអង្គការ ដែលមានលក្ខណៈជាអន្តរជាតិក្នុងការសិក្សាពីអំពើពុករលួយឡើយ៕
© រក្សាសិទ្ធិដោយ thmeythmey.com