អន្តរជាតិ
អ្នកចង់ថតជាមួយ ត្រាំ ថ្ងៃខួបមួយឆ្នាំនៃការចូលកាន់តំណែងត្រូវបង់ ១០ម៉ឺនដុល្លារ ប្រធានាធិបតី ដូណាល់ ត្រាំ និងភរិយានៅឯ Mar-a-Lago (រូបភាព៖ AP)
× ប្រធានាធិបតី ដូណាល់ ត្រាំ នឹងរៀបចំពិធីជប់លាងមួយនៅថ្ងៃទី២០ ខែមករា ដើម្បីអបអរខួបមួយឆ្នាំនៃការស្បថកាន់តំណែងប្រធានាធិបតីអាមេរិកបន្តពីលោក បារ៉ាក់ អូបាម៉ា ។ ឯថ្លៃចូលរួមកម្មវិធីដែលរៀបចំនៅឯរដ្ឋ Florida គឺចាប់ពី១០ម៉ឺនដុល្លារឡើងទៅ។ កម្មវិធីនេះគ្រោងរៀបចំតាំងពីខែវិច្ឆិកា ឆ្នាំ២០១៧ ម្ល៉េះ ប៉ុន្តែលោកជាប់រវល់ទស្សនកិច្ចរយៈពេលនៅតំបន់អាស៊ី។
ថ្ងៃទី២០ ខែមករា ឆ្នាំ២០១៨ ជាខួបមួយឆ្នាំគត់ ដែលលោក ដូណាល់ ត្រាំ ស្បថចូលកាន់តំណែងប្រធានាធិបតីទី៤៥ របស់អាមេរិក។ លោក ត្រាំ បានផ្ដួលបេក្ខជនបក្សប្រជាធិបតេយ្យលោកស្រី ហ៊ីឡារី គ្លីនតុន ដែលជាជ័យជម្នះដ៏ភ្ញាក់ផ្អើលបំផុត។ មួយឆ្នាំនៅឯសេតវិមាន លោក ត្រាំ បានផ្លាស់ប្ដូរមុខមាត់អាមេរិកស្ទើរទាំងស្រុងលើឆាកអន្តរជាតិ។
ដើម្បីអបអរខួបមួយឆ្នាំនេះ បក្សសាធារណរដ្ឋនឹងរៀបចំកម្មវិធីជប់លាងដ៏ធំមួយនៅរមណីយដ្ឋាន Mar-a-Lago នៅរដ្ឋ Florida ដែលជាផ្ទះលោក ត្រាំ ស្រាប់ ដោយថ្លៃចូលរួមចាប់ផ្ដើមពី១០ម៉ឺនដុល្លារសម្រាប់មនុស្សពីរនាក់។ បើតាមលិខិតអញ្ជើញដែលផ្សាយដោយសារព័ត៌មាន Bloomberg តម្លៃនេះគឺសម្រាប់ចំណាយលើអាហារពេលល្ងាច និងរូបថតមួយប៉ុស្តិ៍ជាមួយលោកប្រធានាធិបតី ត្រាំ ។ តែបើចំណាយ២៥ម៉ឺននាក់វិញ អាចអង្គុយតុមូលបាន។
កម្មវិធីជប់លាងនេះរៀបចំដោយលោកស្រី Ronna Romney McDaniel ប្រធានគណៈកម្មាធិការជាតិបក្សសាធារណរដ្ឋ (RNC) និងមហាសេដ្ឋីកាស៊ីណូលោក Steve Wynn ដែលទទួលហិរញ្ញវត្ថុរបស់ RNC ។ ថវិកាទាំងអស់នឹងចូលទៅកាន់មូលនិធិរបស់ក្រុមការងារឃោសនារបស់លោក ត្រាំ និងមូលនិធិ RNC ។
យ៉ាងណាក្ដី គេមិនទាន់ច្បាស់ថា អ្នកចូលរួមទាំងអស់អាចថតរូបជាមួយលោក ត្រាំ ឬយ៉ាងណាឡើយ។ នេះក៏ព្រោះលោក ត្រាំ អាចប្ដូរកម្មវិធីធ្វើដំណើរទៅកាន់រដ្ឋ Florida ខណៈដែលរដ្ឋាភិបាលអាមេរិកប្រឈមមុខនឹងការបិទទ្វារ ក្រោយលុយរដ្ឋអស់នៅត្រឹមយប់ថ្ងៃទី១៨ ខែមករា។ សំណើច្បាប់សុំថវិកាបន្ថែមបានធ្លាក់ដល់ទៅដល់ដៃព្រឹទ្ធសភាហើយ ប៉ុន្តែសមាជិកព្រឹទ្ធសភាបក្សសាធារណរដ្ឋហាក់មិនទាន់ឯកភាពគ្នានៅឡើយ។
ជាការកត់សម្គាល់ មួយឆ្នាំក្នុងតំណែងប្រធានាធិបតីអាមេរិក លោក ត្រាំ ធ្វើរឿងគួរឲ្យភ្ញាក់ផ្អើលជាច្រើន។ លោកសម្រេចចិត្តដើរចេញពីកិច្ចព្រមព្រៀងទីក្រុងប៉ារីសស្ដីពីបម្រែបម្រួលអាកាសធាតុ ដកខ្លួនពីកិច្ចព្រមព្រៀងពាណិជ្ជកម្មអន្តរប៉ាស៊ីហ្វិក (TPP) គំរាមហែកកិច្ចព្រមព្រៀងនុយក្លេអ៊ែរអ៊ីរ៉ង់ចោល ចេញក្រឹត្យរឹតបន្តឹងការធ្វើដំណើររបស់ជនអន្តរប្រវេសន៍ ឯទំនាក់ទំនងរវាងអាមេរិក និងពិភពលោកក៏ឃ្លាតឆ្ងាយ ព្រោះលោក ត្រាំ ឲ្យតម្លៃជាតិខ្លាំងជ្រុល៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com