អន្តរជាតិ
ត្រាំ ថា ជំហរចិនលើវិបត្តិកូរ៉េខាងជើងមានឥទ្ធិពលដល់នយោបាយពាណិជ្ជកម្មអាមេរិក
× ប្រធានាធិបតីអាមេរិក ដូណាល់ ត្រាំ កំពុងអាក់អន់ចិត្តនឹងចិនយ៉ាងខ្លាំង បន្ទាប់ពីមានសេចក្ដីរាយការណ៍ថា ចិនបានអនុញ្ញាតឲ្យកប៉ាល់របស់ខ្លួនដឹកប្រេងទៅឲ្យកប៉ាល់របស់កូរ៉េខាងជើង ដែលជាទង្វើបំពានដំណោះស្រាយរបស់ក្រុមប្រឹក្សាសន្តិសុខ។ លោក ត្រាំ បញ្ជាក់ថា ជំហររបស់ចិនលើសំណុំរឿងនុយក្លេអ៊ែរកូរ៉េខាងជើង មានឥទ្ធិពលដល់គោលនយោបាយពាណិជ្ជកម្មរបស់អាមេរិក ខណៈអាមេរិកធ្វើមិនដឹងមិនឮរឿងឱនភាពពាណិជ្ជកម្មជាមួយចិនដើម្បីដោះស្រាយបញ្ហានេះ។
ក្នុងកិច្ចសម្ភាសជាមួយសារព័ត៌មាន The New York Times លោកប្រធានាធិបតី ដូណាល់ ត្រាំ បានរៀបរាប់ពីទំនាក់ទំនងរវាងគោលនយោបាយពាណិជ្ជកម្មអាមេរិកជាមួយចិន ទៅនឹងជំហររបស់ចិនក្នុងការដោះស្រាយវិបត្តិនុយក្លេអ៊ែររបស់កូរ៉េខាងជើង។ លោក ត្រាំ និយាយថា អាមេរិកមានជំហរទន់ភ្លន់ដាក់ចិនយូរមកហើយ ទោះជាអាមេរិកត្រូវប្រឈមមុខទំហំឱនភាពពាណិជ្ជកម្មដ៏ធំក្ដី ហើយរឿងសំខាន់ជាងពាណិជ្ជកម្ម គឺមានតែសង្គ្រាម។
ជុំវិញបញ្ហានេះ លោក ត្រាំ បញ្ជាក់ថា លោកមានជំហរតឹងរ៉ឹងដាក់ចិនលើរឿងពាណិជ្ជកម្មតាំងពីពេលឃោសនារកសំឡេងឆ្នោត។ អាមេរិកមានទំហំឱនភាពពាណិជ្ជកម្មជាមួយចិនយ៉ាងហោចណាស់៣៥០ពាន់លានដុល្លារ ហើយនេះមិនទាន់គិតលើវិស័យកម្មសិទ្ធិបញ្ហាដែលមានតម្លៃ៣០០ពាន់លានដុល្លារទៀតផង។ សម្រាប់លោក ត្រាំ ការខាតបង់ប៉ុណ្ណេះមិនមែនជាបញ្ហាឡើយឲ្យតែចិនជួយដោះស្រាយសំណុំរឿងនុយក្លេអ៊ែរកូរ៉េខាងជើង។
«ប្រសិនបើចិនជួយខ្ញុំក្នុងបញ្ហាកូរ៉េខាងជើង ខ្ញុំអាចមើលរឿងពាណិជ្ជកម្មក្នុងផ្លូវផ្សេងក្នុងរយៈពេលណាមួយបាន។ ហើយនេះជាអ្វីដែលខ្ញុំបាននិងកំពុងធ្វើ។ ប៉ុន្តែនៅពេលប្រេងហូរចូលកូរ៉េខាងជើងនោះ ខ្ញុំមិនសប្បាយចិត្តឡើយ»។ នេះជាការមិនពេញចិត្តរបស់លោក ត្រាំ ក្នុងកិច្ចសម្ភាសដដែល ក្រោយផ្កាយរណបអាមេរិកចាប់បានសកម្មភាពរបស់កប៉ាល់ចិនផ្ទេរប្រេងទៅឲ្យកប៉ាល់កូរ៉េខាងជើងក្នុងដែនទឹកអន្តរជាតិ។
សកម្មភាពរបស់កប៉ាល់ចិន គឺជាការបំពានដំណោះស្រាយក្រុមប្រឹក្សាសន្តិសុខលេខ២៣៧៥ អនុម័តខែកញ្ញា ដែលហាមសមាជិកអង្គការសហប្រជាជាតិទាំងអស់ពីការផ្ទេរទំនិញគ្រប់ប្រភេទពីកប៉ាល់មួយទៅកប៉ាល់របស់កូរ៉េខាងជើង។ ដោយឡែកដំណោះស្រាយលេខ២៣៩៧ ដែលទើបអនុម័តកាលពីសប្ដាហ៍មុន បានបើកដៃឲ្យរដ្ឋសមាជិកអាចរឹបអូស និងឆែកឆេរកប៉ាល់ទាំងឡាយដែលសង្ស័យថា ជាប់ពាក់ព័ន្ធសកម្មភាពខុសច្បាប់ជាមួយកូរ៉េខាងជើង។
ការមិនពេញចិត្តរបស់លោក ត្រាំ ពេលនេះ អាចជាសញ្ញាបង្ហាញពីការអស់ការអត់ធ្មត់របស់អាមេរិកចំពោះមុខចិនជុំវិញសំណុំរឿងនុយក្លេអ៊ែរកូរ៉េខាងជើងនេះ។ ការមិនអើពើ ឬក៏ចន្លោះប្រហោងរបស់ក្រុងប៉េកាំងក្នុងការដោះស្រាយបញ្ហានេះ អាចជំរុញឲ្យក្រុងវ៉ាស៊ីនតោនចាត់វិធានការឯកតោភាគីតែម្ដង ជាជាងយន្តការទ្វេភាគី ឬក៏ពហុភាគី។ នេះអាចជាសញ្ញាបង្ហាញដែរថា ទំនាក់ទំនងរវាងអាមេរិក និងចិន អាចរង្គោះរង្គើផងដែរ៕
Tag:
អាមេរិក
ចិន
កូរ៉េខាងជើង
ដូណាល់ ត្រាំ
© រក្សាសិទ្ធិដោយ thmeythmey.com