ជាតិ
បទយកការណ៍ / បទសម្ភាសន៍
យុវជនគួរផ្តើមគិតរឿងរៀបការនៅអាយុ២៥ឆ្នាំ តែកុំយកកូនភ្លាមឲ្យសោះ ព្រោះ...
× ភ្នំពេញ៖ លោក Christopher Lee អ្នកឯកទេសផ្នែកអភិវឌ្ឍន៍មនុស្ស យល់ស្របថាការជ្រើសរើសដៃគូជីវិតពិតជាសំខាន់ណាស់ ក្នុងជីវិតរស់នៅ ព្រោះការរើសដៃគូខុស នឹងធ្វើឲ្យមានវិប្បដិសារី និងមិនរីករាយពេញមួយជីវិត។ ជាស្ថាបនិកអង្គការHEDCអន្តរជាតិផង លោក Lee បន្ថែមថាការជ្រើសរើសដៃគូត្រឹមត្រូវ គឺការរើសដោយក្តីស្រឡាញ់ និងមានចរិតត្រូវគ្នា។ លោក Lee លើកទឹកចិត្តយុវជនបច្ចុប្បន្នឲ្យគិតគូររឿងរៀបការ ក្នុងអាយុចាប់ពី២៥ឆ្នាំទៅ ព្រោះវ័យនេះគឺជាវេលាស័ក្តិសម ប៉ុន្តែចូរកុំយកកូនភ្លាមៗ ក្រោមរៀបការ គឺត្រូវចំណាយពី១ឆ្នាំ ទៅ២ឆ្នាំទៀតសិន ស្វែងយល់ពីទំនាក់ទំនងរវាងប្តីប្រពន្ធ។
សូមអញ្ជើញអានបទសម្ភាស រវាងលោក ទីន សុខលីម អ្នកកាសែត នៃសារព័ត៌មានអេឡិចត្រូនិកថ្មីៗ និងលោក Christopher Lee អ្នកឯកទេសផ្នែកអភិវឌ្ឍន៍មនុស្ស ខាងក្រោម៖
លោក ទីន សុខលីម៖ តើលោកយល់បែបណា ចំពោះការជ្រើសរើសដៃគូជីវិតនាពេលបច្ចុប្បន្ន?
លោក Christopher Lee ៖ កាលពីមុន មនុស្សមានសេរីភាពតិចជាងបច្ចុប្បន្ន ហើយក្មេងស្រី មិនត្រូវបានអនុញ្ញាតឲ្យជួបមនុស្សប្រុសទេ។ ធម្មតាចាស់ៗជួបគ្នា ក៏ណែនាំកូនរបស់ពួកគាត់ថាគួរតែរៀបការជាមួយអ្នកណា ហើយកូនៗក៏ទទួលការផ្គូផ្គងបែបនេះ។ ប៉ុន្តែបច្ចុប្បន្នយុវវ័យមានសេរីភាពជាងមុន ហើយពួកគេមិនទទួលយកការចាប់គូរបស់ឪពុកម្តាយដែរ។ ការផ្គូផ្គងរបស់ឪពុកម្តាយកាលពីមុនក៏ត្រូវខ្លះដែរ ប៉ុន្តែបច្ចុប្បន្ន បើឪពុកម្តាយនៅតែធ្វើបែបនេះទៀត ភាគច្រើនគឺបរាជ័យ។ ការស្រាវជ្រាវមួយនៅប្រទេសអូស្ត្រាលីទៅលើអ្នកជំងឺ បានបង្ហាញថា ភាពសោកស្តាយបំផុតមុនពេលដែលពួកគេស្លាប់ ដោយសារពួកគេមិនបានរស់នៅជាមួយនឹងជីវិតខ្លួនឯងចង់។ នៅក្នុងន័យនេះ បើយើងមិនបានរស់នៅនឹងជីវិតខ្លួនឯងចង់បានទេ យើងនឹងមិនរីករាយទេ។
លោក ទីន សុខលីម៖ តើការជ្រើសរើសដៃគូជីវិត មានសារៈសំខាន់យ៉ាងដូចម្តេច?
លោក Christopher Lee ៖ សារៈសំខាន់បំផុត គឺសេចក្តីរីករាយ និងសុភមង្គលនៅក្នុងជីវិត។ ប្រសិនបើយើងរៀបការជាមួយអ្នកដែលយើងមិនស្រឡាញ់ នោះធ្វើឲ្យអាពាហ៍ពិពាហ៍ក្លាយជាកាតព្វកិច្ចទៅវិញ។ អាពាហ៍ពិពាហ៍ គួរតែសេចក្តីសោមនស្សនៅក្នុងជីវិត។ ពេលខ្លះគួរឲ្យអស់សំណើចដែរ នៅពេលដែលប្តីប្រពន្ធ រស់នៅជាមួយគ្នាក្នុងផ្ទះ ប៉ុន្តែហាក់បីដូចជាមនុស្សមិនដែលស្គាល់គ្នាសោះ។ សកម្មភាពនេះ មិនត្រឹមតែប៉ះពាល់ទំនាក់ទំនងរវាងប្តី និងប្រពន្ធប៉ុណ្ណោះទេ ប៉ុន្តែក៏ប៉ះទង្គិចអារម្មណ៍របស់កូនៗផងដែរ ព្រោះថាឪពុកម្តាយត្រូវស្រឡាញ់គ្នាទៅវិញទៅមក ដើម្បីជាគំរូដល់កូន។
លោក ទីន សុខលីម៖ តើធ្វើយ៉ាងដូចម្តេច ដើម្បីជ្រើសរើសដៃគូជីវិតឲ្យបានត្រឹមត្រូវ?
