ជាតិ
កម្ពុជា រកចំណូលពីវិស័យទេសចរណ៍ ជាង៣ពាន់លានដុល្លារ ក្នុងឆ្នាំ២០១៧
× ភ្នំពេញ៖ កម្ពុជា រកចំណូលពីវិស័យទេសចរណ៍ បានជាង៣ពាន់លានដុល្លារអាមេរិក ក្នុងឆ្នាំ២០១៧។
ប្រធាននាយកដ្ឋានស្ថិតិនៃក្រសួងទេសចរណ៍លោក គង់ សុភារៈ បាននិយាយថា កម្ពុជា រកចំណូលសរុបពីវិស័យទេសចរណ៍បាន ៣,៦៣ ពាន់លានដុល្លារ ក្នុងឆ្នាំ២០១៧ ដែលកើនឡើង១៣ភាគរយ បើប្រៀបធៀបនឹងឆ្នាំ២០១៦ ។ លោក គង់ សុភារៈ បានបន្ថែមថា ភ្ញៀវទេសចរអន្តរជាតិដែលបានចូលមកកម្ពុជា មានចំនួន៥,៦លាននាក់ ពីបណ្ដាប្រទេសក្នុងតំបន់អាស៊ីអាគ្នេយ៍ ដែលកើនឡើង១១,៨ ភាគរយ បើធៀបឆ្នាំ២០១៦។ បើតាមលោក សុភារៈ ភ្ញៀវទេសចរជនជាតិចិន មានចំនួនច្រើនជាងគេ ខណៈភ្ញៀវជនជាតិវៀតណាម និងឡាវ ឈរលេខរៀងបន្ទាប់។
ប្រធាននាយកដ្ឋានស្ថិតិនៃក្រសួងទេសចរណ៍ ដែលស្រង់សម្តីដោយទីភ្នាក់ងារព័ត៌មាន Xinhua បានសរសេរដូច្នេះថា៖«វិស័យទេសចរនេះ បានរួមចំណែក១២,៣ ភាគរយក្នុងចំណូលក្នុងស្រុក GDP កាលពីឆ្នាំ២០១៧»។
លោក គង់ សុភារៈ រំពឹងថា ភ្ញៀវទេសចរណ៍អន្តរជាតិ នឹងមកទស្សនាកម្ពុជា ជាង៦លាននាក់ ក្នុងឆ្នាំ២០១៨នេះ។ វិស័យទេសចរ គឺជាផ្នែកមួយដ៏សំខាន់ ក្នុងវិស័យចំនួន៤ ដែលគាំទ្រដល់សេដ្ឋកិច្ចកម្ពុជា។
កម្ពុជាមានតំបន់កេរ្តិ៍ដំណែលប្រវត្តិសាស្ត្រចំនួន៣ ដូចជា តំបន់រមណីយដ្ឋានអង្គរវត្ត តំបន់ប្រាសាទព្រះវិហារ និងតំបន់ប្រាសាទសំបូរព្រៃគុកជាដើម។ ក្រៅពីនេះក៏មានតំបន់ទេសចរបែបធម្មជាតិជាច្រើនកន្លែងផងដែរ។ ភ្ញៀវទេសចរភាគច្រើន មកទស្សនាប្រាសាទអង្គរវត្ត ដែលជាតំបន់ប្រវត្តិសាស្ត្រកម្ពុជា។ បើតាមគ្រឹះស្ថានអង្គរ ក្នុងឆ្នាំ២០១៧ ចំណូលសរុបដែលបានពីការលក់សំបុត្រចូលទស្សនារមណីយដ្ឋានអង្គរ មានចំនួនជាង ១០៧លានដុល្លារ ដែលចំនួននេះមានការកើនឡើងជាង ៧២% បើធៀបនឹងឆ្នាំចាស់៕
© រក្សាសិទ្ធិដោយ thmeythmey.com