អន្តរជាតិ
ស៊ី ជីងភីង ៖ សមរភូមិ ដែលសំខាន់ និងពិបាកបំផុត គឺសមរភូមិប្រឆាំងភាពក្រីក្រ
× ប្រមុខរដ្ឋចិន ស៊ី ជិនភីង បានអះអាងថា ការកាត់បន្ថយភាពក្រីក្រ គឺជាបញ្ហាមួយក្នុងចំណោមបញ្ហាអាទិភាព ដែលរដ្ឋាភិបាលរបស់លោក បាននិងកំពុងតែបន្តកិច្ចប្រឹងប្រែង ។ សម្រាប់លោក ការកាត់បន្ថយភាពក្រីក្រពីសង្គម ដែលមានប្រជាជនរាប់ពាន់លាននាក់របស់ចិន គឺជារឿង ដែលពិបាកបំផុត ក៏ប៉ុន្តែ ក៏ជារឿងដែលសំខាន់បំផុត ដែលរដ្ឋាភិបាលរបស់លោកត្រូវដោះស្រាយជាបន្ទាន់ផងដែរ ។
នាសន្និសីទស្តីការកាត់បន្ថយពីភាពក្រីក្រ លោកប្រធានាធិបតី ស៊ី ជិនភីង នៅថ្ងៃ១២ កុម្ភៈ កន្លងទៅ បានចាត់ទុកការអនុវត្តគោលនយោបាយដើម្បីកាត់បន្ថយភាពក្រីក្រនៅក្នុងសង្គមចិន គឺប្រៀបដូចទៅនឹងការចូលសមរភូមិមួយយ៉ាងដូច្នេះឯង ។ ពោលគឺ បញ្ហានេះ ជាកិច្ចការដ៏លំបាក និងទាមទារឲ្យត្រូវដោះស្រាយជាបន្ទាន់ទៀតផង ។
« ការកាត់បន្ថយភាពក្រីក្រ គឺជាសមរភូមិមួយ ដ៏លំបាកមួយក្នុងចំណោមសមរភូមិទាំងបីរបស់ចិន ហើយបញ្ហានេះដែរ គឺជាកិច្ចការដ៏សំខាន់ណាស់ក្នុងការកសាងសង្គមមួយដែលប្រកបដោយភាពរុងរឿង ... ។ ហើយសមរភូមិមួយនេះ ក៏ទាមទារឲ្យមានការអនុវត្តគោលនយោបាយទៅមុខ ដោយមិនត្រូវផ្អាកឡើយ » ។ នេះគឺជាការលើកឡើងរបស់លោកប្រធានាធិបតី ដែលចុះផ្សាយដោយសារព័ត៌មានរដ្ឋចិន People’s Daily ។
លោក ស៊ី ជិនភីង ដែលជាអគ្គលេខាធិការបក្សកុម្មុយនីស្តផងដែរនោះ បានលើកឡើងពីបញ្ហាប្រឈម និងផលលំបាកក្នុងការអនុវត្តគោលនយោបាយកន្លងមក រួមទាំង ការិយាល័យធិបតេយ្យ ការអនុវត្តក្លែងក្លាយ និងភាពខ្ចិលច្រអូស ដែលលោក ទទូចឲ្យមានការផ្លាស់ប្តូរដើម្បីអាចធានាបានភាពជោគជ័យគោលដៅកាត់បន្ថយភាពក្រីក្រីរបស់ប្រជាជន ៣០លាននាក់ នៅក្នុងរយពេលបីឆ្នាំខាងមុខ ។
ជាមួយគ្នានោះ ប្រមុខកំពូលចិនរូបនេះ ក៏បានទទូចឲ្យមន្ត្រីពាក់ព័ន្ធអនុវត្តគោលនយោបាយ ជាពិសេសមូលនិធិកាត់បន្ថយភាពក្រីក្រប្រកបដោយតម្លាភាព ហើយប្រសិនមានអំពើពុករលួយនៅក្នុងការអនុវត្តគោលនយោបាយនេះ នោះភាគីពាក់ព័ន្ធទាំងនោះ នឹងត្រូវប្រឈមនឹងទណ្ឌកម្មធ្ងន់ធ្ងរពីរដ្ឋាភិបាលហើយ ។
បើតាមការចុះផ្សាយរបស់សារព័ត៌មានចិន Xinhua គិតចាប់ពី ១៩៧៨ ដល់ឆ្នាំ២០១៦ មានប្រជាជនចិនជាង ៧៣០លាននាក់ហើយ បានរួចផុតពីភាពក្រីក្រី ។ ហើយតាមផែនការជាតិ ចិន បានដាក់គោលដៅក្នុងការសម្រេចកែប្រែសង្គមចិនឲ្យក្លាយជាសង្គមមួយដ៏រុងរឿងនៅត្រឹមឆ្នាំ២០២០ ដែលតម្រូវឲ្យរដ្ឋាភិបាល ត្រូវលុបបំបាត់ភាពក្រីក្រឲ្យអស់ពីសង្គមតែម្តង ៕
© រក្សាសិទ្ធិដោយ thmeythmey.com