អន្តរជាតិ
គីម ជុងអ៊ុន ថា អាមេរិកមិនវាយកូរ៉េខាងជើងទេ ព្រោះកូរ៉េខាងជើងមានមីស៊ីលបាញ់ដល់អាមេរិក
× មេដឹកនាំកំពូលកូរ៉េខាងជើង គីម ជុងអ៊ុន នៅថ្ងៃទី១ ខែមករា ឆ្នាំ២០១៨ បាននិយាយថា សង្គ្រាមនៅឧបទ្វីបកូរ៉េនឹងមិនកើតឡើងឡើយ ព្រោះអាមេរិកមិនហ៊ានវាយប្រហារកូរ៉េខាងជើងទេ។ អាមេរិកមិនហ៊ានដោយសារកូរ៉េខាងជើងមានមីស៊ីលអាចពាំក្បាលគ្រាប់នុយក្លេអ៊ែរ ដែលអាចបាញ់ដល់គ្រប់ផ្នែករបស់អាមេរិក។ សម្រាប់ឆ្នាំ២០១៨ លោក គីម ជុងអ៊ុន ក៏បានដាក់ផែនការផលិតអាវុធនុយក្លេអ៊ែរឲ្យបានច្រើនថែមទៀត។
នាឱកាសថ្លែងការណ៍អបអរឆ្នាំថ្មី ២០១៨ ប្រមុខដឹកនាំកូរ៉េខាងជើង គីម ជុងអ៊ុន បានរំឮកអាមេរិកពីអានុភាពយោធារបស់កូរ៉េខាងជើង ដែលមានសមត្ថភាពផលិតមីស៊ីលចម្ងាយឆ្ងាយ និងអាចបាញ់ដល់គ្រប់ទីតាំងទាំងអស់នៅលើទឹកដីអាមេរិក។ បើតាមលោក គីម ជុងអ៊ុន ការមានមីស៊ីលរបៀបនេះ នឹងជួយទប់ស្កាត់សង្គ្រាមនៅឧបទ្វីបកូរ៉េ ដ្បិតអាមេរិកញញើតមិនហ៊ានប្រកាសសង្គ្រាមជាមួយកូរ៉េខាងជើងទេ។
ក្នុងឆ្នាំ២០១៧ ក្រុងព្យុងយ៉ាងបានសាកល្បងមីស៊ីលបាលីស្ទិកជាច្រើនលើក និងបានសាកល្បងគ្រាប់បែកអ៊ីដ្រូសែនមួយគ្រាប់ក្នុងខែកញ្ញា ខណៈដែលសហគមន៍អន្តរជាតិថ្កោលទោស និងដាក់ទណ្ឌកម្មសឹងដកដង្ហើមិនរួចទៅហើយនោះ។ នៅក្នុងខែវិច្ឆិកា កូរ៉េខាងជើងក៏បានប្រកាសពីជោគជ័យក្នុងការសាកល្បងមីស៊ីលប្រភេទថ្មី Hwasong-15 ដែលអាចបាញ់ដល់ទឹកដីអាមេរិក ដែលរឿងនេះធ្វើឲ្យរដ្ឋបាលប្រធានាធិបតី ដូណាល់ ត្រាំ ជ្រួលច្រាលខ្លាំង។
ក្នុងសារអបរអរឆ្នាំថ្មី លោក គីម ជុងអ៊ុន បញ្ជាក់ថា ទឹកដីអាមេរិកទាំងមូលស្ថិតក្នុងរង្វង់ដែលនុយក្លេអ៊ែរកូរ៉េខាងជើងបាញ់ដល់ ហើយប៊ូតុងនុយក្លេអ៊ែរ គឺស្ថិតលើតុរបស់លោកជានិច្ច។ លោក គីម ចាត់ទុកសម្ដីរបស់ខ្លួន ជាការពិត មិនមែនជាការគំរាមកំហែងអ្វីឡើយ ឯនុយក្លេអ៊ែរប្រើ នៅពេលមានការគំរាមប៉ុណ្ណោះ។ លើសពីនេះ មេដឹកនាំវ័យក្មេងរូបនេះក៏បញ្ជាឲ្យផលិតក្បាលគ្រាប់នុយក្លេអ៊ែរ និងមីស៊ីលបាលីស្ទិកឲ្យបានច្រើនថែមទៀត។ នេះបើតាមការផ្សាយរបស់ទីភ្នាក់ងារព័ត៌មាន Yonhap ។
ទន្ទឹមគ្នានេះដែរ លោក គីម ជុងអ៊ុន ក៏បង្ហាញជំហរទន់ភ្លន់ដាក់កូរ៉េខាងត្បូង ដោយនិយាយថា ទ្វារសម្រាប់ការចរចានៅតែបើកចំហ។ មន្ត្រីមកពីកូរ៉េទាំងពីរនឹងជួបគ្នាឆាប់ៗនេះ ដើម្បីពិភាក្សាលើការចូលរួមក្នុងព្រឹត្តិការណ៍កីឡាអូឡាំពិករដូវរងាររបស់កូរ៉េខាងជើង ដែលរៀបចំនៅខែកុម្ភៈ ឆ្នាំ២០១៨ ។ លោក គីម ចាត់ទុកព្រឹត្តិការណ៍ពិភពលោកនេះ ជាឱកាសល្អសម្រាប់កូរ៉េទាំងពីរ ហើយលោកសង្ឃឹមថា ព្រឹត្តិការណ៍នេះនឹងធ្វើឡើងដោយជោគជ័យ។
ប្រធានាធិបតីកូរ៉េខាងត្បូង មូន ចេអ៊ីន ធ្លាប់លើកឡើងហើយថា វត្តមានរបស់កូរ៉េខាងជើងនឹងធានាបានពីសុវត្ថិភាពរបស់ព្រឹត្តិការណ៍អូឡាំពិកលើកនេះ ខណៈប្រទេសជាច្រើនបានបង្ហាញក្ដីបារម្ភថា កូរ៉េខាងជើងអាចអុកឡុកព្រឹត្តិការណ៍នេះមិនខានដូចជាការបាញ់មីស៊ីលជាដើមផង។ យ៉ាងណាមិញ គេមិណទាន់ច្បាស់ថា កូរ៉េខាងជើងនឹងបញ្ជូនប្រតិភូរបស់ខ្លួនចូលរួមកម្មវិធីនេះនៅឡើយទេ ឯការចរចារវាងកូរ៉េទាំងពីរក៏មិនទាន់ច្បាស់ដែរ៕
Tag:
អាមេរិក
កូរ៉េខាងជើង
គីម ជុងអ៊ុន
ដូណាល់ ត្រាំ
© រក្សាសិទ្ធិដោយ thmeythmey.com