អន្តរជាតិ
រដ្ឋបាលត្រាំធានាមិនឲ្យមហាយក្សចិនធ្វើអ្វីតាមអំពើចិត្តនៅសមុទ្រចិនខាងត្បូងឡើយ ទីប្រឹក្សាជាន់ខ្ពស់របស់រដ្ឋមន្ត្រីការបរទេសអាមេរិកលោក Brian Hook
× ទីប្រឹក្សាជាន់ខ្ពស់រដ្ឋមន្ត្រីការបរទេសអាមេរិកបានបញ្ជាក់ថា សហរដ្ឋអាមេរិកក្រោមរដ្ឋបាលលោក ដូណាល់ ត្រាំ នឹងបន្តតួនាទី និងរក្សាប្រយោជន៍ខ្លួននៅតំបន់ឥណ្ឌូ-ប៉ាស៊ីហ្វិក។អ្វីដែលសំខាន់អាមេរិកនឹងបន្តការពារសណ្តាប់ធ្នាប់អន្តរជាតិ និងទប់ទល់មហាយក្សចិននៅក្នុងសមុទ្រចិនខាងត្បូងផងដែរ។
ក្នុងសន្និសីទសារព័ត៌មានតាមទូរសព្ទថ្ងៃ ៩ ខែមករា លោក Brian Hook ទីប្រឹក្សាជាន់ខ្ពស់របស់រដ្ឋមន្ត្រីការបរទេសអាមេរិកទទួលបន្ទុកគោលនយោបាយបានប្រាប់អ្នកសារព័ត៌មានថា ភាពជាអ្នកដឹកនាំរបស់អាមេរិកនៅក្នុងតំបន់ឥណ្ឌូប៉ាស៊ីហ្វិក នឹងធានាបាននូវស្ថិរភាព សន្តិភាព ការបើកចំហ និងសេរីភាពនៃតំបន់ឥណ្ឌូ-ប៉ាស៊ីហ្វិក។
លោក Hook បានរម្លឹកផងដែរពីយុទ្ធសាស្ត្រសន្តិសុខជាតិ (NSS) ដែលដាក់ចេញកាលពីចុងខែធ្នូកន្លងទៅ ដែលវាបានបង្ហាញឲ្យឃើញច្បាស់ពីគោលជំហររស់រដ្ឋបាលលោក ដូណាល់ ត្រាំ ក្នុងការបន្តភ្ជាប់ទំនាក់ទំនងជាមួយបណ្តាប្រទេសជាសម្ព័ន្ធមិត្ត ដៃគូ នៅក្នុងតំបន់ និងធានាស្ថិរភាព សន្តិភាព និងវិបុលភាពនៅតំបន់ឥណ្ឌូប៉ាស៊ីហ្វិក។
ក្រៅពីបន្តកិច្ចសហប្រតិបត្តិការជាមួយប្រទេសជាមិត្ត និងដៃគូនៅក្នុងតំបន់ មន្ត្រីអាមេរិករូបនេះក៏បានបញ្ជាក់ពីជំហររបស់អាមេរិកក្នុងការបន្តតួនាទីជាអ្នកការការពារច្បាប់អន្តរជាតិ និងជាអ្នកជួយធានាស្ថិរភាពសន្តិភាព ខណៈដែលមហាយក្សចិនព្យាយាមពង្រឹងឥទ្ធិពល និងពង្រីកអំណាចរបស់ខ្លួនឥតឈប់នោះ។
«យើងពិតជាជឿជាក់ថា ការរះត្រដែតឡើងរបស់ចិនមិនអាចកើតឡើងដោយការបាត់បង់តម្លៃសកល និងសណ្តាប់ធ្នាប់ពិភពលោកដែលពឹងផ្អែកលើច្បាប់ឡើយ។ សណ្តាប់ធ្នាប់នេះហើយជាមូលដ្ឋានគ្រឹះនៃសន្តិភាព និងស្ថិរភាពនៅឥណ្ឌូប៉ាស៊ីហ្វិកនិងជុំវិញពិភពលោកនោះ។ ដូច្នេះហើយ នៅពេលណាដែលសកម្មភាពរបស់ចិនដើរផ្ទុយពីតម្លៃសកល និងច្បាប់ទម្លាប់អន្តរជាតិ យើងនឹងក្រោកឈរឡើងដើម្បីការពារច្បាប់ទាំងនោះ»។ នេះជាសម្តីរបស់លោក Hook។
