អន្តរជាតិ
ប្រធានាធិបតីកូរ៉េខាងត្បូង៖ លោក ត្រាំ មានគុណសម្បត្តិបង្ខំឲ្យកូរ៉េខាងជើងត្រឡប់ចូលតុចរចា
× ប្រធានាធិបតីកូរ៉េខាងត្បូង មូន ចេអ៊ីន បានឲ្យគុណសម្បត្តិទៅប្រធានាធិបតីអាមេរិក ដូណាល់ ត្រាំ ដែលជំរុញឲ្យមានការចរចារវាងកូរ៉េខាងត្បូង និងកូរ៉េខាងជើងនៅថ្ងៃទី៩ ខែមករា។ បើតាមលោក មូន ចេអ៊ីន ទណ្ឌកម្ម និងសម្ពាធរបស់រដ្ឋបាលលោក ត្រាំ ជួយឲ្យកូរ៉េខាងជើងបន្ទន់ឥរិយាបថ និងយល់ព្រមចូលតុចរចាជាមួយកូរ៉េខាងត្បូង។ លោកក៏ព្រមានដែរថា ព្យុងយ៉ាងនឹងជួបរងទណ្ឌកម្មកាន់តែខ្លាំង បើហ៊ានបង្ករឿងទៀត។
ប្រធានាធិបតីកូរ៉េខាងត្បូង មូន ចេអ៊ីន និយាយថា ប្រធានាធិបតីអាមេរិក ដូណាល់ ត្រាំ សមទទួលគុណសម្បត្តិចំពោះការលេចជារូបរាងជំនួបអន្តរកូរ៉េ ដែលជាការជួបតទល់លើកដំបូងរវាងកូរ៉េទាំងពីរក្នុងពេលជាងពីរឆ្នាំ។ លោក មូន ចេអ៊ីន និយាយបែបនេះក្នុងសន្និសីទសារព័ត៌មានបង្ហាញគោលនយោបាយឆ្នាំ២០១៨ នៅថ្ងៃទី១០ ខែមករា គឺមួយថ្ងៃក្រោយតំណាងកូរ៉េទាំងពីរជួបគ្នានៅភូមិប៉ាន់មុនជុមនៅថ្ងៃទី៩ ខែមករា។
បើតាមទីភ្នាក់ងារព័ត៌មាន Reuters ចំពោះមុខអ្នកសារព័ត៌មានជាច្រើន ប្រធានាធិបតីកូរ៉េខាងត្បូងរូបនេះបង្ហាញគំនិតថា លោក ត្រាំ សមទទួលបានគុណសម្បត្តិដ៏ធំក្នុងការនាំឲ្យកូរ៉េទាំងពីរចរចាគ្នា។ លោក មូន ចេអ៊ីន បន្តថា ជំនួបដ៏កម្ររវាងមន្ត្រីកូរ៉េខាងត្បូង និងកូរ៉េខាងជើងនេះ អាចជាលទ្ធផលនៃការដាក់ទណ្ឌកម្ម និងសម្ពាធឥតឈប់ឈររបស់សហគមន៍អន្តរជាតិ ដែលដឹកនាំដោយអាមេរិកនាពេលកន្លងមក។
ខណៈអាមេរិកហាក់បារម្ភថាកូរ៉េខាងត្បូងងាកចេញពីខ្លួនដោយសារជំហរទន់ភ្លន់របស់កូរ៉េខាងជើង លោក មូន ចេអ៊ីន ធានាថា កូរ៉េខាងត្បូងនឹងមិនដើរលើផ្លូវផ្សេងគ្នាពីអាមេរិកឡើយ ហើយនៅតែបន្តជំហរតឹងរ៉ឹងដាក់កូរ៉េខាងជើងដដែល។ ក្នុងន័យនេះ ប្រធានាធិបតីកូរ៉េខាងត្បូងសេរីនិយមរូបនេះនៅតែចង់រំសាយនុយក្លេអ៊ែរដដែល ហើយការប្រើប្រាស់ទណ្ឌកម្មនឹងនៅតែដើរទន្ទឹមគ្នានឹងការចរចាបន្តទៅមុខទៀត។
«ឥឡូវនេះការចរចាផ្ដើម តែដោយសារវិបត្តិនុយក្លេអ៊ែរមិនទាន់ដោះស្រាយ កូរ៉េខាងត្បូងនឹងបន្តដាក់ទណ្ឌកម្ម និងសម្ពាធលើកូរ៉េខាងជើងដដែល។ យើងក៏គ្មានផែនការផ្អាកទណ្ឌកម្មឯកតោភាគីដែលដាក់បន្ថែមលើកូរ៉េខាងជើងដែរ»។ នេះជាការប្រកាសរបស់លោក មូន ចេអ៊ីន ខណៈដែលមុននេះមន្ត្រីរបស់លោកបានលើកឡើងថា ក្រុងសេអ៊ូលពិចារណាព្យួរទណ្ឌកម្មឯកតោភាគីដើម្បីសម្រួលដល់ការចូលរួមក្នុងព្រឹត្តិការណ៍អូឡាំពិករបស់ប្រតិភូ និងអត្តពលិកក្រុងព្យុងយ៉ាង។
ទណ្ឌកម្ម និងសម្ពាធអន្តរជាតិរាប់មិនអស់ ត្រូវបានវ៉ាស៊ីនតោន និងសេអ៊ូលចាត់ទុកជាវិធីសាស្ត្រដើម្បីបង្ខំឲ្យព្យុងយ៉ាងវិលចូលតុចរចា។ ប៉ុន្តែលោក មូន ចេអ៊ីន ក៏ទទួលស្គាល់ដែរថា ធម៌ក្ដៅមិនមែនជាដំណោះស្រាយតែមួយមុខឡើយ ដូចនេះទើបរដ្ឋាភិបាលកូរ៉េខាងត្បូងខិតខំពង្រឹងទំនាក់ទំនងជាមួយកូរ៉េខាងជើងតាមរយៈការសន្ទនា ហើយក៏ត្រៀមខ្លួនដាក់ទណ្ឌកម្មសង្កត់កូរ៉េខាងជើងថែមទៀត បើកូរ៉េខាងជើងបន្តធ្វើសកម្មភាពបំពាន៕
Tag:
កូរ៉េខាងត្បូង
អាមេរិក
មូន ចេអ៊ីន
ដូណាល់ ត្រាំ
© រក្សាសិទ្ធិដោយ thmeythmey.com