ក្រោយ គីម ជុងអ៊ុន បង្ហាញជំហរចរចា កូរ៉េខាងត្បូងស្នើជួបគ្នានៅសប្ដាហ៍ក្រោយ

អន្តរជាតិ

ក្រោយ គីម ជុងអ៊ុន បង្ហាញជំហរចរចា កូរ៉េខាងត្បូងស្នើជួបគ្នានៅសប្ដាហ៍ក្រោយ

02, Jan 2018 , 10:39 pm

រូបភាព

លោក Cho Myoung-gyon រដ្ឋមន្រ្តីបង្រួបបង្រួមកូរ៉េ (រូបភាព៖ AFP)

ដោយ: តន ចាន់រិទ្ធារ៉ា

កូរ៉េខាងត្បូងបានស្នើទៅកាន់កូរ៉េខាងជើងដើម្បីបើកកិច្ចប្រជុំមន្ត្រីជាន់ខ្ពស់នៅសប្ដាហ៍ក្រោយស្ដីពីវត្តមានរបស់កូរ៉េខាងជើងក្នុងព្រឹត្តិការណ៍កីឡាអូឡាំពិករដូវរងារឆ្នាំ២០១៨ ។ សំណើនេះធ្វើឡើងមួយថ្ងៃ ក្រោយមេដឹកនាំកំពូលកូរ៉េខាងជើង គីម ជុងអ៊ុន និយាយថា ក្រុងព្យុងយ៉ាងបើកទ្វារចរចាជានិច្ច និងមានបំណងបញ្ជូនប្រតិភូចូលរួមព្រឹត្តិការណ៍អន្តរជាតិដ៏ធំនេះ ដែលធ្វើឡើងក្នុងខែកុម្ភៈ។ ពេលនេះ កូរ៉េខាងត្បូងកំពុងរង់ចាំចម្លើយពីកូរ៉េខាងជើង។

ដោយរង់ចាំជាយូរមកហើយនោះ កូរ៉េខាងត្បូងបានផ្ដល់ចម្លើយភ្លាមៗ តបនឹងសំណើចរចារបស់មេដឹកនាំកូរ៉េខាងជើង គីម ជុងអ៊ុន ។ នៅថ្ងៃទី២ ខែមករា រដ្ឋមន្ត្រីក្រសួងបង្រួបបង្រួមកូរ៉េ Cho Myoung-gyon បានស្នើឲ្យមានជំនួបមន្ត្រីជាន់ខ្ពស់កូរ៉េទាំងពីរនៅថ្ងៃទី៩ ខែមករា នៅភូមិ Panmunjom នៃតំបន់ខណ្ឌចែកឧបទ្វីបកូរ៉េ។ ប្រធានបទសំខាន់នៃជំនួបនេះ គឺការចូលរួមក្នុងព្រឹត្តិការណ៍អូឡាំពិករដូវរងារនៅទីក្រុងព្យុងឆាង ខែក្រោយ។

លោក Cho Myoung-gyon បានប្រាប់អ្នកសារព័ត៌មានថា កូរ៉េខាងត្បូងសង្ឃឹមថា កូរ៉េទាំងពីរអាចអង្គុយចុះដើម្បីពិភាក្សាពីវត្តមានរបស់កូរ៉េខាងជើងក្នុងពិធីដ៏ធំនេះ ក៏ដូចជាជជែកគ្នាដោយស្មោះត្រង់ដើម្បីទំនាក់ទំនងអន្តរកូរ៉េ។ បើតាមទីភ្នាក់ងារព័ត៌មាន Yonhap រដ្ឋមន្ត្រីរូបនេះអះអាងថា ក្រុងសេអ៊ូលមានឆន្ទៈដើម្បីចរចចាជាមួយក្រុងព្យុងយ៉ាង មិនថានៅកន្លែងណា ពេលវេលាណា និងមានកិច្ចប្រជុំកម្រិតណាឡើយ។

សូមបញ្ជាក់ថា ក្នុងឱកាសថ្លែងសារឆ្នាំថ្មី មេដឹកនាំវ័យក្មេង គីម ជុងអ៊ុន បាននិយាយត្រង់ថា ព្យុងយ៉ាងប្រកាន់ជំហរចរចា និងចង់ចូលរួមព្រឹត្តិការណ៍អូឡាំពិកនៅកូរ៉េខាងត្បូង។ ការប្រកាសរបស់មេដឹកនាំកូរ៉េខាងជើង ទទួលបានការសារទរខ្លាំងពីសំណាក់កូរ៉េខាងត្បូង ព្រោះកូរ៉េខាងត្បូងចង់ឃើញវត្តមានកូរ៉េខាងជើងក្នុងព្រឹត្តិការណ៍ពិភពលោកនេះស្រាប់ផង។ វត្តមានរបស់ប្រតិភូកូរ៉េខាងជើង ជារឿងល្អ ព្រោះបង្ហាញថា អូឡាំពិកខែក្រោយមិនមានការគំរាមកំហែងឡើយ។

ក្នុងករណីកូរ៉េខាងជើងយល់ព្រមតាមសំណើកូរ៉េខាងត្បូងមែននោះ ជំនួបនៅសប្ដាហ៍ក្រោយដែលរំពឹងថាចូលរួមដោយអនុរដ្ឋមន្ត្រីមកពីកូរ៉េទាំងពីរ នឹងក្លាយជាជំនួបលើកដំបូង គិតចាប់តាំងពីខែធ្នូ ឆ្នាំ២០១៥ មក។ ទោះជាប្រធានសំខាន់ពេលនេះនឹងផ្ដោតលើព្រឹត្តិការណ៍កីឡាក្ដី ក្រុងសេអ៊ូលជឿជាក់ថា ជំនួបនេះនឹងបើកផ្លូវដល់ការចាប់ផ្ដើមឡើងវិញការចរចាអន្តរកូរ៉េ ដែលជាប់គាំងរាប់សិបឆ្នាំមកហើយនោះ។

គេមិនទាន់ដឹងទេថា កូរ៉េខាងជើងដាក់លក្ខខណ្ឌអ្វីមកចរចាឡើយ។ សម្រាប់ខាងសេអ៊ូលវិញ ហាក់ត្រៀមទទួលលក្ខខណ្ឌសមស្របណាមួយដើម្បីធានាថា កូរ៉េខាងជើងនឹងមានវត្តមាននៅទីក្រុងព្យុងយ៉ាងនៅខែក្រោយនេះ។ ដើម្បីឲ្យអូឡាំពិកឆ្នាំ២០១៨ ធ្វើដោយរលូន កូរ៉េខាងត្បូងកំពុងពិភាក្សាជាមួយអាមេរិកដើម្បីផ្អាកសមយុទ្ធយោធារួមគ្នាដ៏ធំសិន សំដៅបញ្ចៀសភាពតានតឹងនៅឧបទ្វីបកូរ៉េ តែមិនទាន់មានលទ្ធផលនៅឡើយ៕