អន្តរជាតិ
ប៉ាគីស្ថានព្យូរកិច្ចសហប្រតិបត្តិការយោធានិងចារកម្មជាមួយអាមេរិក ក្រោយត្រាំ ផ្តាច់ជំនួយ
× រដ្ឋាភិបាលប៉ាគីស្ថានបានប្រកាសថា ខ្លួនសម្រេចព្យួរទំនាក់ទំនងយោធា និងចារកម្មជាមួយសម្ព័ន្ធមិត្តអាមេរិកនៅសប្តាហ៍នេះ បន្ទាប់ពីរដ្ឋបាលលោក ដូណាល់ ត្រាំប្រកាសផ្តាច់ជំនួយយោធាដល់រដ្ឋអាស៊ីខាងត្បូងនេះ។ អាមេរិកផ្តាច់ជំនួយដោយចោទប្រកាន់ថា ប៉ាគីស្ថានផ្តល់ជម្រកដល់ក្រុមភេរវជន។
ដើមឆ្នាំ ២០១៨ នេះ ប្រធានាធិបតីអាមេរិកលោក ដូណាល់ ត្រាំ បានប្រកាសព្យួរជំនួយយោធាដល់ប៉ាគីស្ថាន ដោយមេដឹកនាំរូបនេះចោទប្រកាន់ថា ប៉ាគីស្ថានផ្តល់កន្លែងឲ្យក្រុមភេរវជនលាក់ខ្លួនផង។ ទង្វើរបស់លោក ដូណាល់ ត្រាំ បានធ្វើឲ្យសម្ព័ន្ធភាពរវាងអាមេរិក និងប៉ាគីស្ថាដែលមានយូរអង្វែងមកហើយនោះប្រេះឆា។
នៅថ្ងៃអង្គារទី ៩ ខែមករានេះ រដ្ឋមន្ត្រីការពារជាតិរដ្ឋអាស៊ីខាងត្បូងមួយនេះលោក Khurram Dastgir Khan បានចេញមុខប្រកាសថា ប៉ាគីស្ថានសម្រេចព្យួរទំនាក់ទំនងយោធា និងចារកម្មជាមួយអាមេរិកហើយនៅពេលនេះ ខណៈដែលទំនាក់ទំនងទ្វេភាគីល្អក់កករខ្លាំងនោះ។
យោងតាមទីភ្នាក់ងារព័ត៌មានចិន Xinhua រដ្ឋមន្ត្រីរូបនេះបានលើកឡើងដូច្នេះក្នុងវេទិកាសាធារណៈស្តីសន្តិសុខប៉ាគីស្ថាន៖«អ្នកឃើញហើយការសម្រួលលើទំនាក់ទំនងជាច្រើននៅតែដំណើរការរវាងអាមេរិក និងប៉ាគីស្ថាន។ យើងមិនបានព្យួរឡើង។ ប៉ុន្តែកិច្ចសហប្រតិបត្តិការចារកម្ម និងការពារជាតិត្រូវបានព្យួរហើយ»។
មេដឹកនាំប៉ាគីស្ថានកន្លងមកហាក់មិនបញ្ចេញមតិយោបល់អ្វីឡើយជុំវិញការព្យួរជំនួយ និងការចោទប្រកាន់របស់អាមេរិកមកលើខ្លួនកន្លងមកពាក់ព័ន្ធការផ្តល់ជំរកដល់ក្រុមភេរជន។ យ៉ាងណាមិញពាក់ព័ន្ធការផ្តាច់ជំនួយរបស់អាមេរិកនេះ ប្រមុខការពារជាតិប៉ាគីស្ថានបានបញ្ជាក់ថា សកម្មភាពរបស់អាមេរិកកើតឡើងដោយសារតែមានការព្យួរកិច្ចសន្ទនាយុទ្ធសាស្ត្ររវាងប៉ាគីស្ថាន និងអាមេរិកកន្លងមក។
យ៉ាងណាមិញ បើតាមមន្ត្រីទូតអាមេរិកប្រចាំប៉ាគីស្ថាន វាមិនទាន់មានការផ្តល់ដំណឹងជាផ្លូវការនៅឡើយទេពាក់ព័ន្ធការព្យួរកិច្ចសហប្រតិបត្តិការយោធា និងចារកម្មនេះ បើទោះជាមានការបញ្ជាក់ពីមន្ត្រីជាន់ខ្ពស់ប៉ាគីស្ថានក្តី។
តាមពិតទៅអាមេរិកបានចោទប្រកាន់ប៉ាគីស្ថានថាបានផ្តល់កន្លែងជ្រកកោនដល់ក្រុមតាលីបង់យូរអង្វែងមកហើយ ព្រោះក្រុមនេះបានបន្តវាយប្រហារលើក្រុមទាហានអាមេរិកដែលអន្តរាគមន៍នៅអាហ្វហ្កានីស្ថាន។ រដ្ឋបាលអាមេរិកកន្លងមកបានបន្តជំរុញឲ្យប៉ាគីស្ថានធ្វើសកម្មភាពដើម្បីប្រឆាំងក្រុមតាលីបង់ និង បណ្តាញក្រុម Haqqani ប៉ុន្តែជានិច្ចជាកាលប៉ាគីស្ថានអះអាងថា ខ្លួនស្អាតស្អំមិនបានគាំទ្រក្រុមភេរវជនឡើយ៕
Tag:
ប៉ាគីស្ថាន
អាមេរិក
ដូណាល់ ត្រាំ
Khurram Dastgir Khan
© រក្សាសិទ្ធិដោយ thmeythmey.com