រថយន្ត
អន្តរជាតិ
រថយន្ត Citroën 2 CV ឆ្នាំ១៩៤៩ លក់បានក្នុងតម្លៃជាង៩ម៉ឺនដុល្លារអាមេរិក
× រថយន្តម៉ូដែលចំណាស់ Citroën 2 CV ដែលផលិតកាលពីឆ្នាំ១៩៤៩ ត្រូវបានលក់ចេញក្នុងតម្លៃជាកំណត់ត្រាថ្មីមួយ ពោលគឺ៧៥ ៦០០អឺរ៉ូ (ជាង៩៣ ០០០ដុល្លារអាមេរិក)។ នេះបើយោងតាមការផ្សាយរបស់កាសែត Le Figaro។
ក្រុមហ៊ុនលក់ដេញថ្លៃរបស់បារាំងឈ្មោះ Osenat តាមរយៈគេហទំព័រ Fontainebleau បានលក់រថយន្តអស់ជាង៥០គ្រឿងកាលពីពេលថ្មីៗកន្លងមកនេះ។ ក្នុងចំណោមរថយន្តទាំងនោះ រថយន្តម៉ូដែលខ្នាតតូចដ៏កម្រ បានបង្កើតឲ្យមានការពិភាក្សាគ្នាពេញបណ្តាញសង្គម ពោលគឺរថយន្តប្រភេទ 2 CV ចំនួន៤គ្រឿង។
Citroën 2 CV ក្នុងប្រភេទ A ទទួលបាននូវការចាប់អារម្មណ៍យ៉ាងខ្ពស់ ដោយវាស្ថិតក្នុងចំណោមរថយន្តតែ៨៧៦គ្រឿងប៉ុណ្ណោះ ដែលត្រូវបានផលិតកាលពីអំឡុងឆ្នាំ១៩៤៨ និងឆ្នាំ១៩៤៩ ។
Le Figaro បានបង្ហាញថា រថយន្តនេះ ស្ថិតក្នុងសភាពល្អ និងអាចបើកបរបាន។ អ្នកដេញថ្លៃចំនួន២នាក់ បានប្រជែងយកវា ហើយទីបំផុត Citroën 2 CV ដ៏ចំណាស់នេះ បានធ្លាក់ទៅលើដៃអ្នកដែលហ៊ានឲ្យថ្លៃរហូតដល់ទៅ ៧៥ ៦០០អឺរ៉ូ (ជាង៩៣ ០០០ដុល្លារអាមេរិក)។
នេះជាតម្លៃជាកំណត់ត្រាថ្មីមួយនៅបារាំងសម្រាប់រថយន្តប្រភេទ 2 CV ដែលផ្ទុកមនុស្សជាស្តង់ដា២នាក់។ ប៉ុន្តែរថយន្ត ប្រភេទ 2CV ដែលមានតម្លៃខ្ពស់បំផុតនៅលើពិភពលោកនោះ គឺ 2 CV Sahara ដែលត្រូវលក់ចេញកាលពីឆ្នាំ២០១៦ ទៅអតិថិជនហូឡង់ ក្នុងតម្លៃ ១៧២ ៨៤០ផោន (ជាង២១ម៉ឺនដុល្លារអាមេរិក)៕
© រក្សាសិទ្ធិដោយ thmeythmey.com