ត្រាំ គំរាមផ្ដាច់ជំនួយប៉ាគីស្ថាន ព្រោះយកលុយអាមេរិកតែមិនជួយកម្ចាត់ក្រុមភេរវករ

អន្តរជាតិ

ត្រាំ គំរាមផ្ដាច់ជំនួយប៉ាគីស្ថាន ព្រោះយកលុយអាមេរិកតែមិនជួយកម្ចាត់ក្រុមភេរវករ

02, Jan 2018 , 10:31 am

រូបភាព

ដោយ: តន ចាន់រិទ្ធារ៉ា

ប្រធានាធិបតីអាមេរិក ដូណាល់ ត្រាំ នៅថ្ងៃទី១ ខែមករា បានរិះគន់សម្ព័ន្ធមិត្តអាស៊ីខាងត្បូងរបស់ខ្លួន គឺប៉ាគីស្ថាន ដែលមិនបានជួយកម្ចាត់ក្រុមភេរវករអាល់ កៃដា អ្វីទេ ហើយបែរជាក្លាយជាឋានសួគ៌របស់ក្រុមភេរវករទៅទៀត។ លោក ត្រាំ ថែមទាំងគំរាមកាត់ជំនួយសម្រាប់ប៉ាគីស្ថានផងដែរ ព្រោះអាមេរិកមិនទទួលបានផលតបស្នងអ្វីសោះពីជំនួយរបស់ខ្លួន ក្រៅពីការកុហកបោកប្រាស់នោះ។ យ៉ាងណាក្ដី ប៉ាគីស្ថានបានទាត់ចោលការចោទប្រកាន់នេះ និងថា ខ្លួនប្រឹងប្រែងខ្លាំងណាស់។

សារទីមួយលើបណ្ដាញសង្គម Twitter សម្រាប់ឆ្នាំ២០១៨ មេដឹកនាំអាមេរិក ដូណាល់ ត្រាំ បានវាយប្រហារប៉ាគីស្ថាន ដែលលោកចាត់ទុកជាឋានសួគ៌លោកិយសម្រាប់ក្រុមភេរវករ។ លោក ត្រាំ បានចោទប៉ាគីស្ថានថា យកលុយជំនួយអាមេរិករាប់ពាន់លានដុល្លារ តែមិនជួយបោសសម្អាតក្រុមភេរវករអ្វីសោះ។ សារលើកនេះ គឺជាដាក់បន្ទុកថ្មីលើក្រុងអ៊ីស្លាម៉ាបាដ ដែលជាដៃគូអាមេរិកក្នុងតំបន់អាស៊ីខាងត្បូងសម្បូរដោយក្រុមភេរវកម្ម។

«អាមេរិកបានផ្ដល់ជំនួយឲ្យប៉ាគីស្ថានដោយមិនគិតអ្វីអស់ចំនួន៣៣ពាន់លានដុល្លារក្នុងរយៈពេលជាង១៥ឆ្នាំចុងក្រោយ តែពួកគេគ្មានផ្ដល់អ្វីឲ្យអាមេរិកវិញទេ មានតែការកុហកបោកប្រាស់ និងគិតថា មេដឹកនាំអាមេរិកជាមនុស្សភ្លីភ្លើ។ ពួកគេផ្ដល់ជម្រកសុវត្ថិភាពដល់ពួកភេរវករដែលអាមេរិកប្រមាញ់នៅអាហ្វហ្គានីស្ថាន»។ នេះជាសំណេររិះគន់លើបណ្ដាញសង្គម Twitter របស់លោក ត្រាំ នៅថ្ងៃទី១ ខែមករា។

កាលពីសប្ដាហ៍មុន សារព័ត៌មានអាមេរិកផ្សាយថា រដ្ឋបាលប្រធានាធិបតី ត្រាំ កំពុងពិចារណាដកជំនួយក្នុងទំហំទឹកប្រាក់២៥៥លានដុល្លារ ដែលត្រូវបានបង្កករួចស្រេចជុំវិញបរាជ័យរបស់ក្រុងអ៊ីស្លាម៉ាបាដក្នុងយុទ្ធនាការបង្ក្រាបក្រុមភេរវកម្មនៅប៉ាគីស្ថាន។ ដោយសាររឿងនេះ ទំនាក់ទំនងរវាងអាមេរិក និងប៉ាគីស្ថានកាន់តែល្អក់កករ ខណៈដែលលោក ត្រាំ បានវាយប្រហារសម្ព័ន្ធមិត្តខ្លួនជាបន្តបន្ទាប់។

យោងតាមទីភ្នាក់ងារព័ត៌មាន AFP ក្រោយការវាយប្រហាររបស់លោក ត្រាំ ក្រុងអ៊ីស្លាម៉ាបាដ ក៏ចេញ មុខបកស្រាយវីញ និងបានលើកឡើងពីគុណសម្បត្តិ របស់ខ្លួនដែលជួយទំនុកបម្រុងអាមេរិករហូត មក។ រដ្ឋមន្ត្រីការបរទេសប៉ាគីស្ថាន Khawaja Muhammad Asif បានឆ្លើយតបវិញថា លោក ត្រាំ គួរឲ្យជនជាតិអាមេរិកទទួលខុសត្រូវចំពោះបរាជ័យនៅអាហ្វហ្គានីស្ថាន ហើយជំនួយអម្បាលម៉ាន របស់អាមេរិក ត្រូវបានពិនិត្យត្រឹមត្រូវ ឯប៉ាគីស្ថានក៏បំពេញការងាររបស់ខ្លួនរួចរាល់ដែរ។

ចំណែកឯរដ្ឋមន្ត្រីការពារជាតិ Khurram Dastgir Khan ក៏បង្ហាញការមិនពេញចិត្តនឹងសម្ដីលោក ត្រាំ ដែរ។ លោកនិយាយថា ក្នុងនាមជាសម្ព័ន្ធមិត្តប្រឆាំងភេរវកម្ម ប៉ាគីស្ថានអនុញ្ញាតឲ្យអាមេរិកប្រើប្រាស់ធនធានរបស់ខ្លួនដោយសេរីមានដូចជាមូលដ្ឋានទ័ព ព័ត៌មានចារកម្ម ប្រព័ន្ធទំនាក់ទំនងផ្លូវគោក និងផ្លូវអាកាស ប៉ុន្តែអ្វីដែលប៉ាគីស្ថានទទួលបានត្រឡប់មកវិញ គឺសម្ដីទ្រគោះបោះបោក និងការមិនទុកចិត្តទៅវិញ៕