ជាតិ
សម្ដេច ហ៊ុន សែន ថា បរទេសមិនហ៊ានកាត់ផ្ដាច់ជំនួយកម្ពុជាទេ
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន មានជំនឿថា បរទេសមិនហ៊ានកាត់ផ្ដាច់ជំនួយកម្ពុជាទេ ខណៈដែលកម្ពុជាមិនពឹងផ្អែកលើជំនួយពួកគេទាំងស្រុង។ ថ្លែងក្នុងពិធីសម្ពោធបើកការដ្ឋានសាងសង់ស្ពានបេតុងឆ្លងកាត់ទន្លេមេគង្គ ពីស្រុកស្ទឹងត្រង់ខេត្តកំពង់ចាម ទៅស្រុកក្រូចឆ្មារ ខេត្តត្បូងឃ្មុំ នៅព្រឹកថ្ងៃទី៩ កុម្ភៈនេះ សម្ដេច ហ៊ុន សែន បានចំអកថា មូលហេតុដែលបរទេសមិនហ៊ានផ្ដាច់ជំនួយកម្ពុជានោះ ព្រោះតែវាប៉ះពាល់ដល់ក្រុមអង្គការសង្គមស៊ីវិល ដែលទទួលជំនួយពីពួកគេ ហើយវាមិនប៉ះពាល់អ្វីធ្ងន់ធ្ងរដល់កម្ពុជាឡើយ។
និយាយត្រង់ចំណុចនេះ ប្រមុខរដ្ឋាភិបាល បានចំអកដោយប្រយោលថា «ប្រទេសខ្លះ ផ្តល់ជំនួយត្រឹម១លានដុល្លារ បែជាគំរាមផ្ដាច់រហូត ត្រឹមលុយ១លានដុល្លារ ខ្ញុំក៏អាចសុំពីក្រុមហ៊ុនដទៃ ក៏គេឲ្យដែរ»។ ថ្លែងចំពោះមុខឯកអគ្គរដ្ឋទូតចិនប្រចាំកម្ពុជា សម្ដេច ហ៊ុន សែន បាននិយាយថា ប្រទេសខ្លះបានត្រឹមតែរិះគន់កម្ពុជាថា ងាកទៅជិតប្រទេសចិន ប៉ុន្តែពួកគេមិនបានជួយអ្វីដល់កម្ពុជា ដូចប្រទេសចិនឡើយ។
បើទោះជាមិននិយាយចំឈ្មោះក្តី ប៉ុន្តែរដ្ឋាភិបាល ទំនងចង់ផ្លែផ្កាទៅកាន់អាមេរិក និងសហភាពអឺរ៉ុប ដែលតែងតែចេញមុខគំរាមផ្ដាច់ជំនួយកម្ពុជា ដោយផ្សារភ្ជាប់នឹងបញ្ហានយោបាយ។
© រក្សាសិទ្ធិដោយ thmeythmey.com