លោក Christopher Lee ៖ មានមធ្យោបាយមួយ ដើម្បីជ្រើសរើសដៃគូស្រករដែលត្រឹមត្រូវ គឺយើងត្រូវសួរខ្លួនឯងថា ហេតុអ្វីបានជាយើងត្រូវរស់នៅជាមួយគ្នាជាប្តីប្រពន្ធ? មូលហេតុមួយដែលធ្វើឲ្យមនុស្សអាចរស់នៅជាមួយគ្នាពេញមួយជីវិត គឺក្តីស្រឡាញ់។ ចូរកុំជ្រើសរើសដោយសារទ្រព្យសម្បត្តិ តួនាទី និងសុវត្ថិភាព។ ខ្ញុំផ្តាំទៅយុវជនថា ការរៀបការជាមួយគ្នាត្រូវមានមូលហេតុតែមួយគត់ គឺក្តីស្រឡាញ់ បើមិនដូច្នោះ យើងនឹងសោកស្តាយនៅក្នុងជីវិត។ បន្ទាប់មកត្រូវគិតពីចរិតលក្ខណៈ ព្រោះបញ្ហាលែងលះដែលធំបំផុតនៅក្នុងគ្រួសារ កើតចេញពីការផ្តើមរិះគន់រវាងគ្នានៃគូស្វាមីភរិយានោះ។ ត្រូវជ្រើសរើសមនុស្សដែលចិត្តល្អ ចេះអធ្យាស្រ័យចំពោះអ្នកដទៃ និងជឿជាក់លើខ្លួនឯង និងជាមនុស្សមិនស្តីបន្ទោស។
លោក ទីន សុខលីម៖ តើយើងគួរមានដៃគូជីវិត ពេលណាទើបល្អ?
លោក Christopher Lee ៖ យើងត្រូវយល់ថាខួរក្បាលរបស់មនុស្ស មានការអភិវឌ្ឍពេញលេញនៅអាយុ២៥ឆ្នាំ ហើយមនុស្សអាចសម្រេចចិត្តបានល្អនៅអាយុនេះ។ កាលពីជំនាន់មុន ឪពុកម្តាយជ្រើសរើសដៃគូជីវិតឲ្យកូន ហើយចង់ឲ្យកូនរៀបការលឿន ពិសេសកូនស្រី។ ប្រហែលជាគ្រានោះ កូនគាត់អាយុពី១៦ ទៅ១៨ឆ្នាំ ដែលសម្រេចចិត្តមិនបានល្អ ទើបឪពុកម្តាយសម្រេចជំនួស តែយុវជនបច្ចុប្បន្ន មិនសម្រេចចិត្តរៀបការលឿនទេ។ សម្រាប់គំនិតខ្ញុំផ្ទាល់ គួរតែអាយុ២៥ឆ្នាំជាឆ្នាំដែលល្អ ហើយក៏ពេលពួកគេចាប់ផ្តើមមានការងារធ្វើដែរ។ ជីវិតប្តីប្រពន្ធមានទំនាស់ជាច្រើន កើតឡើងពីហិរញ្ញវត្ថុ ហើយបើទោះជារៀបការនៅអាយុ២៥ឆ្នាំល្អក៏ពិតមែន ប៉ុន្តែកុំយកកូនភ្លាមឲ្យសោះ។ ពួកគេគួរចំណាយពេល សិក្សាពីគ្នា និងសាងទំនាក់ទំនងឲ្យល្អ ១ឆ្នាំ ឬ២ឆ្នាំសិន មុននឹងយកកូន។ បើយកកូនភ្លាម វានឹងធ្វើឲ្យប្តីប្រពន្ធមិនយល់គ្នាបានច្រើន។
លោក ទីន សុខលីម៖ មកដល់នាទីនេះ មានបុរសៗមួយចំនួនចង់បានដៃគូនារីជាមនុស្សត្រឹមត្រូវ និងនៅបរិសុទ្ធ ប៉ុន្តែពួកគាត់បែរជាមិនបានប្រតិបត្តិខ្លួនឲ្យត្រឹមត្រូវ ឬនៅបរិសុទ្ធដូចអ្វីដែលគាត់ចង់បានពីភាគីម្ខាងទៀត។ ហេតុអ្វី?
លោក Christopher Lee ៖ រឿងស្តង់ដាពីរជាន់នេះ មិនមែនមានតែបច្ចុប្បន្នទេ ពីមុនក៏អ៊ីចឹងដែរ គឺបុរសៗ មានស្រីខាងក្រៅ ហើយគាត់រំពឹងថាភរិយារបស់ខ្លួននោះ នឹងមានភាពបរិសុទ្ធ។ ប៉ុន្តែបច្ចុប្បន្ន បុរស និងនារីមានសិទ្ធិស្មើគ្នា ដូច្នេះពួកគេ គួរតែតោងទទួលយកថា ភរិយារបស់ពួកគេ ក៏មានស្តង់ដារពីរជាន់ដែរ។ សម្រាប់ខ្ញុំ បើស្រឡាញ់គ្នា ពួកគេគួរតែបំភ្លេចចោលអតីតកាល ហើយគិតពីអនាគតវិញ។ អតីកាលដែលកើតឡើង យើងមិនចាំបាច់រំឭកវាមកវិញទេ៕
Tag:
Christopher Lee
ដៃគូជីវិត
គូស្រករ
យុវជន
រៀបការ
HEDC
© រក្សាសិទ្ធិដោយ thmeythmey.com