ជាតិ
សេដ្ឋកិច្ច
លោក វង្សី វិស្សុត៖ កម្ពុជាត្រូវទៅឲ្យហួសពីការអនុគ្រោះរបស់គេលើទីផ្សារអន្តរជាតិ
× ភ្នំពេញ៖ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានលើកឡើងថា កម្ពុជាត្រូវប្រឹងប្រែងទៅឲ្យផុតពីការអនុគ្រោះរបស់អ្នកដទៃ ដែលត្រូវរស់ដោយពឹងផ្អែកលើគោលការណ៍ទីផ្សារ។ លោកបញ្ជាក់ថា ការអនុគ្រោះរបស់បរទេស ជាអាទិ៍ ការអនុគ្រោះក្រោមក្របខណ្ឌ«អ្វីៗទាំងអស់ក្រៅពីអាវុធ» ឬ EBA របស់សហភាពអឺរ៉ុបដល់កម្ពុជា គង់តែបាត់បង់ទៅថ្ងៃណាមួយជាមិនខាន។
សូមស្ដាប់ប្រសាសន៍លោក វង្សី វិស្សុត ខាងក្រោមនេះ៖
«យើងត្រូវចេះរស់ដោយឈរលើគោលការណ៍ទីផ្សារ ដោយកុំចាំឲ្យគេបន្តក់ទឹកដោះគោ។ យើងកំពុងដើរលើផ្លូវនេះហើយម្ដងៗបន្តិចៗ»។ លោក វង្សី វិស្សុត ថ្លែងបែបនេះនៅក្នុងវេទិកាស្ដីពីថវិកាឆ្នាំ២០១៨ នៅថ្ងៃទី១៥ខែមករា។
គោលការណ៍ទីផ្សារ ដែលលោក វង្សី វិស្សុត បានលើកឡើងនេះ ចង់សំដៅការប្រកួតប្រជែងលើទីផ្សារ។ កន្លងមក ការនាំចេញរបស់កម្ពុជាទៅទីផ្សារសហភាពអឺរ៉ុប ត្រូវបានអនុគ្រោះពន្ធទាំងស្រុង ខណៈការនាំចេញទៅទីផ្សារសហរដ្ឋអាមេរិក កម្ពុជាទទួលការអនុគ្រោះលើផលិតផលធ្វើដំណើរ (Traveling Goods) ប៉ុណ្ណោះ។ ការដកពន្ធគយ បានជំរុញលទ្ធភាពប្រកួតប្រជែងរបស់កម្ពុជាលើទីផ្សារទាំងនោះ។
ការលើកឡើងរបស់លោក វង្សី វិស្សុត ដូចនេះ គឺត្រូវនឹងបរិបទដែលមានការគំរាមកំហែងរបស់សហគមន៍អន្តរជាតិលើលទ្ធភាពព្យួរការអនុគ្រោះពន្ធដល់កម្ពុជា ដោយសារស្ថានភាពនយោបាយក្នុងស្រុក។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុរូបនេះ ឲ្យដឹងទៀតថា កម្ពុជាត្រូវពង្រឹងខ្សែសង្វាក់ផលិតកម្មរបស់ខ្លួន ឲ្យមានលក្ខណៈអាចប្រកួតប្រជែងបាន។
យល់ឃើញស្រដៀងគ្នានេះដែរ សាស្ត្រាចារ្យសេដ្ឋកិច្ច លោក តេង ដឺលុច មានប្រសាសន៍ថា ទន្ទឹមនឹងទទួលបានការអនុគ្រោះរបស់បរទេស កម្ពុជាត្រូវពង្រឹងខ្លួនឯង ដើម្បីទទួលបានផលប្រយោជន៍ពីរស្របគ្នា។ លោកបានថ្លែងប្រាប់សារព័ត៌មានថ្មីៗយ៉ាងដូច្នេះថា៖«ប្រទេសមួយត្រូវវិវឌ្ឍន៍ ដោយពឹងផ្អែកលើខ្លួនឯង មិនអាចចាំតែពឹងគេដើម្បីរស់បាននោះទេ»។ លោកបន្តដូចនេះទៀតថា៖«អនុគ្រោះពន្ធកាន់តែច្រើនកាន់តែល្អ ប៉ុន្តែកុំភ្លេចពង្រឹងខ្លួនឯងលើសសមត្ថភាពប្រកួតប្រជែង»។
បើតាមលោក តេង ដឺលុច ការពង្រឹងខ្លួនរបស់កម្ពុជា គេត្រូវយកចិត្តទុកដាក់ខ្លាំងលើការកសាងធនធានមនុស្ស ដែលជាកត្តាជំរុញផលិតកម្មដែលមានភាពប្រកួតប្រជែង។
យោងតាមតួលេខរបស់ក្រសួងពាណិជ្ជកម្ម ការអនុគ្រោះពន្ធរបស់សហភាពអឺរ៉ុបដល់កម្ពុជាគិតជាទឹកប្រាក់មានចំនួន ៦៧៦លានដុល្លារ លើការនាំចេញសរុប ៦២៥៩លានដុល្លារនៅឆ្នាំ២០១៦ ។ រីឯការនាំចេញទៅសហរដ្ឋអាមេរិកមានទំហំទឹកប្រាក់ ២៩១៦លានដុល្លារ តែបើគិតតម្លៃពន្ធអនុគ្រោះមានចំនួន ១០លានដុល្លារ៕
© រក្សាសិទ្ធិដោយ thmeythmey.com