សម្តេច ហ៊ុន សែន៖ បើមិនហ៊ានសរសេររឿងពិត ក៏មិនអាចជួយសង្គមបានដែរ

ជាតិ

នយោបាយជាតិ

សម្តេច ហ៊ុន សែន៖ បើមិនហ៊ានសរសេររឿងពិត ក៏មិនអាចជួយសង្គមបានដែរ

21, Jan 2018 , 11:03 pm

រូបភាព

ដោយ: រួបរួម

សម្តេចនាយករដ្ឋមន្ត្រី ហ៊ុន សែន បានវាយតម្លៃថា វិស័យសារព័ត៌មាននៅកម្ពុជាក្តៅ ឬត្រជាក់ស្ថិតនៅលើស្ថាប័ន និងអ្នកសារព័ត៌មានខ្លួនឯង។ សម្តេចបានលើកឡើងបែបនេះនាជំនួបសំណេះសំណាល និងអាហារសាមគ្គីជាមួយអ្នកសារព័ត៌មានលើកទីពីរ ដែលរៀបចំនៅមជ្ឈមណ្ឌលកោះពេជ្រ នាល្ងាចថ្ងៃអាទិត្យ ទី២១ ខែមករា ឆ្នាំ២០១៨ ដែលមានអ្នកចូលរួមប្រមាណ៣៤០០នាក់។

«បើចង់ក្តៅសរសេរជេរប្រមាថ តែបើចង់ត្រជាក់សរសេរលើកដៃលើកជើងទំយើបុគ្គល ជ្រុលហួសការពិត»។ ក្នុងន័យនេះ ប្រមុខរដ្ឋាភិបាលកម្ពុជា ចង់ឃើញការថ្លឹងថ្លែងក្នុងសំណេររបស់អ្នកសារព័ត៌មាន ដោយមិនសរសេររឿងឲ្យក្តៅតាមរយៈការជេរប្រមាថ រហូតដល់មានការប្តឹងផ្តល់ ហើយមិនសរសេររឿងត្រជាក់ ជាមួយនឹងការប្រឌិតថាល្អគ្រប់រឿង។

សម្តេចបានលើកឡើងថា ព័ត៌មានដែលយកជាការណ៍បាន ដូចជាទឹកក្តៅលាយទឹកត្រជាក់ ដែលស្រួលងូត ព្រោះគេមិនអាចងូតត្រជាក់ពេក និងក្តៅពេកនោះឡើយ។ «បើរឿងពិតយើងមិនហ៊ានសរសេរចេញ ដែលខ្លាចប៉ះពាល់នេះ ប៉ះពាល់នោះ ខ្ញុំគិតថា វាមិនអាចជួយទៅដល់សង្គមបានទេ។ យើងត្រូវការព័ត៌មានទាំងល្អទាំងអាក្រក់»។ នេះជាការលើកឡើងរបស់សម្តេច ហ៊ុន សែន។

ដើម្បីធ្វើជាកញ្ចក់ឆ្លុះសង្គម សម្តេចនាយករដ្ឋមន្ត្រី ផ្តល់អនុសាសន៍ដល់អ្នកសារព័ត៌មានឲ្យយករឿងល្អ និងរឿងអាក្រក់ បញ្ចូលគ្នា ពីព្រោះព័ត៌មានពិតអាចឆ្លុះបញ្ចាំងពីតថភាពសង្គម ហើយសម្រាប់ព័ត៌មានមិនពិត ទាំងប្រជាពលរដ្ឋ ទាំងផ្នែករដ្ឋ សុទ្ធតែមិនអាចទទួលយកបាននោះឡើយ៕