ជាតិ
កម្ពុជាពង្រឹងភាពជាដៃគូជាមួយបណ្តាប្រទេសលើពិភពលោកក្នុងយុទ្ធនាការប្រឆាំងគ្រឿងញៀន លោក កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន
× ការផលិត ការចរាចរ ជួញដូរគ្រឿងញៀន ពីតំបន់មួយចំនួនដូចជា តំបន់អាមរិកខាងត្បូង អាហ្វ្រិក អឌ្ឍចន្ទមាស និងត្រីកោណមាស នៅតែបញ្ហាដ៏ធំក្នុងអនុតំបន់ តំបន់ និងពិភពលោកទាំងមូល។ កម្ពុជាដែលទទួលរងឥទ្ធិពលផងដែរនោះ បន្តពង្រីកប្រតិបត្តិការរបស់ខ្លួនកាន់តែខ្លាំងក្លានៅលើឆាកអន្តរជាតិ។ នេះបើតាមការអះអាងរបស់លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ)។
សហប្រតិបត្តិទ្វេរភាគីជាមួយបណ្តាប្រទេសនៅលើពិភពលោក ជាពិសេសប្រទេសជិតខាង ត្រូវបានពង្រឹង។ លោក មាស វិរិទ្ធ បានបញ្ជាក់នៅក្នុងរបាយការណ៍សង្ខេបស្តីពី «លទ្ធផលការងារត្រួតពិនិត្យគ្រឿងញៀនឆ្នាំ២០១៧ និងទិសដៅការងារឆ្នាំ២០១៨» ដែលត្រូវបានរៀបចំឡើងកាលពីថ្ងៃទី៥ ខែកុម្ភៈ។
អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន (អ.ជ.ប.គ.ញ) បានបញ្ជាក់ថា សភាពការណ៍គ្រឿងញៀនដែលកើតចេញតំបន់អាមរិកខាងត្បូង អាហ្វ្រិក អឌ្ឍចន្ទមាស និងត្រីកោណមាស ធ្វើឲ្យកម្ពុជាបន្តរងនូវការប៉ះពាល់ ជាពិសេសចរចរណ៍ដែលបានឆ្លងកាត់ពីបណ្ដាប្រទេសនានា ទាំងនៅក្នុងអនុតំបន់ តំបន់ និងអន្តរជាតិ តាមច្រកផ្លូវជើងគោក តាមបណ្ដាខេត្តភាគខាងជើង និងឦសានប្រទេស។ នេះបើតាមរបាយការណ៍ដែលអានដោយ លោក មាស វិរិទ្ធ។
ការដាំអាភៀន និងការផលិតហេរូអ៊ីន អំហ្វេតាម៉ីនក្រាមម្សៅ អំហ្វេតាម៉ីនគ្រាប់នៅតំបន់ត្រីកោណនៅតែមានកំណើន។ប្រភេទគ្រឿងញៀន និងរុក្ខជាតិទាំងអស់នេះ ត្រូវបានដាំ និងផលិតឡើង ក្នុង១ឆ្នាំៗជាង១ពាន់តោន និងជាង១ពាន់លានគ្រាប់ ហើយសាធាតុគីមីផ្សំក្នុងការផលិតមានជាង១ពាន់តោនជុំវិញពិភពលោក។
«ចរាចរណ៍ជួញដូរគ្រឿងញៀន ពីតំបន់អាមរិកខាងត្បូង អាហ្វ្រិក អឌ្ឍច័ន្ទមាស និងត្រីកោណមាស ភាគច្រើនធ្វើឡើងតាមផ្លូវអាកាស»។ នេះជាការបញ្ជាក់របស់ លោក មាស វិរិទ្ធ ដោយបន្តថា កន្លងមកប្រធានអាជ្ញាធរជាតិប្រយុទ្ធប្រឆាំងគ្រឿងញៀន លោក កែ គឹមយ៉ាន និងភាគីចិន បានបង្កើនកិច្ចសហប្រតិបត្តិការជាមួយចិន ក្នុងការទប់ស្កាត់ និងបង្ក្រាបគ្រឿងញៀន ឧក្រិដ្ឋកម្មឆ្លងដែន។
ដូចគ្នា លោក កែ គឹមយ៉ាន បានជួបពិភាក្សាជាមួយភាគីឥណ្ឌូនេស៊ីស្ដីពី «កិច្ចហសប្រតិបត្តិការ ត្រួតពិនិត្យគ្រឿងញៀនទ្វេភាគី» ក្នុងគោលដៅពង្រឹងសុពលភាពត្រួតពិនិត្យគ្រឿងញៀននៅកម្ពុជា។ ដោយឡែកជាមួយភាគីថៃ កិច្ចសហប្រតិការណ៍ទ្វេភាគីនៅតំបន់ព្រំដែន មានការពង្រឹងកាន់តែមានប្រសិទ្ធភាព។
លោក មាស វិរិទ្ធ លើកឡើងថា នៅតាមមូលដ្ឋានសុខាភិបាល និងមណ្ឌលបណ្ដោះអាសន្នរដ្ឋ និងឯកជន ក្នុងរយៈពេលនៃការអនុវត្តផែនការប្រយុទ្ធប្រឆាំងគ្រឿងញៀនខុសច្បាប់ឆ្នាំ២០១៧ មានចំនួន ១៥៧៩៦នាក់ ប៉ុន្តេនៅឆ្នាំ២០១៦មានចំនួន ១១៦០១នាក់។
«ការកើនឡើងជាងឆ្នាំ២០១៦ ដោយសារគណៈកម្មាធិការទទួលបន្ទុកការព្យាបាល និងស្ដារនីតិសម្បទាអ្នកញៀនគ្រឿងញៀន បានលើកផែនការសកម្មភាពប្រយុទ្ធប្រឆាំងគ្រឿងញៀន បានពង្រឹងយន្តការរបស់ខ្លួនពីថ្នាក់ជាតិ ដល់មូលដ្ឋាន» ។ នេះជាការបញ្ជាក់របស់អគ្គលេខាដ្ឋាន នៃ អ.ជ.ប.គ.ញ៕
Tag:
គ្រឿងញៀន
មាស វិរិទ្ធ
© រក្សាសិទ្ធិដោយ thmeythmey.com