អន្តរជាតិ
អាមេរិកចង់ចូលរួមបើកូរ៉េទាំងពីរចរចារឿងនុយក្លេអ៊ែរ តែកូរ៉េខាងជើងព្រមានដើរចេញ មន្រ្តីកូរ៉េខាងជើងអង្គុយចរចាជាមួយសមភាគីកូរ៉េខាងត្បូង (រូបភាព៖ Xinhua)
× អាមេរិកបានស្វាគមន៍ការចរចាក៏កម្ររវាងកូរ៉េទាំងពីរនៅថ្ងៃទី៩ ខែមករា ដោយចាត់ទុកជាជំហានដំបូងក្នុងការដោះស្រាយវិបត្តិនុយក្លេអ៊ែររបស់កូរ៉េខាងជើង។ ប៉ុន្តែក្នុងការចរចានៅឯភូមិប៉ាន់មុនជុម តំណាងកូរ៉េខាងជើងបានប្រាប់សមភាគីកូរ៉េខាងត្បូងថា កម្មវិធីនុយក្លេអ៊ែររបស់ខ្លួនមិនមែនសម្រាប់ចរចាឡើយ ហើយអាវុធប្រល័យលោកនេះ គ្មានគោលដៅវាយប្រហារប្រទេសណាឡើយ ក្រៅពីអាមេរិកតែមួយគត់។
មន្ត្រីជាន់ខ្ពស់មកពីកូរ៉េខាងត្បូង និងកូរ៉េខាងជើង បានជួបពិភាក្សាគ្នាជាលើកដំបូងក្នុងពេលច្រើនជាងពីរឆ្នាំ នៅថ្ងៃទី៩ ខែមករា។ លទ្ធផលវិជ្ជមានជាច្រើនបានលេចជារូបរាងដូចជាការយល់ព្រមបញ្ជូនប្រតិភូ និងអត្តពលិកកូរ៉េខាងជើងទៅចូលរួមកីឡាអូឡាំពិករដូវរងារ និងការបើកប្រព័ន្ធទំនាក់ទំនងយោធាឡើងវិញជាដើម។ អាមេរិកសាទរចំពោះការចរចានេះ និងបង្ហាញបំណងចូលរួមចរចាដែរ បើសិនរបៀបវារៈនិយាយពីបញ្ហានុយក្លេអ៊ែរ។
លោក Steve Goldstein អ្នកនាំពាក្យក្រសួងការបរទេសអាមេរិកនិយាយថា ជំនួបរបស់កូរ៉េទាំងពីរគឺជាការវិវដ្តវិជ្ជមានមួយ និងជាដំណាក់កាលដំបូងដើម្បីឈានដល់ការរំសាយអាវុធនុយក្លេអ៊ែរពីឧបទ្វីបកូរ៉េ ហើយអាមេរិកចង់ឲ្យការពិភាក្សារួមបញ្ចូលកម្មវិធីនុយក្លេអ៊ែររបស់កូរ៉េខាងជើងផង។ ប៉ុន្តែដូចដឹងស្រាប់ កូរ៉េខាងជើងមិនចរចាជាដាច់ខាត ហើយមានជំហររឹងរូសខ្លាំងពាក់ព័ន្ធប្រធានបទនុយក្លេអ៊ែររបស់ខ្លួន។
តាមពិតទៅ ក្នុងការចរចានៅឯភូមិប៉ាន់មុនជុម កូរ៉េខាងត្បូងក៏បានស្នើឲ្យមានការចរចាស្ដីពីនុយក្លេអ៊ែរផងដែរ ប៉ុន្តែត្រូវកូរ៉េខាងជើងជំទាស់ ដោយព្រមានថា ការនិយាយពីរឿងនុយក្លេអ៊ែរពេលនេះ នឹងធ្វើឲ្យជំនួបដ៏កម្រក្លាយជាអសារបង់មិនខាន។ លោក Ri Son Gwon ប្រធានប្រតិភូកូរ៉េខាងជើងបញ្ជាក់ថា អាវុធគ្រប់យ៉ាង រាប់ទាំងមីស៊ីលបាលីស្ទិក គ្រាប់នុយក្លេអ៊ែរ គ្រាប់អ៊ីដ្រូសែន គឺទុកបាញ់អាមេរិកតែមួយគត់ មិនមែនបងប្អូនកូរ៉េ ឬចិន ឬរុស្ស៊ីឡើយ។
«កម្មវិធីនុយក្លេអ៊ែរនេះមិនមែនជាបញ្ហារវាងកូរ៉េខាងជើង និងខាងត្បូងឡើយ ហើយការលើកបញ្ហានេះឡើង នឹងបង្កផលអវិជ្ជមាន ដែលអាចនាំឲ្យលទ្ធផលត្រចះត្រចង់នៃការចរចាថ្ងៃនេះក្លាយជាឥតបានការ»។ នេះជាសម្ដីព្រមានរបស់លោកតំណាងកូរ៉េខាងជើង និងបញ្ជាក់ច្បាស់ពីជំហររបស់ក្រុងព្យុងយ៉ាងដែលមិនបោះបង់មហិច្ឆតាអភិវឌ្ឍនុយក្លេអ៊ែររបស់ខ្លួនឡើយ ទោះជារងទណ្ឌកម្មគ្រប់យ៉ាងទៅហើយក្ដី។
ទោះជាយ៉ាងណា អាមេរិកនៅតែចង់ចរចាជាមួយកូរ៉េខាងជើងដើម្បីបញ្ឈប់កូរ៉េខាងជើងពីការអភិវឌ្ឃអាវុធប្រល័យលោកនេះ។ អាមរិកក៏បានប្រើធម៌ក្ដៅដាក់កូរ៉េខាងជើងផងដែរ សំដៅបង្ខំឲ្យរដ្ឋកុម្មុយនីស្តមួយនេះចូលតុចរចាឡើងវិញ។ កាលពីចុងសប្ដាហ៍មុន ប្រធានាធិបតី ដូណាល់ ត្រាំ អះអាងថា បើពេលវេលាសមរម្យមកដល់ អាមេរិកនឹងចូលខ្លួនចរចាមិនខាន៕
Tag:
អាមេរិក
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com