ចំនួនអ្នករត់ដើម្បីក្តីស្រលាញ់កើនឡើង តែថ្នាក់ដឹកនាំបន្តដាស់តឿនកុំឲ្យយល់ច្រឡំ

កីឡាជាតិ

ជាតិ

ចំនួនអ្នករត់ដើម្បីក្តីស្រលាញ់កើនឡើង តែថ្នាក់ដឹកនាំបន្តដាស់តឿនកុំឲ្យយល់ច្រឡំ

08, Feb 2018 , 10:39 pm

រូបភាព

លោក វ៉ាត់ ចំរើន អគ្គលេខាធិការ NOCC (កណ្តាល)ចូលរួមសន្និសីទសារព័ត៌មានស្ត្រី និងកីឡា រត់កម្សាន្តដើម្បីក្តីស្រលាញ់

ដោយ:

នៅថ្ងៃទី១១ កុម្ភៈ ខាងមុខនេះ គណៈកម្មការស្ត្រីនិងកីឡានៃគណៈកម្មាធិការជាតិអូឡាំពិកកម្ពុជា(NOCC)នឹងរៀបចំព្រឹត្តិការណ៍រត់កម្សាន្ត ដើម្បីអបអរទិវាបុណ្យនៃក្តីស្រលាញ់ ១៤ កុម្ភៈ(Valentine Day) នៅបរិវេណកោះពេជ្រ។ ទន្ទឹមនឹងនេះថ្នាក់ដឹកនាំកីឡាកម្ពុជាជំរុញឲ្យមហាជនចូលរួមព្រឹត្តិការណ៍នេះឲ្យបានច្រើនកុះករ ជាពិសេសដាស់តឿនដល់យុវជនកុំយល់ច្រឡំថ្ងៃនៃក្តីស្រលាញ់ថាជាថ្ងៃបុណ្យសង្សារ។

ទន្ទឹមនឹងចំនួនអ្នកចូលរួមរត់កម្សាន្តដើម្បីក្តីស្រលាញ់នៅឆ្នាំនេះមានការកើនឡើងខ្លាំង អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន បន្តដាស់តឿនស្មារតីយុវជនកុំឲ្យយល់ច្រឡំថ្ងៃបុណ្យនៃក្តីស្រលាញ់ថាជាថ្ងៃបុណ្យសង្សារ។ ជាមួយគ្នានេះ លោក អំពាវនាវឲ្យយុវចូលរួមរត់កម្សាន្តឲ្យបានច្រើនកុះករ ដើម្បីចៀសវាងការប្រព្រឹត្តអំពើដែលពុំគប្បី។ ការផ្ញើសារដាស់តឿននេះ បន្ទាប់ពីមានយុវជនមួយចំនួននៅយល់ច្រឡំថ្ងៃបុណ្យនៃក្តីស្រលាញ់ជាថ្ងៃបុណ្យសង្សារ ដែលពួកគេត្រូវលះបង់អ្វីៗគ្រប់យ៉ាងសម្រាប់សង្សាររបស់ខ្លួន។

តាមពិតថ្ងៃបុណ្យនៃក្តីស្រលាញ់ ឬហៅថា Valentine day ជាទិវាបុណ្យប្រពៃណីរបស់បរទេស ដែលគេបង្កើតឡើងដើម្បីផ្តល់ក្តីស្រលាញ់គ្នាទៅវិញទៅមករវាងគ្រួសារ សាច់ញាតិ បងប្អូន និងមិត្តភក្តិជាដើម។ ប៉ុន្តែនៅមានបណ្តាប្រទេសមួយចំនួនរួមទាំងកម្ពុជា(យុវជនមួយចំនួន)តែងតែហៅបុណ្យដែលគេតែងតែធ្វើរៀងរាល់ថ្ងៃទី ១៤ កុម្ភៈ នេះថាជាថ្ងៃបុណ្យសង្សារ។

ដើម្បីអបអរទិវានៃក្តីស្រលាញ់ ក៏ដូចជាបញ្ជៀសឲ្យយុវជនមួយចំនួនប្រព្រឹត្តអំពើពុំគប្បី គណៈកម្មាការស្ត្រីនិងកីឡានៃគណៈកម្មាធិការជាតិអូឡាំពិកកម្ពុជានឹងរៀបចំការរត់កម្សាន្តដើម្បីក្តីស្រលាញ់នាព្រឹកថ្ងៃទី១១ កុម្ភៈ នៅបរិវេណកោះពេជ្រ។ ការរត់កម្សាន្តនេះចែកចេញជាពីរប្រភេទវិញ្ញាសា គឺរត់ចម្ងាយ៥គីឡូម៉ែត្រ និង៣គីឡូម៉ែត្រ។

ក្នុងសន្និសីទសារព័ត៌មានកាលពីថ្ងៃទី៧ កុម្ភៈ នៅទីស្នាក់ការ NOCC លោក វ៉ាត់ ចំរើន អគ្គលេខាធិការ NOCC បានបញ្ជាក់ថា គិតត្រឹមថ្ងៃទី៧ កុម្ភៈ មានអត្តពលិកជាតិនិងអន្តរជាតិចុះឈ្មោះចូលរួមចំនួន៣២៤៨នាក់។ ចំនួននេះកើនឡើងជាង៥០ភាគរយបើធៀបទៅនឹងឆ្នាំ២០១៧ ដែលមានត្រឹមតែជិត២ពាន់នាក់៕