អន្តរជាតិ
ប្រមុខការទូតអង់គ្លេស ស្នើឲ្យអ្នកនយោបាយស្វាគមន៍ទស្សនកិច្ចរបស់លោក ត្រាំ ដើម្បីការពារប្រយោជន៍ជាតិ
× ប្រធានាធិបតី ដូណាល់ ត្រាំ សម្រេចលុបចោលទស្សនកិច្ចរបស់ខ្លួនមកអង់គ្លេសនៅសប្តាហ៍មុនព្រោះបញ្ហាចម្រូងចម្រាសមួយចំនួនក្នុងនោះមានការមិនទទួលបានការស្វាគមន៍ពីអ្នកនយោបាយអង់គ្លេសផង។ ប៉ុន្តែនៅសប្តាហ៍នេះប្រមុខការទូតអង់គ្លេស បានអំពាវនាវឲ្យមានការស្វាគមន៍លោក ត្រាំ ដើម្បីការពារប្រយោជន៍យូរអង្វែងរបស់អង់គ្លេសផង។
រដ្ឋមន្ត្រីការបរទេសអង់គ្លេសលោក Boris Johnson ថ្ងៃ ២១ ខែមករានេះ បានទទូចឲ្យមានការបញ្ឈប់រាល់ការប្រឆាំងទស្សនកិច្ចរបស់ប្រធានាធិបតី ដូណាល់ ត្រាំ មកកាន់ចក្រភពអង់គ្លេសទៀត ដោយលោកសង្កត់ធ្ងន់ថា វានឹងបំផ្លាញផលប្រយោជន៍អង់គ្លេសកាន់តែខ្លាំងផង។
យោងតាមទីភ្នាក់ងារព័ត៌មាន AFP ប្រមុខការទូតអង់គ្លេសខាងលើបានបញ្ជាក់ដូច្នេះថា៖« ដូណាល់ ត្រាំ ជាប្រធានាធិបតីជាប់ឆ្នោតនៃមហាអំណាចធំដែលមានឥទ្ធិពលខ្លាំង និងជាប្រទេសប្រជាធិបតេយ្យដ៏ខ្លាំងក្លាបំផុតមួយ។ មិនត្រឹមតែប៉ុណ្ណោះលោកក៏ជាមេដឹកនាំប្រទេសដែលជាសម្ព័ន្ធមិត្តដ៏ជិតស្និទ្ធបំផុតមួយដែរ»។
លោក Johnson បានអំពាវនាវបែបនេះ ត្រឹមតែមួយថ្ងៃប៉ុណ្ណោះមុនពេលដែលសមភាគីអាមេរិកមកបំពេញទស្សនកិច្ចនៅអង់គ្លេសដើម្បីពិភាក្សាសំខាន់ៗរួមគ្នា។ រដ្ឋមន្ត្រីការបរទេសរូបនេះថែមទាំងបានសង្កត់ធ្ងន់ថា ការបន្តពន្យារពេលទស្សនកិច្ចរបស់មេដឹកនាំអាមេរិកនឹងមានផលអវិជ្ជមានកាន់តែធំចំពោះប្រយោជន៍ជាតិជាពិសេសប្រយោជន៍សេដ្ឋកិច្ចរបស់អង់គ្លេសនាពេលអនាគតផង។
«ការប្រឆាំងដំណើរទស្សនកិច្ចរបស់ប្រធានាធិបតីអាមេរិកមកកាន់ប្រទេសយើង វាជាមិនខុសពីបំផ្លាញប្រយោជន៍ជាតិឡើយ។ រដ្ឋបាលលោកត្រាំ ស័ក្តិសមនឹងទទួលបានការគោរព និងការទទួលស្គាល់មិនមែនរងការបន្តុះបង្អាប់ដូចក្មេងឡើយ»។ នេះជាសម្តីរបស់លោក Johnson។
ទំនាក់ទំនងរវាងអង់គ្លេស និងអាមេរិកធ្លាក់ចុះខ្លាំងក្នុងរយៈពេលចុងក្រោយនេះ ក្រោយពេលដែលលោក ត្រាំ សម្រេចលុបចោលទស្សនកិច្ចទៅកាន់អង់គ្លេសដោយសារបញ្ហាចម្រូងចម្រាសមួយចំនួន។
បើតាមលោក ត្រាំ ខ្លួនឯងបញ្ហាចម្បងដែលលោកលុបចោលទស្សនកិច្ចនេះ គឺបញ្ហាទីតាំងស្ថានទូតអាមេរិកនៅអង់គ្លេស ប៉ុន្តែបើតាមស្ថានភាពជាក់ស្តែង
លោក ត្រាំ ប្រហែលជាមិនទទួលបានការស្វាគមន៍ពីអ្នកនយោបាយអង់គ្លេសឡើយ។ អ្នកនយោបាយអង់គ្លេសជាច្រើនបានបង្ហាញជំហរប្រឆាំងទស្សនកិច្ចរបស់មេដឹកនាំអាមេរិក ដោយលើកហេតុផលថាលោក ត្រាំ ជាមនុស្សរើសអើងពូជសាសន៍ផង៕
Tag:
ដូណាល់ ត្រាំ
អង់គ្លេស
Boris Johnson
© រក្សាសិទ្ធិដោយ thmeythmey.com