ព្រឹត្តិការណ៍អូឡាំពិករដូវរងាឆ្នាំ២០១៨ ដែលទីក្រុងព្យុងឆាង កូរ៉េខាងត្បូង ធ្វើជាម្ចាស់ផ្ទះបានដំណើការពីរថ្ងៃហើយ ក្រោយការបើកកម្មវិធីនៅថ្ងៃទី៩ ខែកុម្ភៈ។ រឿងរ៉ាវជាច្រើនបានកើតឡើងក្នុងព្រឹត្តិការណ៍នេះ។
កូរ៉េខាងត្បូងប្ដូរអក្សរ Pyeongchang ទៅជា PyeongChang កុំឲ្យច្រឡំជាមួយ Pyongyang
ទីក្រុងព្យុងឆាង គឺជាម្ចាស់ផ្ទះព្រឹត្តិការណ៍អូឡាំពិករដូវរងា។ ពីដើមឈ្មោះទីក្រុងនេះជាភាសាអង់គ្លេស គឺ Pyeongchang តែពេលរដ្ឋាភិបាលកូរ៉េខាងត្បូងដាក់សំណើធ្វើម្ចាស់ផ្ទះ ក៏ប្ដូរទៅជា PyeongChang វិញ។ ការណ៍ដែលតួអក្សរ C ត្រូវសរសេរធំបែបនេះនេះ មានគោលដៅបញ្ចៀសការច្រឡំទៅនឹងទីក្រុងព្យុងយ៉ាង Pyongyang ដែលជារដ្ឋធានីកូរ៉េខាងជើង ព្រោះទីក្រុងទាំងពីរមានសូរស្រដៀងគ្នា។
វត្តមានប្អូនស្រីលោក គីម ជុងអ៊ុន
លោកស្រី គីម យ៉ុងចុង ប្អូនស្រីបង្កើតមេដឹកនាំកំពូលកូរ៉េខាងជើង គីម ជុងអ៊ុន បានធ្វើដំណើរទៅកាន់កូរ៉េខាងត្បូងដើម្បីចូលរួមបើកកម្មវិធីអូឡាំពិករដូវរងា។ លោកស្រី គឺជាសមាជិកគ្រួសារត្រកូល គីម ដំបូងគេ ដែលជាន់ទឹកដីកូរ៉េខាងជើងក្រោយចប់សង្គ្រាមកូរ៉េនៅឆ្នាំ១៩៥៣ ។ ក្នុងនាមជាប្រេសិតពិសេសរបស់បងប្រុស លោកស្រី គីម យ៉ូចុង ប្រគល់លិខិតអញ្ជើញលោក មូន ចេអ៊ីន ឲ្យទៅទស្សនកិច្ចនៅកូរ៉េខាងជើងតាមពេលវេលាសមស្រប។
អត្តពលិកកូរ៉េខាងជើងមានសំណាងចូលប្រកួតដោយមិនបាច់ជម្រុះ
ក្រោយការចរចាអន្តរកូរ៉េក្នុងខែមករា កូរ៉េខាងជើងសម្រេចចិត្តបញ្ជូនអត្តពលិក២២នាក់ឲ្យចូលរួមប្រកួតអូឡាំពិកនៅកូរ៉េខាងត្បូង។ គណៈកម្មាធិការអូឡាំពិកអន្តរជាតិ (IOC) បានយល់ព្រមលើរឿងនេះដែរ។ បើតាមសារព័ត៌មាន BBC ក្នុងចំណោមអត្តពលិកទាំង២២នាក់ មានតែពីរនាក់ដែលមានសិទ្ធិចូលរួមប្រកួត ក្រៅពីនោះសុទ្ធតែត្រូវបានអនុញ្ញាតឲ្យប្រកួត ក្រោយការចរចាប៉ុណ្ណោះ។ អត្តពលិកកូរ៉េខាងជើង នឹងប្រកួតក្នុង៥ប្រភេទកីឡា។
លោក ផេន និងលោក អាបេ អវត្តមានក្នុងការថតរូបរួមគ្នា
អនុប្រធានាធិបតីអាមេរិក ម៉ៃ ផេន និងនាយករដ្ឋមន្ត្រីជប៉ុន ស៊ីនហ្សូ អាបេ បានអវត្តមានក្នុងកម្មវិធីថតរូបរួមគ្នារបស់មេដឹកនាំពិភពលោកដែលចូលរួមក្នុងព្រឹត្តិការណ៍អូឡាំពិកនៅទីក្រុងព្យុងឆាង។ វត្តមានមន្ត្រីជាន់ខ្ពស់កូរ៉េខាងជើង គីម យ៉ុងណាម អាចជាមូលហេតុដែលមេដឹកនាំអាមេរិក និងជប៉ុន អវត្តមាន។ យ៉ាងណា ក្រោយការថតរូបជុំគ្នារួច លោក មូន ចេអ៊ីន ក៏បានចេញទៅស្វាគមន៍លោក ផេន និងលោក អាបេ តាមក្រោយ ព្រមទាំងថតរូបតែបីនាក់ប៉ុណ្ណោះ ។
