ជាតិ
សង្គមជាតិ
ដាក់ខ្នោះទាំងជាប់ការគ្រោងចីវរ បង្កឲ្យមានប្រតិកម្ម
× អ្នកប្រព្រឹត្តល្មើសច្បាប់ត្រូវតែមានទោស មិនថាអ្នកបួស ឬគ្រហស្ថនោះឡើយ។ កាលពីពេលថ្មីៗកន្លងមកនេះ នគរបាលខេត្តព្រះសីហនុ ឃាត់ព្រះសង្ឃពីរអង្គ ក្នុងប្រតិបត្តិការបង្ក្រាបគ្រឿងញៀន។ ជាមួយនឹងការគាំទ្រចំណាត់ការរបស់សមត្ថកិច្ច មហាជន ជាពិសេសអ្នកប្រើប្រាស់បណ្តាញសង្គមហ្វេសប៊ុក ក៏បានសម្តែងប្រតិកម្មផងដែរ ចំពោះការចាប់វាយខ្នោះជនសង្ស័យទាំងជាប់ស្បង់ជីវរ។
«សមត្ថកិច្ច វែកមុខបានអ្នកដែលបំផ្លាញសាសនា ប៉ុន្តែសមត្ថកិច្ចខ្លួនឯង មិនគួរចាប់វាយខ្នោះជនល្មើសទាំងគ្រោងស្បង់ចីវរបែបនេះឡើយ»។ នេះជាប្រតិកម្មរបស់អ្នកប្រើប្រាស់បណ្តាញសង្គមម្នាក់ ហើយខ្លឹមសារដដែលនេះ ក៏មានច្រើននៅតាមគណនីហ្វេសប៊ុកផ្សេងទៀតផងដែរ។
អតីតព្រះសង្ឃទាំងពីរ ត្រូវបានឃាត់ខ្លួន កាលពីយប់ថ្ងៃទី១៩ ខែមករា ជាមួយនឹងវត្ថុតាងរួមមានម្សៅសថ្លា២៣កញ្ចប់ និងទូរសព្ទដៃ២គ្រឿង។ នាអំឡុងពេលសាកសួរពាក់ព័ន្ធនឹងករណីគ្រឿងញៀន សមត្ថកិច្ច បានបង្ហោះរូបដែលឃើញអ្នកប្រព្រឹត្តខុសទាំងពីរ ជាប់ខ្នោះទាំងជាប់ស្បង់ចីវរ។
ព្រះពុទ្ធសាសនាជាសាសនារបស់រដ្ឋ កំហុសទាំងឡាយ គឺជាកំហុសបុគ្គល ដូច្នេះមិនគួរយករឿងអ្វីដែលសៅហ្មង មកឡូកឡំឡើយ។ សារព័ត៌មានថ្មីៗ មិនទទួលបានការឆ្លើយតបពីអាជ្ញាធរមូលដ្ឋានឡើយទាក់ទងនឹងករណីនេះ ប៉ុន្តែ លោក ផន ដាវី ប្រធានមន្ទីរធម្មការ និងសាសនា រាជធានីភ្នំពេញ បានប្រាប់តាមទូរសព្ទថា ការដាក់ខ្នោះព្រះសង្ឃទៅបានលុះត្រាតែមានបទល្មើសធ្ងន់ធ្ងរបំផុត ដោយសុំឃាត់ខ្លួន ហើយដាក់ខ្នោះនេះបាន ម្យ៉ាងដើម្បីការពារកុំឲ្យមានការរត់គេចប៉ុណ្ណោះ។
«តាមនីតិវិធីពុទ្ធសាសនា គេអាចចាប់អតីតព្រះសង្ឃដាក់ខ្នោះ ឬដាក់ទោសទណ្ឌ ទាល់តែបុគ្គលដែលប្រព្រឹត្តខុសទាំងនោះ ត្រូវបានផ្សឹក ឬលាសិក្ខាបទជាមុនសិន»។ នេះជាការបញ្ជាក់ លោក របស់ ផន ដាវី៕
© រក្សាសិទ្ធិដោយ thmeythmey.com