អន្តរជាតិ
ប្រាយុទ្ធ ប្រាប់អាមេរិក៖ «ប្រទេសថៃកំពុងដើរលើផ្លូវទៅរកលទ្ធិប្រជាធិបតេយ្យបែបថៃ»
× ប្រមុខរបបយោធាថៃលោក ប្រាយុទ្ធ ចន្ទអូចា បានអះអាង ថា ថៃកំពុងស្ថិតលើផ្លូវទៅកាន់ប្រជាធិបតេយ្យ តែជាប្រជាធិបតេយ្យបែបថៃ និងប្រើប្រាស់វិធីសាស្ត្ររបស់ថៃផ្ទាល់។ លោក ប្រាយុទ្ធ អះអាងដូចនេះនៅចំពោះមុខប្រមុខកងទ័ពអាមេរិក ឧត្តមសេនីយ៍ ចូសេហ្វ ដាន់ហ្វត ដែលទស្សនកិច្ចនៅថៃ ដើម្បីពង្រឹងទំនាក់ទំនងទ្វេភាគី ហើយក៏ទំនងជាលើកឡើងពីជំហររបស់អាមេរិកជុំវិញស្ថានការណ៍នយោបាយរបស់ថៃផង។
នាយករដ្ឋមន្ត្រីថៃ ប្រាយុទ្ធ ចន្ទអូចា បានជួបជាមួយនាយសេនាធិការចម្រុះកងទ័ពអាមេរិកលោកឧត្តមសេនីយ៍ ចូសេហ្វ ដាន់ហ្វត នៅថ្ងៃទី៧ ខែកុម្ភៈ នៅវិមានរដ្ឋាភិបាល ដោយលោកបានពន្យល់មេទ័ពអាមេរិកពីផែនទីចង្អុលផ្លូវឆ្ពោះទៅកាន់ប្រជាធិបតេយ្យពិតប្រាកដ។ ខណៈការបោះឆ្នោតត្រូវបានពន្យារពេលម្ដងជាពីរដង លោក ប្រាយុទ្ធ បានប្រាប់លោក ដាន់ហ្វត ថា ថៃនឹងប្រើប្រាស់វិធីសាស្ត្រខ្លួនដើម្បីឈានដល់ប្រជាធិបតេយ្យ។
បើតាមកាសែតបាងកកប៉ុស្តិ៍ មេដឹកនាំយោធាថៃក្រោយជំនួបនោះ ថា ថៃកំពុងធ្វើដំណើរទៅរកប្រជាធិបតេយ្យ ហើយលោក ដាន់ហ្វត បានយល់ពីរឿងនេះ និងជូនពរឲ្យថៃជោគជ័យផង។ យ៉ាងណាមិញ ក្នុងជំនួបដដែល លោក ប្រាយុទ្ធ ក៏ប្រកាសជំហររបស់ថៃ ដែលមិនចាំបាច់ប្រើប្រាស់ផ្លូវដើររបស់អាមេរិកដើម្បីដោះស្រាយបញ្ហាឡើយ។ លោកថា ថៃ និងអាមេរិកមានស្ថានភាពខុសគ្នា ទាំងសេដ្ឋកិច្ច សង្គម និងវប្បធម៌។
«ខ្ញុំបានប្រាប់គាត់ថា ប្រធានាធិបតីអាមេរិកមាននយោបាយ America First ។ ខ្ញុំក៏មាន Thailand First ដើម្បីដោះស្រាយបញ្ហាទាក់ទងផលប្រយោជន៍ជាតិដែរ»។ នេះជាការបញ្ជាក់របស់លោក ប្រាយុទ្ធ ដោយចង់សំដៅនយោបាយថ្មីរបស់អាមេរិកក្រោមអាណត្តិលោក ដូណាល់ ត្រាំ ដែលអាមេរិកគិតពីប្រយោជន៍ខ្លួនឯងមុន។ នៅថៃ រដ្ឋាភិបាលយោធាក៏បានបង្កើតនយោបាយស្រដៀងគ្នាដើម្បីលើកកម្ពស់ជាតិដែរ។
ទំនងសំដៅដល់ការលើកពេលការបោះឆ្នោតម្ដងជាម្ដងនោះ មេដឹកនាំរដ្ឋប្រហារឆ្នាំ២០១៤ រូបនេះបកស្រាយថា លោកចង់បានពេលច្រើនសម្រាប់ដំណើការផ្នែកច្បាប់ដើម្បីធានាថា ថៃនឹងមានប្រជាធិបតេយ្យខ្លាំង។ ជុំវិញកាលបរិច្ឆេទបោះឆ្នោតវិញ លោក ប្រាយុទ្ធ និយាយថា លោកគឺជាអ្នកសម្រេចដោយផ្អែកលើដំណើការផ្លូវច្បាប់។ កាលកំណត់បោះឆ្នោតចុងក្រោយ ដែលគ្រោងធ្វើនៅខែវិច្ឆិកា នឹងត្រូវពន្យារម្ដងទៀតដែរ។
របបយោធាថៃ រងការរិះគន់ខ្លាំងជុំវិញការពន្យារពេលនេះ និងត្រូវចោទថា ចង់កាន់អំណាចយូរ។ តាមពិតទៅ ការលើកពេលនេះ កើតឡើងក្រោយសភានីតិបញ្ញត្តិថៃបានប្រកាសពន្យារពេលអនុវត្តច្បាប់ស្ដីពីការជ្រើសរើសតំណាងរាស្ត្រដល់ទៅ៩០ថ្ងៃ ក្រោយច្បាប់នេះចូលជាធរមាន។ ការណ៍ក៏នាំឲ្យកាលបរិច្ឆេទបោះឆ្នោតដែលលោក ប្រាយុទ្ធ បានប្រកាស ត្រូវអាក់ខាន ហើយពេលវេលាបោះឆ្នោតថ្មី ត្រូវរុញដល់ខែកុម្ភៈ ឆ្នាំ២០១៩ ឯណោះ៕
Tag:
អាមេរិក
ថៃ
ប្រាយុទ្ធ ចន្ទអូចា
ចូសេហ្វ ដាន់ហ្វ
© រក្សាសិទ្ធិដោយ thmeythmey.com