ជាតិ
នយោបាយជាតិ
សាលាឧទ្ធរណ៍ សម្រេចឲ្យលោក កឹម សុខា ជាប់ឃុំដដែល លោក ជូង ជូងី មេធាវីមួយរូបរបស់លោក កឹម សុខា ផ្តល់បទសម្ភាសដល់អ្នកកាសែត ក្រោយដើរចេញពីបន្ទប់សវនាការនៃសាលាឧទ្ធរណ៍ នៅថ្ងៃទី១ ខែកុម្ភៈ ឆ្នាំ២0១៨
× ភ្នំពេញ៖ លោក កឹម សុខា អតីតប្រធានគណបក្សសង្គ្រោះជាតិ ត្រូវបានសាលាឧទ្ធរណ៍ សម្រេចឲ្យជាប់ឃុំដដែល។ ការសម្រេចរបស់សាលាឧទ្ធរណ៍ គឺធ្វើឡើងបន្ទាប់បញ្ចប់សវនាការ នៅព្រឹកថ្ងៃទី១ ខែកុម្ភៈ ឆ្នាំ២0១៨នេះ។
លោក កឹម សុខា ក៏បានចូលរួមក្នុងសវនាការនេះដែរ ដោយអមជាមួយក្រុមមេធាវីរបស់លោក។ ក្រោយបញ្ចប់សវនាការ សមត្ថកិច្ចក៏បាននាំលោក កឹម សុខា កាន់ពន្ធនាគារត្រពាំងផ្លុងវិញ។
លោក ជូង ជូងី មេធាវីមួយរូបរបស់លោក កឹម សុខា បានសម្តែងការសោកស្តាយយ៉ាងខ្លាំង ដែលសាលាឧទ្ធរណ៍ មិនយល់ព្រមឲ្យលោក កឹម សុខា បាននៅក្រៅឃុំបណ្តោះអាសន្ត។ លោក បន្ថែមថា ក្រុមមេធាវី នឹងពិភាក្សាជាមួយលោក កឹម សុខា ដើម្បីសម្រេចថាត្រូវធ្វើអ្វីបន្តទៀត។
គួររម្លឹកថា លោក កឹម សុខា បានជាប់ឃុំក្នុងពន្ធនាគារជិត៥ខែ ក្រោមការសង្ស័យថា ពាក់ព័ន្ធនឹងអំពើក្បត់ជាតិ ព្រោះបានឃុបឃិតជាមួយបរទេសជាសម្ងាត់ ដើម្បីផ្តួលរំលំរដ្ឋាភិបាលកម្ពុជា។ សមត្ថកិច្ចនិងតុលាការ ពឹងផ្អែកលើវីដេអូឃ្លីបមួយ ដែលលោក កឹម សុខា បានថ្លែងសារនយោបាយទៅកាន់អ្នកគាំទ្រនៅក្រៅប្រទេស តាំងពីឆ្នាំ២០១៣មកម្ល៉េះ។ ក្នុងវីដេអូឃ្លីបនោះ លោក កឹម សុខា បានលើកឡើងថា លោក មានអ្នកជំនាញដែលជាជនបរទេសនៅពីក្រោយ ដើម្បីជ្រោមជ្រែងក្នុងការផ្លាស់ប្តូររដ្ឋាភិបាលកម្ពុជា។
ក្រោយវីដេអូឃ្លីបខាងលើ បានបែកធ្លាយលើបណ្តាញសង្គមហ្វេសប៊ុក សមត្ថកិច្ច ក៏បាននាំគ្នាចុះទៅចាប់លោក កឹម សុខា ដល់គេហដ្ឋានតែម្តង កាលពីយប់ថ្ងៃទី២ ឈានចូលថ្ងៃទី៣ ខែតុលា ឆ្នាំ២០១៧។ ភ្លាមៗបន្ទាប់ពីចាប់ខ្លួន សមត្ថកិច្ច ក៏ដឹកលោក ទៅឃុំនៅពន្ធនាគារត្រពាំងផ្លុង ក្នុងខេត្តត្បូងឃ្មុំ៕
Tag:
តុលាការ
កឹម សុខា
មេធាវី
© រក្សាសិទ្ធិដោយ thmeythmey.com