ម៉ាក្រុងអំពាវនាវឲ្យប្រជាជនបារាំងពង្រឹងឯកភាពជាតិ និងប្តេជ្ញាពង្រឹងឥទ្ធិពលបារាំងឡើងវិញ

អន្តរជាតិ

ម៉ាក្រុងអំពាវនាវឲ្យប្រជាជនបារាំងពង្រឹងឯកភាពជាតិ និងប្តេជ្ញាពង្រឹងឥទ្ធិពលបារាំងឡើងវិញ

01, Jan 2018 , 9:59 pm

រូបភាព

ដោយ: ថ្មីៗ

ប្រធានាធិបតីបារាំងលោក អេម៉ានុយអែល ម៉ាក្រុង បានអំពាវនាវទៅកាន់ប្រជាជនបារាំងឲ្យកសាងស្មារតីរួបរួមនិងឯកភាពជាតិ ហើយលោកបានសន្យាជាថ្មីថា រដ្ឋាភិបាលលោកនឹងបន្តការកែទម្រង់ស្ថាប័នដើម្បីធានាឲ្យបាននូវការកសាងអំណាចនិងឥទ្ធិពលបារាំងឡើងវិញ។ មេដឹកនាំរូបនេះថ្លែងដូច្នេះក្នុងសុន្ទរកថារបស់ខ្លួនស្វាគមន៍ឆ្នាំថ្មី។

ពីវិមាន Elysee នៅថ្ងៃអាទិត្យមុនឆ្លងឆ្នាំ២០១៧ចូល២០១៨ ប្រធានាធិបតីបារាំងលោក អេម៉ានុយអែល ម៉ាក្រុង បានអំពាវនាវឲ្យប្រជាជនបារាំងគ្រប់ស្រទាប់វណ្ណៈរក្សាឯកភាពជាតិប្រឆាំងចលនាជាតិនិយមជ្រុល និងប្តេជ្ញាបន្តការកែទម្រង់របស់ខ្លួនកន្លងមកដើម្បីពង្រឹងអំណាចនិងឥទ្ធិពលនៃសង្គមបារាំងឡើងវិញ។

យោងតាមទីភ្នាក់ងារព័ត៌មាន AFP ប្រធានាធិបតីបារាំងវ័យ ៤០ឆ្នាំនេះបានថ្លែងដូច្នេះ៖« ការផ្លាស់ប្តូរដ៏គួរឲ្យកត់សម្គាល់នេះនឹងបន្តទៅមុខទៀតក្នុងកម្រិត ល្បឿន និងជំហានដូចគ្នានេះ។ ខ្ញុំសន្យាបន្តប្រឹងប្រែងបន្តការងារទៀតដោយសារអ្នកទាំងអស់គ្នាបោះឆ្នោតផ្តល់សេចក្តីទុកចិត្តដល់ខ្ញុំផ្ទាល់។

អេម៉ានុយអែល ម៉ាក្រុង ដែលទើបឡើងកាន់តំណែងខែឧសភាកន្លងមកនោះ បានសង្កត់ធ្ងន់ផងដែរថារដ្ឋបាលលោកនឹងបន្តផ្តោតការយកចិត្តទុកដាក់លើប្រជាជនដែលមិនត្រូវបានគេយកចិត្តទុកដាក់ឬជាជនរងគ្រោះនៃការលូតលាស់នៃសង្គម។ ដូច្នេះហើយ លោកនឹងបន្តអនុវត្តគោលនយោបាយគាំទ្រធុរកិច្ចដែលធានាបាននូវការបង្កើតការងារ និង គម្រោងថែទាំសង្គមដែលគ្របដណ្តប់លើវិស័យសុខាភិបាល និងលំនៅដ្ឋានសម្រាប់ប្រជាជនដែលគ្មានជម្រក និងប្រជាជនដែលត្រូវការជំនួយផងដែរ។

ដោយឡែក មេដឹកនាំវ័យក្មេងដែលមាននិន្នាការកណ្តាលនិយមនេះបានបន្តថា លោកនឹងធ្វើឲ្យបារាំងខ្លាំងជាមុន និងមានយុត្តិធម៌ជាងមុន ហើយលោកឆ្លៀតឱកាសអំពាវនាវឲ្យប្រជាជនបារាំងកសាងស្មារតីនៃការរួបរួម និងឯកភាពជាតិផងដែរនៅអនាគត។ លោក ម៉ាក្រុង ក៏បានទទូចឲ្យប្រជាជនបារាំង ក៏ដូចជាអឺរ៉ុបឲ្យបន្តប្រឆាំងចលនាជាតិនិយមជ្រុលដែលធ្វើឲ្យបារាំ និងអឺរ៉ុបបែកខ្ញែកក្នុងទន់ខ្សោយផងដែរ។

«អឺរ៉ុបល្អសម្រាប់បារាំង។ បារាំងមិនអាចទទួលជោគជ័យឡើយបើសិនជាមិនមានសហភាពអឺរ៉ុបដែលខ្លាំងនោះ។ យើងមិនអាចទោរទន់ចំពោះចលនាជាតិនិយមឡើយ។ ការបន្តសន្ទនារជាមួយមិត្តអាល្លឺម៉ង់ជារឿងចាំបាច់សម្រាប់ការលូតលាស់នៃអឺរ៉ុប»។