ត្រាំ និង គីម ជុងអ៊ុន បង្ហាញមុខក្នុងព្រឹត្តិការណ៍
បុរសពីរនាក់ដែលតែងមុខដូចប្រធានាធិបតី ដូណាល់ ត្រាំ និងមេដឹកនាំកូរ៉េខាងជើង គីម ជុងអ៊ុន បានបង្ហាញមុខក្នុងកម្មវិធីបើកព្រឹត្តិការណ៍អូឡាំពិករដូវរងានៅរាត្រីថ្ងៃទី៩ ខែកុម្ភៈ។ មិនបានប៉ុន្មានផង អ្នកទាំងពីរក៏ត្រូវសន្តិសុខក្រៀកចេញពីកន្លែងប្រារព្ធពិធី។ បុរសដែលតែងខ្លួនជាលោក គីម ជុងអ៊ុន និយាយថា យើងចង់ឲ្យអ្នករាល់គ្នាភ្ញាក់ផ្អើល និងនាំសន្តិភាពសម្រាប់ពិភពលោក តែបែរជាត្រូវសន្តិសុខបណ្ដើរចេញទៅវិញ ពិតជាអយុត្តិធម៌ណាស់។
កូរ៉េទាំងពីរដើរកាន់ទង់តែមួយ តែក្រុមកីឡាហុកគីស្ត្រីចាញ់ការប្រកួតដំបូង
ដើម្បីបង្ហាញពីការរួបរួមគ្នា អត្តពលិកមកពីកូរ៉េទាំងពីរបានដើរក្នុងក្បួនតែមួយ ក្រោមកាន់ទង់កូរ៉េតែមួយក្នុងថ្ងៃបើកព្រឹត្តិការណ៍ ដែលទទួលបានការសាទរខ្លាំង។ ប៉ុន្តែក្រុមកីឡាហុកគីស្ត្រីកូរ៉េ បានប្រកួតចាញ់ក្រុមស្វ៊ីស ៨-០ ក្នុងការប្រកួតលើកដំបូងរបស់ខ្លួន។ នេះជាលើកទីមួយក្នុងប្រវត្តិសាស្ត្រ ដែលកូរ៉េទាំងពីរបង្កើតក្រុមរួមគ្នាលើកីឡាហុកគីផ្នែកស្ត្រី។ មេដឹកនាំកូរ៉េទាំងពីរបានទស្សនាការប្រកួតនេះដែរ។
មេដាយមាសទីមួយបានទៅអត្តពលិកស៊ុយអែត
កីឡាការិនីស៊ុយអែត Charlotte Kalla គឺជាម្ចាស់មេដាយមាសទីមួយនៃព្រឹត្តិការណ៍អូឡាំពិករដូវរងាឆ្នាំ២០១៨ នេះ។ អត្តពលិកវ័យ៣៧ឆ្នាំបានផ្ដួលកីឡាការិនីន័រវ៉េស Marit Bjorgen ក្នុងប្រភេទវិញ្ញាសា Skiathlon ក្នុងការប្រកួតដែលធ្វើនៅថ្ងៃទី១០ ខែកុម្ភៈ នៅឯទីក្រុងព្យុងឆាង។
មានករណីវាយប្រហារតាមអនឡាញនៅថ្ងៃបើកព្រឹត្តិការណ៍
គណៈកម្មាធិការរៀបចំការប្រកួតអូឡាំពិកទីក្រុងព្រុងឆាង នៅថ្ងៃទី១១ ខែកុម្ភៈ អះអាងថា មានករណីវាយប្រហារអនឡាញនៅថ្ងៃបើកព្រឹត្តិការណ៍ ដោយបង្កការរអាក់រអួលដល់បណ្ដាញអ៊ីនធឺណិត និងការផ្សាយតាមទូរទស្សន៍។ ការវាយប្រហារនេះមិនប៉ះពាល់ដល់ព្រឹត្តិការណ៍ទាំងមូលឡើយ ហើយបញ្ហាក៏បានដោះស្រាយរួចហើយដែរ។ យ៉ាងណាមិញ គណៈកម្មាធិការរៀបចំមិនបានបញ្ចេញប្រភពនៃការវាយប្រហារនេះឡើយ។
Samsung ចែកទូរសព្ទ Note 8 ដល់អត្តពលិកនិងមន្ត្រី
ក្រុមហ៊ុនទូរសព្ទកូរ៉េខាងត្បូង Samsung ដែលជាអ្នកឧបត្ថម្ភធំក្នុងព្រឹត្តិការណ៍អូឡាំពិកឆ្នាំ២០១៨ បានផ្ដល់ទូរសព្ទ Note 8 ស៊េរីពិសេសចំនួន៤ពាន់គ្រឿងទៅឲ្យអត្តពលិក និងមន្ត្រីគណៈកម្មាធិការអូឡាំពិកអន្តរជាតិទាំងអស់ ដែលចូលរួមក្នុងព្រឹត្តិការណ៍នេះ។ ប៉ុន្តែអត្តពលិកកូរ៉េខាងជើង គ្មានឈ្មោះទទួលទូរសព្ទឡើយ ព្រោះជាប់ពាក់ព័ន្ធការដាក់ទណ្ឌកម្មរបស់អន្តរជាតិ៕