យ៉ាងណាក៏ដោយមន្ត្រីជាន់ខ្ពស់រូបនេះបានចោទប្រកាន់ថា ចិនព្យាយាមប្រើអំណាចគំរាមកំហែងប្រទេសតូចតាច និងកសាងកម្លាំងទ័ពនៅសមុទ្រចិនខាងត្បូងគ្មានខ្លាចរអាច្បាប់អន្តរជាតិ។ មិនត្រឹមតែប៉ុណ្ណោះ ទីប្រឹក្សារូបនេះអះអាងថា ក្នុងតម្លៃណាក៏ដោយ អាមេរិកនឹងបន្តសកម្មភាពរបស់ខ្លួននៅក្នុងសមុទ្រចិនខាងត្បូងតាមច្បាប់អន្តរជាតិដូចជាការអនុវត្តសេរីភាពនាវាចរណ៍ និងហោះហើរទៀត។
«សកម្មភាពបង្ករឿងរបស់ចិនដោយការធ្វើយោធូបនីយកម្មនៅសមុទ្រចិនខាងត្បូងជាផ្នែកមួយដែលចិនកំពុងបំពានច្បាប់អន្តរជាតិ។ ចិនព្យាយាមគំរាមកំហែងប្រទេសតូចៗដែលវាធ្វើប៉ះពាល់ខ្លាំងអភិបាលកិច្ចពិភពលោក។ យើងនឹងបន្តគាំទ្រសេរីភាពនាវាចរណ៍ និង បង្ហាញឲ្យចិនដឹងថា យើងនឹងបន្តហោះហើរ បំពេញប្រតិបត្តិការ និងដឹកជញ្ជូនតាមផ្លូវទឹកដែលច្បាប់អន្តរជាតិអនុញ្ញាតឲ្យ»។
ការផ្តល់យោបល់ពាក់ព័ន្ធគោលជំហរអាមេរិកក្នុងបញ្ហាជម្លោះសមុទ្រចិនខាងត្បូងធ្វើឡើងបន្ទាប់ពីហ្វីលីពីនអះអាងថាខ្លួនត្រៀមផ្ញើកំណត់ទូតទៅកាន់ក្រុងប៉េកាំងដើម្បីសួរនាំរឿងចិនទំនងជាបានធ្វើមូលដ្ឋានទ័ពអាកាសនៅថ្មប៉ប្រះទឹក Fiery Cross Reef។
រដ្ឋមន្ត្រីការពារជាតិហ្វីលីពីនលោក Delfin Lorenzana បានអះអាងដូច្នេះ៖« រដ្ឋាភិបាលចិនបានអះអាងច្បាស់ថា ខ្លួនមិនធ្វើយោធូបនីយកម្មលើកោះដែលខ្លួនទាមទារឡើយ។ បើសិនចិនពិតជាបានសាសង់មូលដ្ឋានទ័ពមែន ហើយយើងអាចដឹងច្បាស់ថាចិនបានដាក់ទាហាន និងអាវុធនៅទីនោះ វាពិតជាការក្បត់ពាក្យសម្តីរបស់ខ្លួនហើយ»។
ប្រមុខការពារជាតិហ្វីលីពីនក៏បានសង្កត់ធ្ងន់ផងដែរថា កំណត់ទូតរបស់ហ្វីលីពីនអាចនឹងត្រូវផ្ញើទៅឲ្យភាគីចិនតាមរយៈក្រសួងការបរទេសនៅពេលខាងមុខ៕
Tag:
ចិន
អាមេរិក
Brian Hook
NSS
សមុទ្រចិនខាងត្បូង
© រក្សាសិទ្ធិដោយ thmeythmey.com