ពីនេះ ពីនោះ
ត្រីក្រាយ ចាប់សត្វល្អិតដែលធ្វើសកម្មភាពនៅលើផ្ទៃទឹក នាពេលយប់ជាអាហារ
× ត្រីក្រាយ មានឈ្មោះវិទ្យាសាស្ត្រ (Chitala ornata) និងឈ្មោះជាភាសាអង់គ្លេស Clown featherback ជាត្រីទឹកសាបទន្លេមេគង្គ ដែលយើងអាចសម្គាល់វាបាន តាមរយៈចំណុចមូលខ្មៅ ៧ចំណុច ស្ថិតនៅក្បែរព្រុយពោះ តាមបណ្តោយដងខ្លួនផ្នែកខាងកន្ទុយ។ ត្រីក្រាយ មានប្រវែងដងខ្លួនអតិបរមា ១០០ ស.ម និងទម្ងន់ ៥គីឡូក្រាម។ វារស់នៅក្នុងទន្លេធំៗ និងមធ្យម ដែលមានទឹកហូរ និងជាពិសេសក្នុងអាងទឹកជ្រៅតាមដងទន្លេមេគង្គ និងទន្លេសាប។ ត្រីក្រាយ ជាប្រភេទអជ្ឈុប្បាតជន ស៊ីពពួកសត្វល្អិតដែលធ្វើសកម្មភាពនៅលើផ្ទៃទឹកនាពេលយប់ និងពពួកសត្វមានសម្បកដូចជាក្តាម កំពិសជាដើមជាអាហារ។ ត្រីក្រាយធ្វើចរាចរផ្លាស់ទីចូលទៅក្នុងតំបន់ព្រៃលិចទឹក ដូចជាបឹងទន្លេសាប ក្នុងអំឡុងពេលទឹកទន្លេមេគង្គចាប់ផ្តើមឡើង និងហូរឆ្លងកាត់ទន្លេសាប ចូលទៅក្នុងបឹងទន្លេសាប ចាប់ពីខែមិថុនា ដល់ខែតុលា។
ត្រីក្រាយជាប្រភេទត្រីពងដាក់ឲ្យតោងព្រៃលិចទឹក ឬផ្ទាំងថ្មក្នុងទឹក ទីដែលមានចរន្តទឹកនឹង ហើយទាំងញីទាំងឈ្មោលនៅការពារសម្បុកពងរបស់វា។ ត្រីក្រាយ ត្រូវបានគេកត់ត្រាចូលក្នុងបញ្ជីរក្រហម IUCN Red List (Least Concern) ក្នុងឆ្នាំ ២០១២ ជាប្រភេទត្រីមានការព្រួយបារម្ភតិចតួច ដែលនឹងឈានទៅផុតពូជ។ ការនេសាទហួសកម្រិតពីអតីតកាល និងទៅអនាគត ការបាត់បង់ និងការប្រែប្រួលទីជម្រកដោយសារការសាងសង់ទំបន់វារិអគ្គិសនី ទំនងជាបញ្ហាអវិជ្ជមាន ដែលបន្តប៉ះពាល់ដល់ជីវិតមច្ឆាប្រភេទនេះ។
(អត្ថបទដោយ Chhut Chheana រូបភាពដោយ Zeb Hogan / USAID Wonders of the Mekong).
© រក្សាសិទ្ធិដោយ thmeythmey.com